#جزائي11❤️🌷
part2
خيرية:شن انجنيت انت طلق مرتك
يشوف للتلفزيون ويدخن:امي ليك اسبوع شادة نفس الموضوع مافديتيش
خيرية:ولدي نبيه انا دبر راسك وحتا لبنى والله مانحمل فراقها
تنهد وفي خاطره قال"عااساس انا اللي متحمل فراقها 💔"
ضرباته على كتفه:نكلم فيك ياولد
رفع راسه:اهو رديها لولدك هدا
ياسين: علاش واخدها انت من الاول مدام بطلق
خيرية:يلعب
وقف وخدي جاكيته:انا ماشي لطرابلس عندي خدمة اسبوع
خيرية:ولبنى
لبس سبيدروه وتلفت طالع:يسهل الله لين نرجع ادعيلي ياحنينه
خيرية بوجع على حال ولدها:ربي يفرج همومك ويريح قلبي عليك ياوليدي ربي يحميك ويحفظك من كل سو 🤲
ياسين:شن صار بينهم وصلهم للطلاق
خيريه:علمي علمك
ياسين:بس من رده فعل لبنى هيا الغالطة
خيريه:ايي هكي فهمت ربي يهديها ديما نقوللها مهند زعله صعب وماديريش عليه اسرار
ياسين:حتى ولدك صعب معقوله عاغلطة طلقها
خيريه:صعب لكن يحبها وشفت بعينك كيف تغير هلبااا انا عارفه ولدي ماوصل للنقطة هدي الا الموضوع كبير
ياسين:باين زعلانه من لبنى قبل ماتعرفي السبب
خيريه:اي ام تزعل من صغارها لما يغلطو ويأذو نفسهم
ياسين:شكله حد عاطيهالنا عين حرفه نطلقو في نفس الاسبوع
خيريه:اللهم اني لااسألك رد القضاء ولكني اسألك اللطف فيه
في المربوعة
عيسى:ياسر من البكا
رنا:ماتقوليش ياسر مش شايف حياتنا كيف ادمرت خوتي يطلقو الزوز لولي رجعت طلعت من هنا مكسورة مره ثانيه 💔
عيسى:لو زي ماتقولي انهم يحبو بعض معناها رح يرجعها غير لحظه غضب وفاتت
رنا:يارب يارب اصلح حالهم وخييني 😭
عيسى حضنها:خلاص اشش يصير خير ان شالله
رنا:ان شالله
اما في حوش مهند
رانيا:احكيلي خيركم معقوله طلقها هدي اللي روحك فيها
نفخ دخانه وطفاه:مش نصيب بعض
رانيا:شنو مش نصيب هدي بعد هذا كله تقول هكي
مهند:ايه
ضرباته عاقلبه:وهذا اللي عاش بعد ماكان مدفون عامنو تكذب انت اكذب على امك وخوتك وحتى روحك بس انا لا حافظاتك اكثر من نفسك شن دارتلك لبنى شن كسرت فيك ادوي
خدا الفازه وحدفها عالشباك تكسر وعيط بأعلى صوته:قتلتني لبنى مش كسرتني بس دمرت خوك اللي فتحلها قلبه وعطاها كل شي
رانيا:شن دارتلك
مهند:انا تخلي فرخه زي هدي تلعب بيا وتضحك عليا وتتشمت انا الافندي اللي حضوري يهز في تريس فرخات زي هادو يضحكو عليا
رانيا:منو
مهند:صاحبتكم تاخد في حبوب ماتبيش تجيب مني صغار، اكتفت بولدها اللي من حبيبها الاول تقوللها مانبيش نحمل
رانيا شهقت:لولي مستحيل من قالك الكلام هذا
مهند:اكثر حد يكرها
flash back
قبل اسبوع مهند مروح من الخدمة رن هاتفه برقم
رد:ايوا
دنيا:هااي افندينا
مهند:منو
دنيا:بنية عمتك اللي تبي مصلحتك
مهند:لخصي مش فاضي لقطافك
دنيا:فيه امر مهم ومستعجل نبي نحكيلك فيه ونعرف انك راجع من الخدمة تمر عليا في طريقك
مهند:فوتيني يابنت
دنيا:وراس احمد اقسم بالله موضوع حقيقي
لف سيارته ورجع لحوش عمته وين مالقاها تستنا فيه
مهند:دقيقتين مش اكثر
دنيا حطت ايدها عاكتفه:حبيت حسام وهلبا ووقت مات وقلتلكم لبنى السبب ماحد صدقني، ومانعت زواجك منها برضو ماعبرتوني
مهند:امم غيره
دنيا:انا اولى منها نكون مرتك وام صغارك اللي رافضه تجيبهملك
مهند:كملتي هي السلام عليكم
شدت ايده:مانبصرش انا لبنى ماتبيش تجيب منك صغار وتاخد في حبوب ياحلو
