Xiao's Elody

[5]

သာမန်နေ့တွေဆို ခြောက်ကပ်နေတဲ့ ရှောင်းစံအိမ်ရဲ့ ထမင်းစားခန်းက ဒီနေ့တော့ နွေးနွေးကလေးရယ်။

​ရိပေါ်နဲ့ စကားပြောပြီးတဲ့ နောက်တစ်နေ့မှာပဲ ​ရှောင်းကျန့်က ညစာတော့ အတူစားကြဖို့ ဆုံးဖြတ်ခဲ့တာ ဖြစ်တယ်။

ဟင်းအမယ်တွေက ထွေထွေးထူးထူးမဟုတ်ပါပဲ။ ခန်းခန်းနားနားမဟုတ်ပါပဲ။ ရိပေါ်က နှလုံးသားလေး ဘယ်လောက်တောင် ပြည့်တင်းနေသလဲဆို စားပွဲအောက်က ခြေအိတ်ဖြူဝတ်ထားတဲ့ ခြေတံကလေးတွေကို ရှေ့နောက်လှုပ်ရမ်းနေမိတဲ့အထိ။ သူ့ရှေ့မှာ ငြိမ်သက်စွာ ထမင်းစားနေတဲ့အမျိုးသားကို တိတ်တဆိတ်ခိုးငေးကြည့်ရတာလေးနဲ့တင် ပျော်ရပါတယ်။

ထမင်းစားနေရင်း ရှောင်းကျန့်ကြိုက်တတ်တဲ့ အစားအစာတွေအကြောင်း စနည်းနာချင်ပေမဲ့ အစားနည်းတဲ့ ရှောင်းကျန့်ဟာ ချက်ထားသမျှဟင်းတွေကိုတော့ အာဟာရမျှတအောင် စားသွားတာပဲ။ သူကသာ ပဲလုံးစိမ်းစိမ်းလေးတွေပါလာရင် အသာလေးဖယ်ရတာနဲ့။ မလိုအပ်ပဲ နံနံပင်တွေ ထည့်စားရတာနဲ့။ အလုပ်ရှုပ်နေခဲ့လေတယ်။

ဘေးလူကြည့်ရင်တော့ ခြောက်ကပ်နေတဲ့ ထမင်းစားဝိုင်းက ဘာများ နွေးထွေးတာမို့လို့လဲ။ ဒါပေမဲ့ ဒါဟာ ရှောင်းကျန့်ဘက်က ပေးနိုင်တဲ့ အနွေးထွေးဆုံးအရာပဲဖြစ်ရမယ်လို့ မှတ်ယူသူ ရိပေါ်အဖို့ အများကြီး တန်ဖိုးထားရပါတယ်။

ဒီနေ့ Rating အမြင့်ဆုံး Survival Show တစ်ခုမှာ Guest Dancer အဖြစ် သူတို့ studioက ကမ်းလှမ်းခံရကြောင်းတွေ

အများကြီး စိတ်လှုပ်ရှားပြီး ပျော်ရကြောင်းတွေ

အက,ပညာက သူ့အတွက် ရှောင်းကျန့်ပြီးရင် အမြတ်နိုးရဆုံးဖြစ်ကြောင်းတွေ

ပြီးတော့ ဒီနေ့ အခုလိုမျိုး ထမင်းအတူစားရတာမို့ ရှောင်းကို ကျေးဇူးတင်ကြောင်းတွေ...

အမှန်ဆို ရိပေါ်က ထမင်းစားနေရင်း ရှောင်းကျန့်ကိုစကားတွေအများကြီး ပြောပြချင်နေခဲ့ပြီး ရှောင်းရဲ့ တစ်နေ့တာရော အဆင်ပြေပါရဲ့လား မေးကြည့်ချင်ခဲ့တာ ဖြစ်တယ်။ ဒါပေမဲ့ ရှောင်းကျန့်ဟာ သူ့ကို ကြည်ဖြူချင်ပါရဲ့လား သူမှမသိပဲ။