#جزائي3 ❤️🌷
مر اسبوع على اخر مشكلة بينا مهند حاول يهدي الوضع لكن خلاص الفجوة انخلقت وفات 💔
رن هاتفي:ايوا
لمى:شن الجو
انا:ماشي
لمى:بنقولك بابا دار حادث بكري
انا:كييف شن صارله
لمى:كويس غير رضوض بسيطه
انا:توا نجيكم
لمى:ديري حسابك بتباتي
انا:ان شالله
سكرت منها واتصلت بحسام مرة واثنين مايردش
نزلت للعيله:عميمه
خيرية:نعم بنيتي
انا:بابا دار حادث ونبي نمشي ترا اتصليلي بحسام
خيرية:اهو هاتفي كلميه
وزي ماتوقعت رد على امه:نعم امي
انا:مرتك ياغزال
حسام:نعم
انا:نبي نمشي لاهلي بابا مريض تعالا ارفعني
حسام:مش فاضي شوفي ياسين
انا:تمام المهم نمشي ولا حتا مع ولد الجيران
حسام:بلا خرا قتلك خوتي بس
وانا نكلم فيه شفت مهند طالع:اوك باي
خيرية:شن قالك
انا:شوفي خوتي
خيرية:ربي يهديه
طلعت برا:مهند مهند
تلفت:ايواا
انا:بالله بنمشي لحوشنا وخوك مش فاضي ترفعني!
مهند:شن بنقولك
انا:بالله عليك والله بوي داير حادث 😢
مهند:باهي تفضلي هي
انا:نجيب حمودي ونجي
مهند:تم
ركبت خديت لبسنا ونزلت نجري
مهند:بشوية طيحي الولد 😡
انا:ولدي مش حاتخاف عليه اكثر مني
حدف الدخان وركب السياره:لسانك مايرتاحش بكل
انا:لا راس مالي لساني
مهند:اللي مسلط قوته في لسانه ضعيف ونخصه اليبرا تهده 🙂
حسيت كلامه جي عاجرحي:فيلسوف ماشالله
مهند:نعجبك
انا:هدا اللي ناقص مش من النوع اللي يعجبني ولا حتا يلفت انتباهي
مهند:لاعاد بنقتل روحي عاخاطر اعجابك ضمي عليا فمك 😡😡
سكتنا عشرة دقايق بعدين قررت نسأل وربي يستر:انت ليش تكرهني
مهند:سكري الروشن نسمه عالولد
انا:جاوبني شن درتلك
سكت معاش رد عليا لين وصلنا قدام حوش اهلي
حديت حجاتي ونزلت:شكرا سامحني تعبتك
مهند:مانكرهكش لكن راسم لروحي حد مستحيل نتخطاه،ردي بالك عالبطل في امان الله
بدت زحمه في حوشنا الناس تجي تتحمد عاسلامة بابا اضطريت نبات باش نساعد خواتي وطبعا راجلي ولا هامه جي قعد نص ساعه وروح
حياتنا بدت اشبه بأمر واقع مجبورين نتعايشو معاه،التعامل بينا فوق الرسمي مش جامعنا شي غير ولدنا
اليوم حمودي سكر ال5شهور متجمعين في حوش العيلة كالعادة
رنا:ااخ قداش نحبه هالفرخ عسل ياناس
رانيا:غير ره تاكله ولدك خوديه منها
كنت سرحانه في عالم ثاني قلبي مقبوض حاسه بيصير شي مش كويس بكل لدرجه دمعتي نزلت
رانيا:لولي خيرك
انا:قلبي مغموم مش عارفه خيرني
خيرية:تعودي من الشيطان يابنيتي نوضي جيبيلها ميه مرقيه
رنا:هيا
خيرية:ماترضعيش ولدك لين ترتاحي
انا:حاضر
درس ياسين سيارته وخش:خير
خيرية:مرحبا بوليدي خيرك مروح بكري
ياسين:اتصل حسام قال بنتجمعو
رانيا:ماكلمناش
خيرية:حتا انا ماعنديش علم خيره زعما
ياسين:صوت سيارته برا
خشو حسام ومهند:السلام عليكم