مهند:شن تخرفي انتي ضاقت معاش لقيتي شن تكذبي
دنيا:تمام اسمع التسجيل هذا وقولي صوت حبيبه القلب او لا
كانت مسجلتلها مكالمه يوم حوش رنا تحكي مع اختها انه تجيبلها شريط جديد لانه اللي عندها كمل
دنيا ضحكت:مغفلاتك ومرقداتك في العسل وانت ولا داري ياافندي، وجعني قلبي عليك بجد
مهند:ورحمه بوي اللي ماعمري حلفت بيها كذب لو يطلع الموضوع هدا كذبه منك مامخلي فيك عظم سليم
طلعت شريط من جيبها:هذا واخداته من شنطتها امشي بيه لاول صيدلية واسمع بنفسك
end back
رانيا:دنيا لالا هدي لعبه منها ماتصدقش
مهند:تي شن مانصدقش سألتها ولقيتهم في دولابها
رانيا:لالا ياربي
مهند:كل يوم نحكيلها انه امنيتي تجيبلي بنت كل ليله نحكيلها نبو نديرو عيله دللتها كانت تطلب وانا نفذ العصبية اللي مع الكل نخلي فيها برا الباب هذا بس لانها تخاف، مافوتت لحظه الا وعبرت فيها على حبي وعشقي ليها ضحكت عليا يارانيا قتلتني نزلو دموعه
حضناته بقوة:لبنى تحبك والله
مهند:الله يلعنه الحب اللي زي حبها
رانيا:بهي تكلمت معاها وسمعت منها
مهند:تمت من حياتي ومعاد حد يجيبلي سيرتها
راينا:بس
مهند:قلت تم 😡
رانيا:بهي خلاص
مهند:جمعي كل شي ليها مانبيش ريحتها في الحوش ارفعيه ولا احرقيه ديري اي شي
رانيا:حاضر
مهند:خشي وتيلي شنطة بنطلع لطرابلس
رانيا:وين بس قالو فيه ضرب غادي وشاتباكات
مهند:الحافظ ربي نوضي
رانيا:بهي
مشا مهند لطرابلس وزي عادته قفل هاتفه وانقطعو اخباره عالكل
لبنى حالها ماكان احسن مرضت وطول الوقت تبكي نادمه عاتصرفها اللي مادارتله حساب
خشت لمى للدار:نوضي شوفي ولدك حرام عليك
لبنى:خليني في حالي
لمى:حماتك تبي تشوفك مقعمزه في الصاله
لبنى:منو
لمى:رانيا
لبنى:قلها راقده ماعندي وجه نحكي معاها
لمى:براحتك
لحظات وخشتلها
رانيا:لامتا بتقعدي تتهربي منا يعني
لبنى:ماعنديش شي نحكيه
رانيا:ليش درتي هكي اعطيني سبب بس
لبنى ساكته
رانيا:شن دارلك في شنو اذاك حتى تجرحيه بالطريقه هذي
لبنى:شي
رانيا:قلتيله بهي صارحتيه، او عالاقل حكيتيلي انا ليش يالولي هكي تتصرفي استغفلتينا كلنا حتى صاحبتك ردي عليا ماتقعدي ساكته دافعي على روحك
و لبنى لارد غير الدموع
رانيا:مهند مشا لطرابلس لو تصيرله حاجه مستحيل نسامحك يالبنى عمري كله طلعت وسيبتها بتموت من الندم والخوف عليه
بين كل هالحزن والوجع شخص واحد سعيد ومبسوط بالانجاز اللي كان يخططله من وقت ونجح فيه دنيا 🤷🏼♀️
بعد 3ايام
خيرية:تعالو اتصلولي بخوكم
رنا:ياماما هاتفه مقفل
خيرية:اتصلو بحد من صحابه يكلمه قلبي مش مرتاح يابنيتي كلموهولي
ياسين:لاحول ولاقوة الا بالله
رانيا:شوف حد من صحابه
ياسين:شويه بس نرن عليه مرات فتح هاتفه اهو يرن الو
مهند:ايوا
ياسين:وينك ياراجل علاش مقفل هاتفك
مهند:خدمة مش فاضيلك شن تبي
خدت منه خيرية الهاتف:وليدي انت وين روح توا
مهند:وين بنروح يما عندي خدمة
خيرية:لالا روحلي هنا قلبي والعه فيه نار ياولدي
مهند:عارف روحي ديما قاطع قلبك عليا سامحيني ياامي وماتحرميني من دعائك ديما
خيرية تبكي:وين ماشي ياكبدي
مهند:مش عارف ياامي بس ادعيلي مرات ربي ينجيني
خيرية:اركب سيارتك وروح توا
مهند:هيا مع السلامه وسكر
خيرية:ياحليلي خوكم فيه شي
رانيا:ماتفاوليش عليا وادعيله
