_ ممكن افهم يعنى اى تقعى فى مشكله ومتكلمنيش ، اتجننتى وراحه تكلمى حد تانى يلحقك ، ملكيش اب ولا اى !!_ بعد هدوء دام لثوانى ضحكت مرة واحدة وفضلت تسقف وقالت لا بجد برافو ، انت زعلان بجد انى مكلمتكش ، جاى بعد عشرين سنه تحاسبنى انى لما وقعت فى مشكله مكلمتكش ، أنا مش مصدقاك بجد !!
_ اى الهبل اللى انتى بتقوليه دا ، انا عايز افهم ليه مكلمتنيش ، راحه تكلمى حد تانى يلحقك ، عايزة الناس تقول عليا اى !!
_ ضحكت ببرود خافى وراه وجع كبير وقالت : والله هو دا بس اللى همك ، كلام الناس ، ما يولعوا انا مالى بيهم ، ولو عايز تعرف انا مكلمتكش ليه هريحك واقولك ، عشان انت عمرك ما كنت موجود ، عشرين سنه عيشاهم لوحدى ، بعمل كل حاجه لوحدى ، مشاكلى بحلها لوحدى ، واليوم اللى وقعت فيه فى مشكله ومعرفتش احلها ، اول واحد جه فى بالى اكلمه كان انت ، لكن كنت متأكدة إنك مش هتلحقنى ، ولا هتعملى اى حاجه ، فكلمت غيرك مستغرب ليه بقا !!
_ والله عايزة تفهمينى ان دا مبرر !!
_ مش مهم عندى اوى والله انك تقتنع بيه ، مش هيفيد بحاجه يعنى
_ انتى اتجننتى انتى ازاى تكلمى ابوكى كدا ، انتى نسيتى نفسك ولا اى_ والله كويس انك لسه فاكر انك ابويا وان ليك بنت ، المفروض على الاقل تسأل عليها وتعرف هى عايشه ولا ميته ، انا بقالى عشرين سنه لوحدى ، عمرك ما وقفت جنبى ، انا يوم ما تعبت وكنت محتاجه اعمل عمليه ملقتكش ، اتحجزت شهر فى المستشفى ، ملقتش حتى رساله واحدة منك مش مكالمه ، رمينى هنا وسايب معايا واحدة تربينى وشويه حرس برا ، فاكر انك كدا مسؤليتك خلصت !! انا عايزة افهم بس انت بتعاقبنى على اى ، بتعاقبنى عشان امى ماتت وهى بتولدنى ، ولا بتعاقبنى عشان انا طلعت بنت مش ولد زى ما كنت عايز ، متستغربش اوى كدا ، اه انا سمعت كل كلامك اللى قولته يومها لانكل أسر ، انا مش السبب فى موت امى ، دا كان قضاء ربنا ، انا مليش يد فيه ، ومش بإيدى ان ربنا قدر انى ابقى بنت ، وانت بدل ما تقرب منى وتعوضنى عن غياب امى ، لا أنت رمتنى هنا ، بتيجى كل كام سنه مرة عشان تبص عليا من بعيد من غير ما تخلينى اشوفك او تحسسنى انك موجود ، فاكر ان شويه الفلوس اللى انت حطتهوملى فى البنك هيعوضونى ، انا عملتلك اى عشان تكرهنى كدا ها رد عليا !!
_ ....
_ مسحت دموعها وقالت طبعا معندكش رد ، انت عارف انا كنت بعمل اى حاجه عشان تحبنى ، كنت بذاكر على قد ما اقدر واطلع الاولى كل سنه ، واقول عشان يبقى فخور بيا ، دخلت كليه انا مش حباها اصلا واقل من مجموعى بكتير ، بس قولت عشان اقدر اشتغل معاك فى شركتك ، واقرب منك يمكن تحبنى وتسامحنى على حاجه أنا مليش يد فيها ، وانت عملت اى بقا كسرتنى فى كل مرة كنت بعمل حاجه واستنى منك رد فعل زى اللى فى دماغى ، الاقى رد فعل تانى خالص يكسرنى اكتر ، مكنتش بعرف اشوفك حتى عشان اقولك انى نجحت ، كل تعاملى معاك يا رسايل ، يا حد من الحرس يوصلك كلامى ، ولا بتعبر ، ولا بتكلف نفسك حتى تكلمنى ، عملتلك اى انا لكل دا ما ترد عليا ، ساكت ليه !!
أنت تقرأ
حكاوي رؤى وسليم
Randomوكما كانت جدتي تروي لي القصص كلما ذهبتُ إليها، سأروي لك.. سأروي لك قصصي، فتعجب أنها عنك، معك، قصص تخيلتها معك قبل أن تأتي، وقبل أن أعلم بك. تنظر لي وتبتسم علي مشاكستي الدائمة لك، وتغضب عندما أصنع منك شخصًا لا علاقة لك به. سآخذ يدك في جولة عني وعنك...