#جزائي11❤️🌷الاخيرة
لبنى تبكي:شفتيه ياعميمه ماكلف خاطره حتا يقولي كيف حالك 😭
خيرية:معليشي يابنيتي مهند زعله صعب ومش بسرعه يرضا وبعدين هوا حزار هلبا انتي مفروض من الاول حكيتيله
لبنى:يعني ني غلطت لما خفت من ردة فعله
خيرية:ماغلطتيش بس هوا هكي عقليته راجلك
لبنى:😢
خيرية:غير روح هوا توا تتفاهمو ويمشي الوضع ماتزعليش
لبنى:ان شالله بنخش ندير العشا خاطرك في حاجه!
خيرية:لا ديري اللي يبيه راجلك
لبنى:حاضر
قدام محل ملابس وحقائب واقفين مجموعة سيارات تابعه لسارية مهند ومسكرين الشارع
داخل المحل ناس تتكلم ومستغربين الوضع
تالين صاحبة المحل:تفضلي
زبونه:شن فيه برا السيارات مسكرات الشارع
تالين:والله مانعلم مرات فيه مشكله او شي
زبونة:بس الشارع هدا هادي عادة
تالين:مش عارفه
درست سيارة مظلمة ونزلو منها
تالين تشوفلهم باعجاب لين خشو المحل
وقبلهم اثنين:فضولنا المكان بسرعه
مهند:السلام عليكم
تالين:كيف تلز الزباين معليشي
العسكري:الافندي مهند بيشري من المكان ومانبو حد فيه تفضلو برا الكل 😡
طلعو كل الزباين وسكرو باب المحل من برا ووقفو قدامه
تالين خافت:شن فيه
مهند:ماتخافيش حساب وبنصفوه توا
تالين:حساب شنو انتم ماتبوش تشرو
مهند:وهوا هدا محل ندخله اختي تاخد منه 😒 هه هدا مانرضاش يكون حتا حمام عندنا
تالين:شن بيني وبينكم
مهند:تكلمي كويس احسن مانطلع بروحك 😡
تالين:اسفه بس من وين تعرفني
مهند:انتي تعرفيها!
تالين:لا والله اول مرة نشوفها 😢
مهند:عرفيها بروحك
وقفت قدامها بثقه وشافتلها باستحقار:رانيا ال .... مرت محمد
مهند:اللي اتصلتي بيها مفكرة انك تهينيها وتخربيلها حوشها
تالين:انا انا ما 😢😨
مهند:انتي شنو
تالين:مش قصدي والله
مهند:انا جاي اليوم وجايب اختي باش نسمعو
تالين تبكي:اسفه
مهند عيط:تكلمي يافرخه احسن مايصير شي ثاني مايعجبكش
تالين:تعرفت على محمد لما جا هنا ياخدلك هديه لعيد ميلادك، اعجبت بيه وبطريقه حبه ليك واهتمامه لتفاصيلك خديت رقمه بحجه اني نكلمه لما توصل بضاعه جديدة وياخدلك منها. قعدنا فترة نهدرزو وحكيتله اني معجبه بيه وقتها كنتي مشغوله في وفاه خوك وهنا انا قدرت نشغل الفراغ اللي سيبتيه انتي، بس 💔
خبط عالطاولة:مش مسلسل هوا بنستناك تعيشي اللحظة 😡😡😡
تالين:كرهتك من كلامه عليك انا حبيته من قلبي تعلقت فيه هلبا وهوا قالي نحب مرتي ومستحيل نفكر نهد زواجي عاخاطرك قالي اني فتره ضعف وغلط، اصريت انه نستمرو نحكو كان كل كلامه عليك الاكل اللي تحبيه نوع اللبس الحلو الاغاني حتا المطاعم حقدت عليك ليش انتي مرتاحه وحبك محفور في قلبه حتا وقت قصرتي معاه وانا لا من حكيه عرفت انك قويه هلبا وكرامتك فوق كل شي فكرت انه لما تعرفي بعلاقتنا رح تسيبيه خديت الرقم من هاتفه بدون مايحس وكلمتك
رانيا:حقيرة وواطيه كيف يصورلك عقلك انك تخربي بيت وتشردي صغار وتاخدي منهم بوهم
تالين:نحبه نحبه وفهمت متأخر اني مستحيل نقدر نسيه فيك وناخد مكانك
ضربتها كف:تحلمي نخليهولك
تالين:انتي شن تبي مني
رانيا:ولا شي بس احتجت نتأكد انه لما خاني نزل لمستوى دنيء هلبا وزيني مستحيل يلقا
تالين:💔