خيرية:يارب ماتحرق قلبي على واحد ثاني يارب سادني انكويت في حسام يارب احفظولي واحميه من كل شر يارب رجعهولي سالم 🤲😭
لبنى مريضه تتصل وتعاود
لجين:قداش مره اتصلتي وعطاك مقفل
لبنى:توا يفتحه نبي نطمن عليه بس طرابلس فيها ضرب
لجين:مش فاتحه هاتي الهاتف خلاص عاد لو تحبيه ماكنتي درتي هكي فيه مرا دير عملتك احمدي ربك ماقتلك وجاتك عالطلاق بس شن بيفيدوك دموعك توا ابكي من هنا لعام قدام بيرجعلك عمو مهند يعني ولا بيسامحك اكيد لا 😒
لمى:اسكتي وتحشمي عاوجهك اختك اكبر منك ناقص غير انتي يافرخه تعطي مواعظ
لجين:قلت شي كذب يعني
لبنى:بس انا حبيته بجد ماكذبتش في شي
لجين:الكلام سهل
لمى:نوضي اقلبي وجهك لدارك
لجين:طالعه
لبنى:عندها حق 😢 انا دمرت زواجي بايدي ماعرفت نحافظ عليه
لمى:خلاص توا اللي صار صار هوا يرجع بالسلامه ان شالله وحاولي معاه مرة وميه لين يردك
خش احمد يبكي:ماما
لبنى:نعم ياماما خيرك
احمد:ابي بابا
لبنى:بهي حاضر تعالا ننو هي
عند مهند في الخدمة هدا الضرب شويه طلع يشوف في صحابه:هاشن الوضع
سويلم:حول من غادي ياراجل وخيرك طالع بلا واقي
مهند:ياسر فديت منها كان كاتبلنا الموت نموت حتى وانا لابسها
ممدوح:بعد عمر طويل هيا خشو تعشو باش نبدلو عابعض
مهند:ماعنديش نيه تعشو انتم وانا بنركب نشوف المنطقه
سويلم:البس الواقي وراس وخي
تلفت ويمشي قدامهم:نق ياراجل
سمع صوت حاجه تصفر واصحابه يعيطو عليه حس بجسمه يصقع وشاف دم تحت رجليه
سويل يجري:مهند مهند صاحبي ياكلاب
طاح عاركابه ويتخايل في امه ولبنى لحظات وظلمت قدامه ....
في نفس اللحظه شهقت خيريه وفاقت من النوم:يارب
رانيا جنبها:خيرك يما بسم الله عليك
خيرية:خوك فيه حاجه والله خوكم يامات ياانصاب يارب ماتوجع قلبي عليه
رانيا:بعيد السو عليه يما غير انتي خايفه بس
فاتت باقي الليله خوف على خيرية
الصبح
رانيا:تعالو افطرو
ياسين:لالا طالع انا وبنمر على احمد نشوفه
خيرية:ارفعله فلوس وقضيه ولد خوك ماذنبه شي ملايكه
ياسين:بدون ماتوصي يما هي تبو شي
خيرية:سلامتك في حفظ الله وليدي، اختك روحت
رانيا:ايه امس بعد رقدتي جاها راجلها توا قريب تجي
خيرية:خلي تشد حوشها وحتا انتي روحي مع راجلك بنيتي سادك من الحرج
رانيا:ساهل يما غير يروح مهند بالسلامه بعدين يصير خير
خيرية:ان شالله
في المستشفى
د:وين اهل المريض
سويلم:احنا صحابه شن فيه
د:الضربه جايه قريبه من القلب وحالته حرجة
سويلم:لاحول ولاقوة الا بالله نطلعوه برا بهي
د:تحريكه في الوضع هذا خطر كبير بلغو اهله والعمر بايد ربي ادعوله
سويلم:مانقدرش نحكي لحد انا شن بنقوللهم ولدكم بين الحيا والموت مش سادهم موت خوهم الاول
ممدوح:اعطيني رقم خوه ولا حد من نساباته
عند ياسين في حوش اهل لبنى:كيف الحال
شاهين:الحمد لله شن اخبار اهلك
ياسين:نقولو الحمد لله وخلاص
شاهين:مافيش اخبار على مهند
ياسين:لا والله كلمنا امس شويه وسكر
شاهين:ربي يطمنكم عليه تعالا احمد عمو هنا
قامه ياسين:استحشناك يامعفن
احمد:بابا
ياسين:ان شالله يروحلك بالسلامه
رن هاتفه برقم ماردش عاود ثاني
شاهين:رد خيرك
ياسين:رقم وماعندي نيه في صداع حد
شاهين:مرات خوك
ياسين:الو
لحظات وطاح من ايده الهاتف
شاهين:شن فيه خيرك باراجل
ياسين:مهند انصاب
