حكاوي رؤى وسليم

حكاية ٣

_ بقولك اى يا سليم ما تيجى نبطل كلام فى المشاكل شويه ونرغى فى حاجه تانيه
_ قال بزعل انتى زهقتى منى انتى كمان
_ لا يعم مزهقتش والله أنا داخله المهنه دى اصلا عشان بحب الرغى، كل الحكايه انى بقول نخرج نفسنا من دايرة المشاكل عشان دماغك ترتاح وتفصل شويه بس
_ ماشى يستى ظلمتك حقك عليا ها هنرغى فى اى !
_ دايما كدا ظالمني بس يلا عفوت عنك
_ 🙄🙄
_ خلاص خلاص نتكلم جد شويه بقا ، حابب تحكى فى اى انهارده
_ بصلى بريبه كدا وقال ممكن يعنى نعكس الادوار انهاردة
_ ازاى !!!
_ يعنى انتى اللى تحكى كأنى انا الدكتور وانتى المريضة
_ مع اننا متفقين اننا هنا اصدقاء بس ماشى هعديها دى ، بس تمام تحب أحكيلك عن اى !
_ احكى اللى تعبك
_ اتنهدت وقالتله هو انا ممكن اسألك سؤال ؟
_ هو مش المفروض اننا عكسنا الادوار ولا اى ؟
_ ما هو السؤال دا بدايه الحدوته
_ تمام اسألى
_ هو ازاى الشخص اللى ابقى مدياله كل الحب اللى فى الدنيا يتغير معايا فجاءة كدا من غير اى مبررات ؟!
_ ببساطه عشان هو ميستاهلش الحب دا وميستحقش نزعل عليه زى ما قولتيلى المرة اللى فاتت
_ معاك حق بس انا بزعل على نفسى مش عليه وكل الفكرة انى ببقا محتاجه افهم اى اللى حصل لكل دا ، يعنى ليه يتغير معايا من غير ما يوضحلى سبب التغيير ، ليه يبينلى انه شخص حلو من الاول ، ما كان ممكن ميدخلش حياتى طالما هو عارف انه هيغدر بيا فى الاخر
_ مش كل الناس بالطيبه دى يا رؤى ومش كل الناس بتفكر بنفس الطريقه
_ انا عارفه دا لكن هو احنا ليه بنتسبب فى أذى غيرنا !!
_ عشان اتأذينا مثلا !
_ افتكر انى قولتلك ان اللى بيعمل كدا بيبقى شخص مش سوى وميعرفش حاجه عن ربنا
_ تمام خلاص كملى
_ اللى عايزة أفهمه هو احنا بنبنى اختيارنا على اى لما بنيجى نختار الشخص الغلط ؟!
_ قلبك اللى بيتعلق الاول قبل عقلك عشان كدا بيبقى فى معركه جواكى وفى اغلب الاحيان بتمشى ورا قلبك وترجعى تعيطى فى الاخر وعقلك بيبصلك بصه اللى هو أحسن أحسن عشان مسمعتيش الكلام من الاول ، لان ببساطه لو فكرنا شويه صغيرين اوى وجمعنا كل المواقف اللى كانت بتحصل واحنا بنعديها بمزاجنا كنا فعلا لحقنا نفسنا من الاول وعرفنا ان فى مهزله بتحصل المفروض تقف !
_ اتنهدت وقالت معاك حق
_ اللى عايزك تعرفيه ان محدش يستاهل نزعل عشانه لو هو فعلا ميستاهلش واظن دا كلامك ، وكمان ان الافضل اننا منعلقش قلوبنا بحد غير ربنا عشان محدش دايملنا الا هو ، اما نحب ربنا بجد مش هنحتاج حد تانى معانا لاننا هنبقى مكتفين بيه عن الكل  فهمانى !
_ اه فهماك شكرا جدا
_ اى خدمه تعالى كل يوم، وبعدين تعالى هنا هو دا اللى بلاش نحكى فى مشاكل  عشان تفصل شويه.
_ الاه هو مش انت اللى قولتلى احكى اللى تعبك ، وبعدين خلاص يا أخ مش من مرة
_ خلاص خلاص بس انا اللى عايز اشكرك لان حكايتك دى كانت جزء من مشكله عندى وفعلا انا لقيت الحل جوايا شكرا بجد .
_ هو دا اللى كنت عايزة اوصلهولك يا سليم ان حلول معظم  مشاكلنا جوانا احنا اللى مش بنبقى عارفين نشوفها من كميه الضغوط اللى بتبقى محوطانا ، فكنت دايما بقول حاول تطلع نفسك من المشكله وتخيل حد تانى مكانك وانت هتلاقى الحل علطول طبعا دا بعد ما توكل امرك لربنا وتبقى على يقين انه بايده يحل ليك  مشكلتك فى اقل من الثانيه لكن ربنا بيبقى عايز يستخلص حاجه جواك ، والحاجه دى بتعرفها فى الوقت اللى انت هتعرف تقدرها فيه ! واظن انا دلوقتى لازم امشى عشان يومى لسه طويل ، هجيلك تانى ان شاء الله سلام
_ شكرا على الكلام اللطيف دا وانا فعلا دماغى هديت بجد
سلام هستناكى !
#حكاوي_رؤى_وسليم
Roaa Atea 🖤🍂