مهند:الواضح فقتي من غيبوبتك ورجعلك وعيك ردي بالك تفكري ترجعي لحياة محمد حتا بالغلط بتكملي عمرك متوازية معاه يعني مستحيل تتلاقو فاهمة 😡
تالين:فهمت
مهند:اعتبريه تهديد صريح جدا المره هدي جاتك في هدرزة بستر ربي لو حاولتي تكون فيه مره جايه معناها تقولي ياموت تعالي 🙂
تالين:خلاص معاد تشوفو وجهي ابدا والله بس ماتفضحنيش بالله عليك هدا باب رزقي انا وعيلتي ولو خوتي يعرفو شي يقتلوني 😢
حطلها فلوس عالطاولة:حاشانا نقطعو برزق حد اختاريلنا لبس محترم لشغالة اختي وشدد عالجملة الاخيرة متعمد يهينها
خدو الاكياس وطلعو ركبو سيارتهم وانسحبو كل سيارات وراه
وعالمسموع الافندي مهند جايب اهله يشرو من محل تالين بس ماحد يعرف الحق
رانيا مسحت دموعها:ربي يخليك لينا وماننحرمو منك يااحلى سند في الدنيا
مهند حضنها:ليش تبكي ياحماره عرفتي وتأكدتي انه مضروب عاقلبه يحبك
رانيا:نبكي لانك ماخليتنا نحتاجو حد طول عمرنا
مهند:لاخر يوم في عمري ماتحتاجو مخلوق ولا يكسركم حد
رانيا: ربي يطول في عمرك وخي
روح للحوش خش للدار ياخد في لبس ماانتبه انها مقعمزة
لبنى:شن تبي نطلعلك
مهند:اي توته بنخش ندوش
لبنى:بهي خش توا نوتيهملك
مهند:تمام
دوش وطلع لبس:وين احمد
لبنى:قعد يلعب جنب عميمه ماباش يجي
مهند:اها بهي
لبنى:لامتا بتقعد تتجاهلني 😢
قعمز عالكرسي وخداها في حضنه:حبيبي انتي غلطي وعارفه ولا
لبنى:اي بس
مهند:مافيش بس قلتلك قبل اي شي تجي تحكيهولي حتا تافه المهم نسمع منك مش من برا
لبنى:حاضر
مهند:شن فيه اسرار ثانيه
لبنى:شي
مهند:متأكدة
لبنى:اي
مهند:خلاص صافي
حضناته:استحشتك 😢
مهند:مش زيني
لبنى:مهندي 🥺
قرب منها باسها:عيونه
لبنى:نحبك
مهند:نعم
لبنى:نحبك هلبا ماتخلينيش
مهند:وين نخليك نبدا حمار لو نبعد عليك 😍
رنا:هكي هلبا ره شن هدا بيتحكمو فينا امك وخواتك
عيسى:مادوريش حد قلهم راجلي راضي
رنا:بس انا فديت
عيسى:شن تبيني ندير بهي البنات نكشخ عليكم ونخوفهم امي شن نديرلها حبيبي على خاطري تحمليها شويه وانا ووالله مانقصر معاك وين تبي نرفعك وندهورك ومستحيل نقص عليك حاجه
رنا:بهي 😢
عيسى:نحبك وحق الله كان ماخديتك ره هبلت وندور في الشارع ونعيط نحبك يارنا يارنا 😂 اضحكي ياقلبي مانحبش نشوفك زعلانه طفلتي
رنا:نموت فيك عسوستي
عيسى:اياااه شن قلنا عليها الكلمة هدي حبي
رنا:خيرها نحبها
عيسى:معاش تقوليها
رنا:نلا بنقول واسمع بنعزم اهلي
عيسى:بهي مرحبتين بيهم نظمي امورك وقوليلي شن ناقصك نجيبهولك
رنا:اوك
ياسين راقد في داره القديمه هاتفه يرن ويعاود فاق وفتح الخط:ايوااا شنو 😨 جاي جاي
خشت خيرية:خيرك ياولد صوتك عالي
ياسين:مريم مرضت ورفعوها للمستشفى
خيرية:ياساتر يارب استنا نلبس ونجي معاك انا واختك
بعد وقت
ياسين مقعمز يبكي 💔
خيرية:الله غالب ياوليدي مش قسمكم
ياسين:كله بسببي انا ضربتها انا قتلت ولدي
خش خوها:ارتحت توا وصلت للي تبيه تفو عليك والله ماتجي راجل تتقوا عليها 😡
مهند:مش وقته الكلام هذا تطلع بالسلامه بعدين نحكو
خوها:شن هوا اللي بنحكو فيه ياافندي تي وربي لما نجرجره في الحبوس خوك وكان قدرت طلعه
مهند:بهي اللي تقدر عليه ماتقصرش فيه
صارت دوشه وكبرت المشكله