بدي احمد يبكي:ماما
شاهين:لاحول ولاقوة الا بالله
ياسين قام هاتفه وبيطلع
شاهين:استنا بنجي معاك
ياسين:بهي غير دخله لاهلك خير مايقعد بروحه
خش شاهين يجري عطا احمد لامه
لمى:خيرك
شاهين:مهند انضرب ماحد يقول لاختك انا ماشي مع ياسين توا نكلمكم
ياسين عالهاتف:امشيلهم ياراجل واقعد معاهم
محمد:تمام
ياسين:وعيسى بيلاقيني غادي
محمد:اوك كلمني
ياسين:تمام
كانو مخططين يقعد الخبر بينهم سر لين يشوفو حاله مهند بس للاسف رنا سمعت عيسى لما يكلم في ياسين، دارتله العار لين رفعها لحوش امها
رنا تبكي:يارب مع وخي ماتحرمنا منه 😭
عيسى:ماتخلعيش امك
رنا:خليني في حالي انت كنت ناوي دس عليا
عيسى:مش هكي لكن نمشي ونشوف قبل
رنا:بهي بهي
حطها قدام الحوش ووخر طلع
خشت تبكي:ياماما مهند بيموت ويخلينا 😭😭
خيرية خبطت عاصدرها:وليدي
رانيا:خيرك شن فيه
رنا طاحت جنب امها:مهند انصاب امس اتصلو صحابه بياسين وقالوله وخي بيموت 😭 يارانيا خوك بيموت ويسيبنا بابا بيموت كيف بنعيشو بعده ياماما على من بنتسندو
خيرية:لا مهند مايموت مايخلي امه وخواته ولدي قوي
رانيا خدت هاتفها تتصل:الو وين انت
ياسين:كيف وصلت للمستشفى
رانيا:شن صار في خوك
ياسين يبكي:الضربه جاياته جيهة القلب تعبان الكبير بين الحياه والموت
نزلو دموعها وطاحت عالكرسي:نبي نجي توا وبدون نقاش
ياسين:بهي محمد جايكم قوليله يجيبك
مرو ساعات صعبه على اهل مهندوصحابه وهما متوقعين في اي لحظه يموت ويفارقهم
اما لبنى كانت في عالم ثاني مريضه وتحاول تتصل بيه
لمى:بري شوفيها ياماما والله مانقدر
ليلى ركبت للدار:بنيتي كيف حالك توا
لبنى:تعبانه ياماما معاد فيا حيل بنتقطع ومشغوله على مهند
ليلى:ادعيله
لبنى:مش ياسين بيجي اليوم شفتوه
ليلى:ايه ومشا
لبنى:شن قال عليه
ليلى:مايردش حتا عليهم
لبنى:توا نتصل بيه نسأله
ليلى:لا يابنتي ماتكلميش حد
لبنى: مستحيل مايكلمش امه نعرفه
ليلى:بس انتي في العده توا ماتجيش
لبنى:عده شنو ياماما مهند بيردني مستحيل يتخلا عليا 😭
ليلى:لاحول ولاقوة الا بالله
ياسين لما شاف الرقم فتح الخط وسمعها تبكي يحسابها عرفت:وحدي الله يالبنى باذن الله يفيق وينوض بالسلامه
انصدمت وشافت لامها اللي تبكي:شنو شن تقصد مهند شن فيه
ياسين وعا لروحه وسكر عليها
لبنى:مهند خيره
ليلى:غير قعمزي وارتاحي انتي مريضه
لبنى تعيط:خيره راجلي شن صارله مات قولولي مشا وخلاني لا ياماما مستحيل
ليلى:لا والله مامات
ركبو خواتها وبوها عاصوتها
سامي:قعمزي وادعيله بدل العياط والبكا هدا
لبنى:ارفعني ليه يابابا بالله عليك وحياتي عندك وراس حمودي ارفعني 😭
سامي:وين بنرفعك
لبنى:ليه لمهند نبي نشوفه قاعد حي ولا مات بالله عليكم بهي قولولي وين مكانه نمشي بروحي 😭😭😭
لمى:اهدي وراس وخيتي توا يشوفه شاهين ويرفعك
سامي:وين بتمشي وهوا مطلقك هبلتي
لبنى:ماطلقنيش هوا بس زعلان مني قالي مانخليكش
سامي:ربي يهدي
شدت بطنها وتتوجع:ياااربي ساعدني
ليلى:بهي نرفعوك تعايني من الصبح تتوجعي
لبنى:مانبي شي ارفعوني لراجلي بس
لمى:كلمي شاهين ياماما يجي يرفعها تشوفه شويه وتروح
"باقي الكلام عالسان لبنى"
فات الوقت وبعد المغرب جا شاهين ورفعني للمستشفى انا وماما
وصلت لقيت زحمه هلبا صحابه واقاربهم والعيله،وقفت بعيد ماقدرت نقرب ولا قادره اصلا نحكي معاهم عارفه الكل محملني ذنب حاله مهند 💔