رانيا:شن فيه جايب حتا الكبير معاك
حسام:نبيه يحضر كل شي
خيرية:ان شالله خير ياوليدي
انا ماقلتش حتا كلمة شاده احمد وساكته حاسه انه اللي بيقوله يخصني
مهند:طلعني من خدمتي ومش عارف شن السبب
خيرية:قعمز واحكي هي ماتحرقش دمنا
حسام:لبنى اسمعيني
قمت راسي وبنظراتي ترجيته مايكسرنيش قدام عيلته
حسام:يشهد ربي يابنت الناس اني يوم خطبتك ونويت نكمل معاك نص ديني ماكنتش نلعب ولا نضحك عليك،خديتك بكامل ارادتي لكن اللي صار بعدها كان غصب عليا،اللي كنت نقول عليه حب طلع مجرد اعجاب وفقت منه انتي بس ابهرتيني خليتي عندي فضول اني نبي نتعمق فيك ونكتشفك
قص عليه مهند:مواضيع زي هدي تحكوفيها بروحكم ولا ماتعرفش شي اسمه خصوصيه 😡
حسام:نعرف لكن نبي يكون عندكم علم باش قدام ماحد يتناقش معاي
خيرية:شن قصدك
حسام:ماقصرتيش معاي احترمتيني وصنتيني في وجودي وغيابي،وانا عارف خديت بنت ناس محترمة ومتربيه
رنا:وبنت الناس هدي شن ناوي دير فيها
حسام:انا بنتزوج دنيا
الصدمة خلت الكل ساكت ماحد قدر يرد عليه بحرف
حسام:نحبها وهيا اللي نبيها عرفت قيمتها بعد سيبنا بعض وجربت غيرها،حوشك ليك انتي وولدي مش متخلي عليك قاعد نبيك
صوت بكا احمد رجعني لأرض الواقع حضنت ولدي وكأني نستمد في القوة منه:حقك الشرعي مستحيل ناقشك فيه ربي يهنيك،انت اللي بعتني لهذا ماتفكرش في يوم ترجعلي وقدام اهلك نقولك انتهيت بالنسبه ليا ياحسام مش رح ندعي عليك ونتحسب احتراما للمرا اللي كانت ليا أم رانيا ورنا اللي كانو ليا اكثر من خوات ولخوتك اللي مافيش يوم غلطو فيا وعلى خاطر ولدك اللي محتاج حسك في لدنيا، بس صدقني ربي رح ياخد حقي💔 نستاذن خديت ولدي وركبت لشقتي باش ننهي الصلابه اللي تصنعتها قدامهم وبمجرد سكرت الباب تحولت لأكثر انسان ضعيف في الدنيا بكيت من قلبي عاللي صارلي بكيت واحمد شاد فيا بقوة كأنه حاس بيا 😢
خيرية:انا مش راضيه عاللي دير فيه برا تزوج بروحك والله مانتبعك ولا نمشي معاك خشت دارها وسكرتها
رنا:رح تندم لانه لولي مافيش زيها وكسرتها وحتا ني مش ماشيه معاك ولا مزال حد يجيبلي سيرتهم حوش عمتكم الحقراء هادو 😢
ياسين:سامحني والله حمار وتوا يردك الحيط
رانيا:شن رايك انت
مهند:حياته مش صغير عارف الصح وعارف انه اللي يدير فيه غلط
حسام:انا حر مانحبهاش ياناس
رانيا:ماكانش هدا كلامك لما جيت وقلت بنخطبها كنت طاير بيها ومش شايف غيرها طول الوقت سارح وتضحك زي الاهبل
حسام:احساس وقتها واختفى
رانيا:لعب هدا لااحساس لاحب لعب مفرخ
حسام:مادخلكش حياتي زي ماقال خوك
رانيا:صح بس خليها في راسك ماحد منا بيمشي معاك وعرس هنا مافيش تاخدها الكلبه هاديكا وتسكن بيها برا في الحوش هدا نقبلك بروحك والشقه فوق لي لبنى واحمد