طلعت الدكتورة:هي هي وين تحسابو نفسكم
ياسين:شن صار
د:المريضه نزفت هلبا زدناها دم بس مع الاسف ماقدرنا نلحقو البيبي
خيرية:لاحول ولاقوة الا بالله
خوها:نبي تكتبيلي تقرير انه اختي اجهضت بسبب الضرب والتعذيب باش نحبسه الكلب هدا
د:من قال اختك اجهضت بسبب ضرب
خوها:مالا شنو
د:اولا مافيش اي اثر لتعذيب عليها ثانيه المريضه واخده كميه اعشاب ضر بالحامل والواضح انه ليها فتره تاخد فيهم وغرضها تجهض وصار اللي تبيه
ياسين:شنو 😨 يعني هيا قتلت ولدنا عمدا
د:اسفه جدا اني نقلت الخبر هدا ليكم بس انا دكتورة ومهنتي ماتسمحلي نتكتم عالحقيقه كتبت التقرير وبكرة تستلموه الحمد لله عاسلامتها وياريت تلتزمو بالهدوء
اهل مريم انصدمو بالخبر ومعاد عرفو شن يقولو بعد ماكانو يتهمو في ياسين انه السبب
مهند:هي نوضو معاش فيه داعي نقعدو هنا
ياسين:لحظة نبي نخش نشوفها
مهند:تمام
خش للغرفه اللي راقده فيها لقاها فايقه
قعمز قدامها:وصلتي للي تبيه
مريم:شنو
ياسين:قتلتي اخر خيط كان رابطنا
مريم:انت السبب
ياسين:مش مهم مش جاي نسمعك ولا نبيك تبرري حرقتي قلبي عليه بس ربي يحاسبك هلبا عليك حتى الكلام انتي
مريم:شن تبي مني
ياسين:انتي طالق طالق طالق حسبي الله ونعم الوكيل فيك
رجعو للحوش وغيمه حزن سيطرت عالكل 💔
ياسين:خلاص ماتقعدوش متنكدين مشت بسوها انا كنت مقرر بنطلقها من فتره بس مهند مانعني عاخاطر البيبي واهو نصيبنا مانشوفوه بكل
خيرية:يعوضك الله خير
ياسين:ان شالله انسو خلاص صفحه وسكرناها دورولي مرا
رانيا:شنو
ياسين:بنتزوج شن مالا بنزعل عليها ولا بنعيش على ذكرياتها تي هيا مكرهتني في حياتي
خيرية:حاضر ماتكون الا راضي وليدي
ياسين:نبيك انتي تختاريلي ياامي جربت اختياري وطلع معفن
خيرية:بهي ان شالله
رن الجرس
رانيا فتحت:نعم
محمد:السلام عليكم
رانيا:وعليكم
محمد:شنو نقلب وجهي مافيش حتا تفضل بالكدب
رانيا:مانحبش نكدب 🙄
محمد:استاحشتك ☹️
رانيا:بهي
محمد:تعالي نطلعو نحكو برا
رانيا:لا
محمد:عاخاطري حبيبي
طلع مهند:اهلين
محمد:كيف الحال
مهند:بخير خش خيرك واقف عالباب
محمد:الحق جاي بنطلع رانيا شويه نبي نهدرز معاها
مهند:بري غيري
رانيا:مانبيش
مهند:مانبيش نعاوده الكلام
رانيا:اففف
محمد:صحيت انا والله غلطت ونبي نصلح غلطي
مهند:اختي دماغها مسكر وبتعبك اصبر وخلاص
محمد:نصبر ماعنديش مشكله بس تروح معاي
مهند:هدي مانعطيك فيها كلمه تروح معاك امتا ترتاح هيا انت وجهدك معاها
محمد:ان شالله خير
طلعت رانيا:واتية
محمد:تفضلي هيا سلام
مهند:في حفظ الله
اتجه لحوشه وين مالقا لبنى تبكي وشبه منهارة:خيرك حبيبتي
لبنى:شي
مهند:كيف شي شوفي روحك كيف تبكي وجسمك كله يرجف شن فيه اهلك فيهم شي
لبنى:لا 😢
مهند:مالا!
لبنى:بس زعلت على مريم 💔
مهند:هيا اللي دارت هكي بايدها وكأنها تبي توصل للنتيجه هدي هالمرا من يوم خشت العيله ومش ناويه طيب الحمد لله جت عاهكي وبس مشت في حالها
لبنى:بس هيا تحب ياسين
مهند:اللي يحب مايأذيش ابدا،ولا يفكر يجرح حبيبه حتا بكلمه هيا كانت راسمه في بالها حياة ولما مالقتها دارت جهدها انه تهد كل شي وتمشي ووصلت للي تبيه
لبنى:ياسين مش رح يسامحها صح!