دنيا بهزوة:شن جايه تبي بسببك مهند وصل هنا
رانيا:اسكتي وريحينا من المشاكل
رنا شافتلي نظره تمنيت الموت ومانشوفها يوم في عيون صاحبتي واختي 😭
شديت في ايد امي نحاول بس ناخد منها شويه قوه تخليني نسند طولي،تلفتت للعنايه هنا راقد قلبي وروحي وحياتي كلها يارب ماتوجع قلبي بيه يارب خود من عمري واعطيه
طلع الدكتور من عنده:ماشالله شكله الافندي احبابه هلبا،حالته بدت تتحسن الافضل تروحو ترتاحو وتفضو الممرات شويه
بدو الكل ينسحبو يروحو وانا مزال واقفه مكاني عاامل نخش نشوفه
وقفت قدامي رنا:هوا انا مش صاحبتك واقرب حد ليك
هزيت راسي ودموعي ماوقفوش
رنا:ليش درتي هكي بدون ماتحكيلي ليش توصلينا لهنا
انا:والله ماكنت قاصده هكي
رنا:انتي عارفه قداش نحبك ومتعلقه بيك بس خوي لا يالبنى، مهند بوي وسندي وظهري في الدنيا هدي لو يموت معاد نبي نشوفه وجهك ولا حتا نسمع اسمك في حياتنا
انا:بس
رنا:مانبيش نسمع منك شي
طلعو الكل ولا واحد فيهم رضا يحكي معاي او حتى يسمعني 💔 بس تفكيري كله عند مهند نبي نشوفه ولازم نخشله
كلمنا ممرضه وبعد وقت باش اقتنعت ودخلتني ليه شفته وطلعنا روحنا وانا منهارة💔
فتحت لمى:شن صار طمنونا
خديت احمد وركبت لداري ماعندي حيل نحكي مع حد
شاهين:تعالي لوجي ديري ماناكل جعان
لجين:حاضر بس شن صار في عمو مهند
شاهين:ربي يشفيه
خشت لمى للدار:نجيبلك تتعشي
انا:لا ماعنديش نيه
لمى:شن صار غادي
تنهدت وضميت احمد لحضني:نظراتهم كلهم تلوم فيا وتتهم فيا اني السبب في اللي وصله مهند، رنا قالتلي كلام وجعني في قلبي انا صح غلطت بس والله ماقصدت نوجع حد بالذات هوا حبيته من كل قلبي وتعلقت بيه هلبا يالمى 😭 مش عارفه كيف بنكمل من غيره فكره انه يطلقني وينهي زواجنا للابد مش متقبلها عقلي نموت لو يخليني مهند والله نموت 😭😭😭😭
حضنتني لمى:ان شالله خير اهدي غير يفيق بالسلامه هوا وكلميه تأسفي منه وراضيه، وهوا يحبك اكيد مايتحمل فراقك
انا:يااارب 🤲💔
مرو ايام فيهم تتحسن حاله مهند، كل يوم نمشي مع شاهين ونقعد مقعمزه بروحي بعيد عالعيله اساسا مافيه حد يحكي معاي غير عمتي بس
بعد اسبوعين نقلو مهند لغرفه عاديه وسمحو بالزياره، من الصبح نحس في روحي تعبانه وفاشله هلبا بس لازم نمشي ونشوفه غيرت لحمودي لانه بنرفعه معاي ولبست انا ونزلنا
بابا:والله اللي ديري فيه غلط وزيدي سكري راسك توا يردك الحيط
تنهدت:يابابا انا نبي نحافظ على زواجي مانبي نتشرد انا وولد بعد مالقيت سند، ولاني غلطت نبي نصلح غلطي خليني ندير الصح
بابا:براحتك
انا:شاهين هيا نمشو
طلعنا للمستشفى لقيت عمتي وياسين بس
انا:صباح الخير كيف حالكم
خيرية:صباح النور بنيتي مرحبتين بولدي الغالي تعالى
مشالها احمد يجري:نانا
خيريه:استاحشتك ياوليدي
انا:فاق مهند
خيرية:لا قاعد راقد من الدوا بري خشي شوفيه قبل يفيق او يجي حد
انا:بهي
خشيت للغرفه شفته راقد عاظهره مكان الضربه ملفوف وفيه جروح في كتفه، في ايده تغذيه قربت منه ماتوقعت روحي مشتاقتله للدرجه هدي نبي نحضنه وندخله لقلبي لايقربه حد ولا يشوفه حد هذا حبيبي ليا انا بروحي ملكي انا مانعرفش قداش وقت فات وانا نتأمل فيه، قداش مره بسته وشميت ريحته، شاده في ايده وبس نبي نعبي عيوني منه