حسام:نعم
جاه صوت مهند الحازم غير قابل للنقاش:كلامها مايتحرفش ويتنفذ بالكلمة
حسام:يعني بتتخلو عليا
مهند:احنا عيلتك صحيح لكن عالغلط نرخوك
حسام:تمام براحتكم لكن دنيا بناخدها غصب عالكل
مهند:ربي معاك
بهكي فازت دنيا وخسرت انا 💔خدت راجلي ودمرتلي حياتي اللي ظلمت معاش عندي نيه للحياة لولا وجود ولدي
قعدت اسبوع في حوشي وبعدين خديت قراري اني نسيب كل شي ونمشي
خش حسام:شن ديري
انا:مسيبتهالك واسعه وعريضه بنطلق
حسام:شنو تطلقي تبي تشردي الولد انتي
انا:ولدك مش رح نحرمك منه لكن معاك مش قاعده
حسام:انا نبيك معاي
دفيته:بلا وقاحه زايده بيتزوج عليا ويبيني
حسام:افهميني الي نحس فيه معاك مش حب بس نحترمك
انا:لا والله محترم هلبا بعد اللي درته قدام اهلك انت صغرتني وخليتني مانسوا حتا حاجه
حسام:اسف سامحيني
انا:مانبيش نسامح لو يقعد اخر يوم في حياتك مش رح نسامحك ياحسام
قرب مني:لو نموت
انا:ربي يرحمك
حسام:سامحيني
انا:ربي يسامحك خليني بس 😢
حسام:بهي نقولك شي بنمشي عندي مشوار ضروري ونجي نديرلك الي تبيه غير استنيني بس بالله عليك لولي
انا:بهي بس بعدها بترفعني لحوش اهلي
حسام:حاضر
انا:تمام نستنا فيك
حسام:سامحيني خليني نمشي مرتاح
استسلمت لاني نبي نطلع من هنا:مسامحاتك وربي يسامحك
هوا طلع وانا نزلت نهدرز مع رنا
خيريه:والله بودي ماننقطعو ولا يصير فراق لكن مانبيش نكون ظالمه ونقولك تحملي ولدي حقك تشوفي حياتك
انا:مانتفارقوش ياعميمه تقعدو اهلي زي قبل وولدكم امتا ماتبوه تفضلو شوفوه
رنا:بهي وانا 😢بتخليني بعد ماتعودت انك جنبي
انا:خلاص يارنو بالله عليك قدري موقفي حتا انا اللي صار فيا مش ساهل بنطلق في عمر هدا بولد حياتي انتهت 💔
خش علينا مهند ووجهه مايتفسرش
خيرية:خيرك ياوليدي خاش علينا هكي تقول جايب خبر موت
وزع نظره علينا ورجع شاف لامه:وحدي الله يما 😢مصير الحي للموت
نعرفش كيف وقتها تأكدت انه راجلي اللي مات:حسام
مهند:الله يرحمه ويغفرله
نسمع في عياط عمتي ورنا بس مزال عيوني معلقات في مهند نتمنا يقولي نكذب نبصر او حتا غالط
انا:لا ماتقولهاش خوك هدا
نزلو دموعه:خوي مات ادعيله وطلع
سمعو الناس الاقارب والجيران خلال ربع ساعه الحوش تعبا ونصبو خيمة عزا راجلي وبو ولدي
رانيا مقعمزة جنبي من جيهة وماما من الجيهة الثانيه وانا شادة احمد
خشت دنيا تعيط:قتلتيه تريحتي ياحقيرة كله بسببك نكدتي عليه عيشته ماخليتيه ياخدني حسبي الله فيك 😭😭
رنا:سكري فمك شن تقولي انتي بعد خربتيلها بيتها جايه تلومي فيها اقلبي وجهك اطلعي من هنا
عربية:تحشمي هدا خطيبها اللي مات ومحروقه عليه عرسها كان بعد اسبوع
دنيا:انتي السبب اكيد سحرتيه باش دار حادث ومات ان شالله ربي يردهالك في ولدك ربي يحرق قلبك على ضناك
