طبعاً المحاضره بدت بس أنا ما دخلتها بسبب إحساس الكراهيه الوصلني من أستاذ حذيفه ، متأكده لو دخلت حـ يهيني و يذلني قدام القاعه كلها كـ عادتو القديمه ...بس للحظه دي ما قادره أفهم الغيرو شنو فجأه! و ليه التغير دا علي أنا و بس؟!!
قعدت بعيد عن القاعه و بقيت أتذكر في مواقفو معاي من البدايه لحدي ما اتذكرت يوم كنا ممتحنين مادتو و كنت متجرسه شديد و هو من دون ما يقول لي كشف لي الإمتحان و حلاهو لي قبل ما أدخل و دا الخلاني اشتغل كويس في مادتو و أقفلها ، كان كويس شديد معاي و مرات بحس نفسي مفضله عندو بس ما بقدر أحدد دوافعو كانت شنو و ليه كان بتعامل معاي بـ اللطافه دي كلها لحدي ما خلاني أتعلق فيهو و أعشق تفاصيلو! .....لمن كنت برسل ليهو بصفحه وهميه و بعترف ليهو بحبي ليهو ما خطر على بالي إنو حـ أنكشف ، بس حصلت و إنكشفت ، الوجعني شديد إنو قال لي كويس إنو دا كان مقلب منك و إلا الوضع بيناتنا كان حـ يسوء .....طيب أنا مدام متذكره دا كلو و قادره أفهم إنو هو رافض بأي شكل من الأشكال مشاعري دي فـ شنو الخلاني اواصل لسه! بس برضو هو السبب كل ما أحاول اشيلو من بالي بلقاهو قدامي و حاشر نفسو في حياتنا أنا و خالتي ...
سكت مسافه بعدها قلت أكيد هو بقى بتعامل معاي بالشكل دا لأنو حس علي! أكيد مشاعري كانت فاضحاني ، عشان كدا هو قرر يحسم دا كلو فـ مشى خطب! ....يعني كأنو بقول لي أنا ما عايزك تعشمي فيني ، ما عايزك في حياتي و أنا قبل كدا حذرتك ، و فعلاً هو قبل كدا قال لي المقلب دا لو كان حقيقه الوضع بيناتنا حـ يسوء و حالياً هو بنفذ في كلامو القالو قبل كدا .....معقوله ما بطيقني لدرجة إنو رافض رفض قاطع أي مشاعر جاياهو مني؟ !!
بس أستاهل لأني انسانه حيوانه و هبله و ما بتعلم من أغلاطي ، أولاً وائل و تانياً حذيفه و في الآخر أنا الخسرانه ، في قعدتي ديك بكيت كدا لمن قلت بس ، أول ما مسحت دموعي ناس الدفعه طلعوا من القاعه ، من بعيد شفت نادر و قصي بإستعجال جوا سلموا علي و قالوا لي مختفيه على الآخر! !.....و ليه ما دخلتي المحاضره ولا جيتي متأخره؟
قلت ليهم جيت متأخره عشان كدا ، قعدوا معاي شويه كدا سألوني عن الإجازه و مشوا ، كنت حـ اقوم و أمشي و أول ما وقفت كدا أستاذ حذيفه جا ماري جنبي و مشى خطوتين قدامي بس تاني رجع ، وقف قصادي و هو بعاين لي بحده ، قال لي بصوت جادي: ما دخلتي المحاضره ليه رغم انك جيتي بدري؟
من دون ما أعاين ليهو قلت ليهو: " ساي " ، قال لي ساي؟ ؟تمام ، لحد ما السنه دي تنتهي ما تحضري معاي أي محاضره ، قلت ليهو جداً و طوالي مشيت من جنبو و أنا عايزا أطق من الزعل ، دخلت القاعه الكانوا فيها ، قعدت و مسحت دموعي ، و بقيت أردد في نفسي دا واحد حيوان ساي يا مها ما تفكري فيهو كتير و ما تهتمي بكلامو.....بعد ساعه ناس الدفعه جوا داخلين للمحاضره التانيه بس اتفاجأت لمن شفت أستاذ حذيفه جاي داخل وراهم! سامعاهم قالوا دكتور عثمان لغى محاضرتو و قال ما حـ يقدر يجي عشان كدا جانا أستاذ حذيفه .....طوالي شلت شنطتي لأنو عديل قال لي ما تحضري معاي أي محاضره تاني ، قدام القاعه كلها جيت طالعه و هو بعاين لي لحد ما وصلتو و مشيت على الباب و أول ما مسكت مقبض الباب كدا قال لي بصوت حاد أرجعي مكانك يا طالبه! ....