فتح عيونه وسكرهم عده مرات
انا:حبيبي الحمد لله عالسلامة
مهند:شن ديري هنا
انا:نبي نشوفك ونطمن عليك
سحب ايده مني:اطلعي اطلعي من دخلك اصلا
انا:اسمعني مش وقته الكلام هذا توا خليني جنبك وبعد تصح نديرلك اللي تبيه
مهند:شن بديري اكثر من اللي درتيه تي اطلعي معاش نبي نشوف وجهك
انا:مانبيش نبعد مانبيش نطلع من حياتك انت راجلي وحبيبي انا ليك انت مرتك حلالك مش تحبني
دفني وقعمز :لانحبك ولا نبيك تفضلي برا
انا:لا تبيني غير زعلان مني اسفه ماتعاقبني بفراقك ارجوك بهي احمد من بيربيه منو بيوقف معاه
مهند:احمد مايستاهلش ام زيك انانيه ورح ناخده منك اصبري بس وربي نبكيك دم يالبنى واللي درتيه فيا ندمك عليه
خفت من كلامه وبعدت عليه
عيط عليا:اطلعي برا اطلعي
خشت رانيا:اشش اصواتكم واصله لاخر الممر اهدا وارتاح شن قال الدكتور
مهند:من جابها هدي
رانيا:خوها
مهند:تفضلي لو مازال تجي هنا اقسم بالله ماتلومي الا روحك وانتي زابطتني
رانيا:سمعتيه اظن
طلعت وانا خلاص مدمرة ومتحطمه من كل النواحي حتى صحتي معاد متحمله بديت نشوف في الدنيا ضباب واخر شي سمعته احمد ينادي فيا طحت من طولي ومعاد وعيت بشي
ومر اسبوع
مقعمزه عاسرير العياده واحمد قدامي يلعب:امتا طلع
لمى:ليه ايام قال شاهين
انا:المهم هوا كويس
لمي:لا الاهم انتي عاشنو ناويه توا
انا:مش عارفه خايفه مايصدقنيش
لمى:والله الدنيا معبيه دكاتره يمشي ويتأكد
انا:خايفه اخر مرة هددني ونظرته كانت جديه
لمى:امشي لامه ولا كلميهم لكن مادسيش عليه ردي بالك ساد اللي صاراخر مرة
انا:بهي
احمد:بابا
انا:بهي حبيبي توا نمشوله
رن هاتفي "عميمه"
لمى:منو
انا:عمتي
لمى:ردي عليها
فتحت الخط:ايوا
خيرية:كيف حالك بنتي
انا:الحمد لله بخير وانتي
خيرية:في نعمه
انا:كيف حال مهند
خيرية:باهي احسن هوا هدا بنكلمك عليه يبي يجي ياخد احمد
خفت واذكرت كلمه وتهديده:لا ياعميمه بالله عليك ماتاخدو مني ولدي 😢 ماليا حد غيره ارجوك قوليله ماياخده
خيرية:ماتخافيش وراس بنيتي ماياخده يبي يقعد عنده ايام بس وانا نجيبهولك
انا:توعديني
خيرية:وعد
انا:بهي نروحو للحوش ونكلمك يجي ياخده
دارولي خروج وطلعنا للحوش كلمتهم ووصل مهند بعد نص ساعه، بعتتله احمد ووقف نشوف فيه من الشباك
سلم عليه شاهين:الحمد لله عالسلامه
مهند:الله يسلمك
شاهين:شنو تحسنت
مهند:الحمد لله
طلع احمد يجري:بابا
قامه بين ايديه وحضنه:عيون بابا يافرخ استحشتك انت ودوشتك
شاهين:ماعنده سيره غيرك طول الوقت ينق
مهند:حق ولدي درت شطانه
احمد:بابا
مهند:غير امتا بتبدا تتكلم بس،هي دير باي لخالو
شاهين:بترفعه
مهند:ايه جيبلي شطنه متعه
ماكنتش نعرف انه ناوي ياخده مني ديما ويحرق قلبي عليه، معاد شفت ولدي ولا سمعت حتا صوته 💔
فات اسبوع كامل وخلاص وصلت حدي منه الساعه 12الظهر وصلت قدام حوشهم
شاهين:اللي ديري فيه غلط لكن عاخاطر ولدك بس
نزلت من السياره ومتجهه للحوش واخده قراري ولدي اهم من الكل حتى لو بنخسر مهند للابد
رنيت الجرس مره واثنين انصدمت لما فتحتلي دنيا
انا:شن ديري هنا انتي
دنيا ضحكت:شن تبي
انا: شن ديري في حوشي انتي يا واطيه
دنيا:جايه نشوف ولد خالي بما انه طلق ووحداني
دفيتها وخشيت:تشوفي قهرتك يارخيصه اطلعي برا