مارديتش بشي لاعندي حيل نتكلم ولا نتناقش
رانيا وقفت ومشتلها:خودي بنتك واطلعو من حوشنا
عربية:تلزي فيا من حوش خوي
رانيا:خوووك مات اطلعي برا
دنيا:حسبي الله ونعم الوكيل اااه ياحسام ياحبيبي مشيت وخليتني بروحي
كنت نبكي على الحال اللي وصلته ليش لدنيا هكي دارت فيا ليش تظلمني للدرجه هدي،وانا اللي ماعمري ظلمت حد ولا غلطت في حق شخص يااارب شن حكمتك بس
جابو حسام ودعناه كلنا ورفعوه بعد الجنازة جو بابا وعمامي باش يروحو بيا 💔
خيرية تبكي:اااه يابنيتي بكري نقولك ماهاين عليا فراقك 😭😭 فارقتيني بالسيف ااه ياريحه الغالي
رنا:لولي بالله عليك اقعدي معانا ماتمشيش 😢
انا:مانقدرش يارنو حسي بيا من قبل مش مكتوبلي نعيش هنا 😭
رنا:انكسرنا في حسام وتزيدي حتا انتي تمشي وتخلينا اقعدي هنا والله مايفوت عليك واحد
شاهين:هيا اطلعي نزلنا كل شي
رنا:شاهين بالله عليك خليها تقعد تعالا انت اسكن هنا معاها والله مانقدر نقعد بلاها هدي اختي وصاحبتي حرام عليكم 💔😭😭
شاهين:ماتجيش يارنا عارفتها بتربط على راجلها والاصح تروح لحوش بوها
رانيا:خلاص يارنو اسكتي وماتعرضيلهاش
رنا:لا توا نقول لمهند يجي يكلمها نزلت تجري قابلها
مهند:خيرك خيرك
رنا:كلمهم قلهم يخلوها هيا واحمد بالله عليك 😭
مهند:وين بتقعد راجلها مات
رنا:بس هيا صاحبتي 😭
مهند حضنها:الله غالب هذا اللي كاتبه ربي تعالي خشي
رنا:بالله عليك ماتحرمونيش منهم هما ريحة خوك
مهند:بهي خلاص ياسر من البكا ادعيله بالرحمه 💔
ودعت عمتي ورانيا بس ماقدرتش نشوف رنا لانها كانت منهارة ومعاها خوها وانا خلاص نعتبر في العده 💔
طلعت مع اهلي وخليت قلبي معاهم
ماما:ربي يصبرك ياينيتي ويعينك على تربية هالوليد
لمى:هاتيه عليك حمودي
اول ماوصلنا رقدت في حضن ماما بس نبي راحه مش قادره نلقاها
امي:سامحتيه
انا:سامحته ياماما من قبل يتوفا قالي سامحيني خليني نمشي مرتاح كان حاس بروحه بيموت 😢
امي:ادعيله بالرحمه
انا:قعدت بروحي ياماما كيف بنربي ولدي خايفه من الدنيا والناس انا ماعنديش القوه هدي كلها
امي:كلنا معاك وحتا اهله مايخلوكش
انا:ياربي اعطيني الصبر 💔
سرحت بذكرياتي مع حسام
flash back
كنا انا ورنا في المطبخ نهدرزو
رنا:والله قالي بيجي نهاية الشهر
انا:مانبيش قلبك ينكسر
رنا:لالا ان شالله مش رح يكسره
رن الجرس
فتحت:عطلت
ياسين:جبتلكم كريب وكنافه هدا اللي حصلته
رنا:باهيات
ياسين:راجلك وين
انا:راقد
ياسين:سادة بالله لولي
انا:حاضر
رنا:امتا ناويين تجيبو باقي كناينا انت ومهند
ياسين:مزال شويه ومهند عارفاته راسه وراس الخدمة
انا:بس حسيته عصبي هلبا
رنا:جدا
ياسين:مش عارفه كيف بيدير مع مرته احتمال كل يوم طريحه
