_صباح الخييييير
_ صباح الفل.
_ الحمدلله باين انك أحسن انهارده
_ فعلا الحمدلله والفضل يرجع ليكى
_ تؤتؤ الفضل يرجع لربنا أنا مجرد سبب ، ها قولى بقا بما إن انهارده اخر يوم ليك هنا تحب نعمل اى !
_ اى رأيك نخرج نتمشى !
_ حلو حديقه المستشفى جميله اوى ، وكمان انا المشرفه عليها !
_ غريبه يعنى اشمعنا
_ بحب الورد والخضرة والطبيعيه فحبيت اهتم بيها يلا بقا عشان تشوفها
_ ضحك وقال ماشى يلا بينا
.. نزلوا الحديقه وكانت لطيفه بشكل مريح اوى وجابوا قهوة وقعدوا على الارض
_ حلوة اوى بجد يارؤى ذوقك جميل
_ شكرا شكرا دى اقل حاجه عندى اصلا
_ طب يست الكاريزما عرفنا.
_ ماشى هعديها لانه اخر يوم بس ، المهم بقا تحب تتكلم فى اى !
_ مش عارف مش حاسس انى عايز اتكلم فى حاجه كأن كل الكلام اللى كان جوايا خلص وحاسس انى بقيت مرتاح
_ طب الحمدلله دا حلو اوى ، بس السؤال هنا بقا انت عرفت اى كان سبب تعبك من الاول !
_ بصراحه مش عارف فكرت كتير ومعرفتش اوصل لاجابه بس انا مبسوط انى مرتاح
_ حلو سبب تعبك ياسليم من الاول كان نفسك قبل اللى حواليك ، انت كتوم بشكل مؤذى ليك انت مش لحد تانى ويمكن دى صفه منقدرش نغيرها لكن برضو نقدر نتحكم فيها
_ ازاى
_ انك تعرف امتى تحكى وامتى تسكت ، تختار الوقت الصح والشخص الصح اللى تحكيله ، اللى تبقى عارف ومتأكد انه هيساعدك وهيخفف عنك ، مش هيزود تعبك ، واحكى لربنا طول الوقت مش لازم وانتى بتصلى بس انت ممكن تبص للسما بس وتحكى بقلبك ، دا ربنا غير القبله من الاقصى للكعبه بنظره من سيدنا محمد صلى الله عليه وسلم للسماء وقلب صادق بيدعى وهو واثق فى ربنا ، اوقات الكتمان بيبقى حل صح واوقات بيبقى مضر ، انت بقا عليك انك تحدد امتى يبقى صح وامتى يبقى مضر . فاهمنى يا سليم !
_ اها تمام فهمت
_ تانى نقطه بقا ، اتعود انك تشوف الموقف من جميع الاتجاهات ، متسمعش من طرف واحد بس وتحكم على الطرف التانى من وجهه نظره ، ومش كل حاجه تسمعها او تشوفها تصدقها لأننا غالبا مش بنشوف الصورة كامله ولا بنسمع الحقيقه كامله ، اوعى تحكم على حد ابدًا من غير ما تسمعه عشان متظلموش !
_ تمام انا بقى اللى عايز اسألك سؤال
_ اتفضل !
_ هو انا ليه دايما بحس انك بتقولى الكلام لنفسك الاول ؟!
_ اتنهدت وقالت عشان انا شبهك يا سليم ، اول مرة اشوف حد بنفس مشاكلى وعقدى الغريبه دى والغريب انى لما سمعتك عرفت احلها ، فهو فعلا معظم مشاكلنا حلولها جوانا ، احنا اللى لازم نحاول نشوفها بجد مش نعيش فى وهم اننا تعبانين ومحدش حاسس بينا !
_ بجد شكرا انك كنتى موجوده واستحملتينى ، استحملتى مشاكلى وقرفى حتى النوبات اللى كانت بتجيلى واللى كنت هموتك بسببها فى مره ، ومع ذلك انتى متخلتيش عنى وكملتى معايا لحد ما بقيت كويس شكرا بجد
_ لا شكر على واجب ياهندسه ، افتكر انى قولتلك انك شبهى ، وانا متعودش اسيب حد محتاجنى من غير ما اقف جنبه ، المهم عايزاك تخرج من هنا تركز على مستقبلك وعايزة احضر افتتاح شركتك قريب وانا واثقه انك تقدر تعمل كدا ، وبالنسبه للى كانوا السبب انك جيت هنا من الاول فجزائهم عند ربنا وهما لما يشوفوك واقف على رجليك من تانى هيتحرقوا من غلهم وانت كدا هيبقى حقك رجعلك ، وبالمناسبه يعنى احم نصهم فى السجن دلوقتى والنص الباقى عليك انت بقا
_ برق جامد وقالها عملتيها ازاى
_ لا دا سر المهنه بقا الدور الباقى عليك ، يلا بقا عشان تحضر شنطتك عشان المفروض تمشى دلوقتى ، رقمى معاك وقت لما تحتاجنى كلمنى ، يلا اشوف وشك بخير
_ ان شاء الله تشوفينى قريب وزى ما انتى عايزه ، استودعك الله سلام
_ سلام
مشى وهى راحت تكمل شغلها ، كدا سليم خلاص رجع زى الاول ويمكن احسن وهى فخوره بجد انها قدرت تساعده ولو بجزء قليل .كلنا عندنا تقريبا سليم فى حياتنا ، وكلنا عندنا رؤى ، وكلنا عندنا الناس المؤذيه اللى اذوا سليم ، لكن رحمه ربنا موجوده دايما ، ربنا بيبعتنا لبعض رحمات ، زى ما بعت رؤى وسليم لبعض وكانوا فعلا رحمه لبعض ، اكيد ربنا بيجهزلك رحمه ولطف من نوع مختلف ومش لازم شخص ممكن تبقى نسمه هوا تخفف عنك ، رحمات ربنا متنوعه وبتيجى لكل شخص على حسب حاجته مش على حسب هو عايز اى ، لان اوقات اللى احنا بنبقى عايزينه بيبقى شر لينا ، فخليك واثق فى رحمة ربنا وسلم امورك ليه 💚
كدا تبقى انتهت اول سلسله من حكاوى رؤى وسليم يارب تكون أثرت تأثير ايجابى فى اى حد هنا 💚
Roaa Atea 🖤🍂
#حكاوي_رؤى_وسليم
أنت تقرأ
حكاوي رؤى وسليم
Randomوكما كانت جدتي تروي لي القصص كلما ذهبتُ إليها، سأروي لك.. سأروي لك قصصي، فتعجب أنها عنك، معك، قصص تخيلتها معك قبل أن تأتي، وقبل أن أعلم بك. تنظر لي وتبتسم علي مشاكستي الدائمة لك، وتغضب عندما أصنع منك شخصًا لا علاقة لك به. سآخذ يدك في جولة عني وعنك...