علا صوتنا واعصابي تلفت حسيت لبنى القديمة طلعت ثاني وكنت بنضرب لين طلع هوا
مهند:خيرك انتي وياها
انا:شن جابها هنا شنو ماصدقت طلقتني معاد لقيت مع من تتسلى
مهند:اششش صوتك مايعلاش عليا وانتي شن قلتلك
دنيا ضحكت:شنو قلت يابيبي
مهند:بلا رخص فرخات اقلبي عليا وجهك معاش نبي نشوف غبرتك قدام حوشي
طلعها وسكر الباب
انا:ماشالله والله شكله اللي دور عليه تاخده هدي
مهند:ضمي فمك بلا تلقيح نم
انا:ولدي وين
مهند:عند امي وشن جابك
انا:جيت باش نشوف وسخك وحقارتك معاها
مهند:مايصحش نمد ايدي عليك فاالزمي حدودك افضل وتفضلي برا
انا:صح غلطت بس مش للدرجه هدي زودتها رهو
مهند:برا
انا:طالعه مش من حوشك بس رح نطلع من حياتك كلها بس يكون في علمك معاش نبيك وكرهتك ورح نطلق
مهند:طلقتك غير اصبري عليا نشد صحتي ونثبته في المحكمه
ضحكت بهزوة:للاسف طلاقك باطل ياحلو لانه ولدك في بطني
قعد لحظات يشوفلي بدون ردة فعل بعدها ضحك ومسح عالحيته:لعبه جديده
ضربته عاكتفه:مش فاضيه نلعب معاك انت اللي فاضي لدرجه مكسد مع الكلبه هدي،انا حامل ومن شهرين
جبدني من وشاحي:شهرين شنو ادوي شن يعني حامل والنم اللي تاخدي فيه
انا:حملت شن بندير ربي كاتب وماكنت نعرف بروحي
مهند:اطلعي هي نمشو للمستشفى
انا:تحلم نربي في واحد ونربي زوز انا اللي معاش نبيك ولا نبي نشوف وجهك وطلقني
طلعت منه خديت ولدي وروحت بدون مانكلم حد او نرد عاحد
ثاني يوم
شادة احمد اللي يبكي من الصبح:خلااص يامامي خيرك شن تبي
أمي:بالك عنده مغص
انا:درتله كمون بس هوا ينقنق
امي:مستاحش بوه ياروحي وليدي
طارتلي:مش بوه هدا مايستاهلش حتا يكون قريبه
امي:بنتي ونعرف لسانك اشبح شن درتي للراجل خلاكم تزيدو تتعاركو
قلبت عيوني:مادرت شي بعدين طز فيه اخر همي
خش شاهين:راجلك برا قال يبي يشوف حمودي
انا:يمشي يملح
سمعت صوت بابا يكشخ:طلعي الولد خيرلك مانجيك
حطيته لأمي:ارفعيه انتي وقوليله ماديرش روحك حنين عليه ولدي مش محتاج حد بوه الله يرحمه 💔
طلعت ماما بأحمد:مرحبتين كيف حالك
مهند:اهلين عمتي شن امورك
ماما:الحمد لله في نعمه برا لبوك هي
مهند:قعمزي لوسمحتي نبي نحكي معاك
ماما:نعم ان شالله خير
مهند:لبنى حامل!
ماما:ايه ياولدي من يوم مشت لزيارتك في المستشفى وتعاركتو تعبت ورقدت في العياده اياام
مهند:ليش ماعنديش علم
ماما:وقتها كنت تعبان واهلك لاهيين بيك بعدين القرار ليها هيا
مهند:استغفر الله العظيم واتوب اليه
ماما:عارفه بنتي غلطت وغلط كبير ماينغفرش راجل غيرك كان قتلها وماحدش يقوله كيف،لانبررلها ولا نقولك عندها عذر بس توا اللي صار صار تصرفو صح ولمو هالصغيويره ماضيعوهمش وهيا عاقبها كيف ماتبي مرتك وماحد يحاسبك
مهند:انتي امها ومافيش حد غيرك بيحس بيها زي ماانا امي بس اللي حاسه بيا وبتعبي، بنتك اللي تطلبه يصير حتى اللي كنت محرمه على خواتي درتهولها ماطلبت منها شي غير الراحه والصراحه، كذا مره يصيرو بينا مشاكل ونرجع لاني يعلم الله قداش نحبها وكبيره عندي مانبيش نعاود كسرتها ثاني ولانبي ولد خوي يبعد عليا، لكن هيا ماخلتش اي سبيل للتفاهم ولا السماح بنتك كسرتني قدام نفسي
ماما:لاحول ولاقوة الا بالله عندك حق في كل شي درته وبديره
مهند:ناديهالي