انا:بالعكس ماما تقول ديما الواعر تهديه مرته وتغيره
ياسين:على ايديها نحجو امك من غدوة نجوزوه
ضحكنا بصوت عالي 😂😂
طلع حسام:ضاقت يعني معاش فيه وين تهدرزو
رنا:ماما طالعه قررنا نشربو قهوتنا عندك
فات من جنبي باس عاكتفي:نحبك 😉
ياسين:احترمونا الزح
حسام:انزل
انا:شن نديرلك
حسام:قهوتي
رنا:تحبها
حسام:ميت فيها صاحبتك 😍
رنا:ربي يرزقني بواحد يحبني زيكم هكي
ياسين:نوضي جيبي ميه وسكري فمك
end back
لمى:لولي وين مشيتي
مسحت دموعي وخديت حمودي يبكي:سرحت شوية
لمى:ادعيله ديما
انا:ربي يرحمه
مرو شهور العده عمتي والبنات ماقطعونيش ابدا كل يومين يجو معاهم قضيه ولبس لحمودي مهند يبعت في فلوس ديما
مرو 7 شهور على وفاة حسام اليوم عيد ميلاد حمودي واصرو يديروه في حوش عمامه عزمونا ومشينا
رنا:فاقدتكم 💔
انا:ياسر من البكا عيونك هلكتيهم بعدين خيرك هكي ضاعفه ووجهك اصفر
رنا:مخنوقه وجوي اخيي بكل حتا عيسى سيبته
انا:علاش ياحمارة
رنا:يماطل فددني قداش ليه يقول بنجي نخطب
انا:زمان كنت نقولك هكي وانتي مقتنعه توا انقلب الراي
رنا:اقتنعت وفراقه عندي عادي مات حتا خوي 💔
انا:ماتقعديش واقفه رنو حرام عليك لازم بتكملي
رنا:ارجعي انتي وحموده خلاص العده وتمت
انا:مانقدرش ماتجيش اصلا وبابا مستحيل يوافق
رنا:خلاص يعني بنكمل حياتي انا وياك بعااد
تنهدت وحضنتها:الله غالب ربي هكي كاتب
خشت رانيا:ياسر من النكد مهند جي تعالو نطفو الشمعات
طلعنا نظمنا الطاوله والعشا
مهند قايم احمد:حبيب عمو اللي كبر سنه 😘
انا:كيف الحال
مهند:بخير شن امورك
انا:الحمد لله
مهند:ناقصتكم حاجه!
انا:لا مش ناقصه شي بارك الله فيك
مهند:لو تحتاجو اي شي عاطول كلمي وحده من البنات يكون عندك، لحد ماكملت ورق المرحوم باش يبدا راتبه يمشي
انا:تسلم ماقصرتش
مهند:هدا واجبي
رانيا:هيا لولي هاتي حمودي
غنوله وطفينا الشمعات وخدينا الهدايه
انا:صحيتو ربي مايحرمنا منكم
خيرية:تعالي جنبي وقعمزو الكل عندي مانحكي
رنا:قصه ياماما
خيرية:لا طلب
رانيا:ان شالله خير
خيرية:اليوم انا اصريت يكون عيد ميلاد احمد عندنا حتا نجتمعو كل وتسمعوني،يعلم لله قداش نحب لبنى ودايرتها وحدة من بناتي طلعتها من حوشنا زادت كسرتني فوق موتت ولدي 💔😢
شديت ايدها:الله يرحمه
خيرية:الموت هيا القريبه وماحد بيخلد فيها،انا نبيك ترجعي انتي وولد المرحوم تسكنو هنا وتكملو حياتكم معانا
رنا:الله 😍 احلا قرار ياماما
انا:مانقدرش ياعمتي
رانيا:اسمعي باقي الكلام لولي
خيرية:مش بروحك عارفه الاصول وعارفه انه ماتجيش ترجعي هنا انتي وولدك صغير
انا:مالا مع منو بنسكن
فجرتها خيرية لما قالت:يردك سلفك مهند وترجعي هنا كنتي زي قبل......
ولسه اللي جاي أحلا 😁😘
