لمن حكيت لـ وئام قصة حياتي و حقيقتي بقت خاته يدها على خشمها و الكلام غالبها ، وقفت على حيلها و رجعت قعدت تاني و يدها لسه على خشمها و بتفكر في الكلام القلتو ليها و هي مصدومه! قلت ليها عرفتي أنا رفضت ليه؟ شكلي نسيت حقيقتي و ما إتذكرتها إلا لمن جاب لي سيرة العرس ، اذا هو اتقبل حقيقتي فـ أهلوا ما مجبورين يتقبلوها ، ليهم حق طبعاً ، ما بلومهم ، ما قالت لي حاجه شالت نفسها و طلعت ، مسحت دموعي و بقيت أعاين للسقف ، قلت حـ استفيد شنو من البكى ما خلاص الحصل حصل و بعدين الغلطي غلطي ، رغم معرفتي بحقيقتي مشيت اتعلقت في ود الناس و هو عِشم فيني ، عارفه الموضوع حيكون عليهو صعب بس والله ما أصعب مني ، المسا كدا طلعت الحوش لقيت خالتو هاجر مفرشه ليها سرير و قاعده ، لمن شافتني قالت لي تعالي اقعدي في السرير الجنبي دا ، لمن مشيت قعدت في السرير الجنبها قالت لي الصداع خفى ولا لسه؟
قلت ليها لا خفى ، شويه كدا جات وئام شايله كباية شاي لأمها ختتها و قعدت جنبها بس نهاي ما عاينت لي ، هي برضو بتلومني على حاجه أنا ما لي ذنب فيها! خالتو هاجر قالت لـيها كبيتي لأبوك الشاي؟ قالت ليها ايي كبيتو يا ماما ، قالت ليها طيب انتن ما عايزات ولا شنو؟ وئام قالت ليها عن نفسي ما عايزا ، قلت ليها و أنا كمان ، المهم خالتو هاجر بدت تتكلم و أنا مره مره أشارك معاها ، ما قدرت اقوم و ادخل منهم جوه لأنها حتجي لاحقاني و تقعد تسألني مالك ، هي واضح انو ما مقتنعه بقصة الصداع دي بس مشتني ، فجأه كدا قالت لي إنتِ و خالتك بتعرفوا تولا الدلاليه دي؟
قلت ليها أبداً ما بنعرفها و ما حصلت شفتها إلا في بيتك! قالت لي هي قالت بتعرف خالتك و شالت مني رقمها بس نهاي ما ورتني علاقتها بخالتك شنو و عايزاها لشنو! قلت ليها غيتو انا ما بعرفها ، لكن بما إنها بتعرف خالتي معناها خالتي كمان بتعرفها ، وئام قالت ليها المره دي ما بتتبلع لي خالص! حركاتها كلها ما بتعجبني و بحسها حراميه حراميه ، خالتو هاجر قالت ليها كلامك دا على أي اساس؟ ساي بتشكي في الناس؟
_ يا ماما انتِ عشان طيبه ما بتقدري تشوفي الناس على حقيقتها ، إنتِ ناسيه العملتو سعاد الدلاليه قبل سنتين و البسببها بابا منك تدخلي نسوان غريبات في البيت! انتِ وثقتي فيها و دخلتيها بيتنا و خليتيها تاخد راحتها و تحسو بيتها لحدي ما غدرتك و سرقت دهبك و مبلغ كبير بالإضافه لـ تلفونك و تلفون وائل الكان في الهول! هسي بابا لو عرف إنك بتجيبي الإسمها تولا دي في غيابو حـ يهد البيت فوق راسنا ، قالت ليها الناس ما كلهم واحد ، لا سعاد تولا لا تولا سعاد! ...و أبوكِ دا إلا لو مشيتي براك و وريتيهو ، قالت ليها غيتو أنا بحذرك منها يا ماما و بعدين هي اسمها الحقيقي منو ، مدلعه روحها و قايله نفسها شابه! ، خالتو هاجر قالت ليها والله إسمها دا ما متذكراهو ، كان قالتو لي زمان بس نسيتو، في نفسي قلت يا ربي المره الإسمها تولا دي بتعرف خالتي من وين و عايزا منها شنو؟ فكرت اتصل على خالتي و اسألها بس الوقت اتأخر بعد دا ، المهم استأذنت منهم و مشيت غرفة وئام و نمت طوالي ....