جت ماما لداري:نوضي البسي شي باهي وانزلي لراجلي اياك ثم اياك تردي عليه ولا نسمعك تناقشي فيه، اقسم بالله تشوفي مني شي ماعمرك شفتيه ساد عملتك اللي درتيها
انا:شن قالك قلبك عليا
ماما:انزلي توا تعرفي بروحك
غيرت لبست سروال وبلوزه حطيت وشاح عاراسي ونزلت:السلام عليكم
وقف قدامي:وعليكم
انا:قالت ماما تبيني نعم تفضل
مهند:ليك عين اصلا تنفخي
انا:دخلكش بيا
مهند:كنت عند شيخ قبل نجي هنا قالي طلاقكم باطل طالما مرتك حامل
انا:بهي
جبدني من بلوزتي وحط يده عابطني:تعرفي ليش ربي كتب انك تحملي
انا:ليش
مهند:حتى تقعدي مربوطه بيا باقي عمرك ونعاقبك عاللي درتيه ونعيشك المر
انا:شنو 😨
دفني بشويه:بري البسي عبايتك بنمشو للدكتورة ياويلك نلقا شعره طالعه
قعدت واقفه نشوفله
مهند:وجمعي لبسك انتي واحمد بالمره لانه مروحين لحوشنا بعد العياده، نستنا في السياره
خديت حجاتي وطلعت بعد محاضره من بابا ونصائح وتهديدات ماما،واتجهنا لعياده خدينا موعد واصر يخش معاي
د:تفضلي ارتاحي عالسرير نديرلك ايكو
دارتلي جهاز وهوا واقف يتفرج
د:الف مبروك مدامتك حامل شهرين واسبوع
مهند:كيف مابانش الحمل
د:عادي يااستاذ فيه حالات مايظهرش عليها الحمل مرات للشهر الخامس
مهند:كانت تاخد في حبوب مايأثروش عالبيبي
د:لازم نديرو تحاليل توا باش نعرفو صحه الام والجنين بعدها نقررو تحتاج ادويه او لا
مهند:تقدري تعرفي الجنس توا!
د:لا جنس الجنين نحددوه بعد الشهر الرابع بس اللي باين معاي توا شي ثاني
انا:شن فيه
د:فيه كيسين حبيبتي يعني توأم
مهند:الحمد لله ❤️
درت تحاليل وعطتني فيتامينات ورجعت للحوش مع مهند
مشيت نسلم على عمتي لقيت البنات عندها
خيرية:مرحبتين
انا:كيف حالك عميمه
خيرية:الحمد لله
رانيا:شن صار تصالحتو!
مهند:لا
رانيا:مالا
مهند:حامل
رنا:شنو 😨
مهند:زي ماسمعتي جايكم حفيد جديد
رنا:الله 😍الف مبروك ني هكي سامحتك خلاص
خيرية تزغرط:مبارك ان شالله تنوضي عالخير بنيتي
انا:الله يبارك فيكم
رانيا:تعالي نهدرزو شويه
مهند:ماشي للخدمة انا ومرات بايت ارقدي هنا
انا:تمام
خشينا للدار
رانيا:ربي كاتبلك ترجعي لمهند
انا:الحمد لله
رانيا: زعلانه منك وواجعني خاطري هلبا يالولي
انا:اسفه يارنو والله ماقصدت نجرح حد منكم او نضايقكم موضوع الحبوب ماركزت فيه ابدا من لما جبت احمد بديت ناخد فيهم ومقرره يسكر سنتين ونوقفهم،فكرة اني مانبيش نحمل من مهند مش موجوده ابدا
رانيا:تحبيه!
انا:روحي فيه يارانيا اقسم بالله وحياة ولدي نحبه وتعلقت بيه هلبا لما طلقني اعتبرت نفسي متت وانتهيت لانه فراقه عندي يساوي الموت مافيش حياة بعيد عليه 💔 نبي نراضيه مستعده نديرله اي شي بس يرجعلي زي قبل الحب والاهتمام اللي عطاهولي مالقيته عند حد
رانيا:توا رجعتي ديري جهدك وراضي راجلك،معاش دسي عليه شي ولو ماقدرتيش تحكيله قوليلي
انا:حاضر
رانيا:مهند مضايق هلبا وتقريبا كسر كل الحوش
انا:ان شالله نرضيه
رانيا:اوك ديري جهدك لانه زعله صعب والمره هدي بيزودها معاك تحملي
انا:اوك
روحت للحوش ضميت ونظفت الدنيا اللي قالبها مهند طيبت عشا استنيته بس باين مش جاي مشيت للعيله وقعدت معاهم
فاتت فتره من اصعب ايام حياتي تعب حملي ومعامله مهند القاسيه، كان مهتم باحمد هلبا ومش منقص علينا شي لكن يتجاهل فيا والكلام في حدود