مهند:الله اعلم
لبنى:نحبك اني هلبا
مهند:كان نفهم شن صايرلك بس
لبنى:شي خليك جنبي بس
دنيا في المستشفى:انتي كيف ديري عمله زي هدي ياغبيه
مريم:معاد نبيه خلاص 😢 ضحيت بولدي المهم يخليني في حالي
دنيا:وليش واخداته من الاول
مريم:لانه اختي قالت عليهم عيله فلوس ونبي نعيش نسافر ونصرف فلوسه
دنيا:توقعتيه اهبل وبيدلعك عاحساب كل عيلته، ولا تحلمي ياسين روحه في مهند هوا اللي مربيه يعني لما توقفي في اختيار مقابل خوه يمسحك بدون مايرفله جفن
مريم:خلاص طلقني وتمت
دنيا:وانا كيف بنجيب اخبار لبنى ياذكية
مريم:مانعرفش اصلا حتا لما كنت بنقوي علاقتي بيها ماوثقتش فيا ياعزيزتي لبنى مش سهله ابدا
دنيا:على روحها مش عليا ورح يطلقها مهند
رنا:علاش هكي حظي من دون الناس ☹️
ياسين:خيره حظك ياحماره واخده حبيب القلب من زيك
رنا:بس من يوم تزوجت وحياتنا تعبت مشاكل
ياسين:الحمد لله اختبار من ربي ولااعتراض عليه
رنا:ربي يعوضك خير
ياسين:ان شالله توا انتي كل يومين منقزتلنا هنا شن تبي تي شدي حوشك ياهم
رنا:كنت جايه بنقلكم دايره عزومة غدوة
خيرية:مش وقته يابنيتي
ياسين:علاش شن عندنا امي وراسك ماتنكدي على روحك خلينا نعيشو حياتنا كان بنقعدو حازنين خلاص نموتو
رنا:حق ياماما خلاص تعالو غدوة غيرو جو وهدرزي مع عزوزتي اعود بالله منها
ياسين:تحشمي يافرخه
رنا:ووين اختك روحت!
ياسين:قعدا مشحطاته محمد مسكين ربي يكون في عونه رضت عليه اليوم وطلعت معاه
رنا:ربي يهديهم
ياسين:شن بتغدينا
رنا:عمتي بطيب بازين اكيد
ياسين:نوضي اقلبي وجهك فرخه بايرة علاش مزوجينك باش طيب عزوزك
رنا:اففف دخلكش فيا زوزي راضي
في مكان ثاني مطعم
محمد:انتي مااعطيتيني فرصه تسمعيني
رانيا:شن بنسمع شفت ساد
محمد:بس انا والله نحبك حتى لما كنت نكلم فيها نحكيلها عليك وعلى حبنا وعيلتنا
رانيا:المعنى
محمد:يعني ماكلمتها لاني حبيتها او خنتك معاها اقسم بالله مافكرت نديرها بس هكي غلطة جت في لحظه فراغ كلمتني هدرزنا فتره وبعدها سحبت منها
رانيا:اه نفهم انه كل فترة فراغ بدور وحده تهدرز معاها وتفوت وقتك
محمد:لا وراس صغارنا معاد تتعاود خودي باسورد الهاتف والحسابات وكل شي بس ارجعيلي رانيا بدونك ولا شي، نسيتي قداش تعذبت باش خوك وافق عليا نسيتي كيف نستنا فيك كل يوم قدام الجامعه انتي حب حياتي مستحيل نبدلك بولا بنت
رانيا:امم
محمد:بهي شن يرضيك وانا نديره
رانيا:نبيش شي
محمد:ارجعو للحوش
رانيا:الصغار ليهم كم يوم عندك
محمد:قاعدين عند امي نبيك انتي تنوري حوشك
رانيا:نفكر
محمد:ماتعذبينيش مستاحشك
رانيا:ان شالله خير هيا روح بيا
محمد:ماكليتي شي
رانيا:ماعنديش نيه
محمد:هيا حبيبي عاخاطري نوكلك انا
ضحكت رانيا وارتاحت لانه محمد متمسك بيها ويحبها مش مفوت فرصه الا ويذكرها قداش حبها متعمق في قلبه
فاتو ايام بدون احداث
يوم السبت الساعه 12مساء متجمعين في حوش رنا
رانيا تهمس:عزوزتك ماتفصلش بكل
رنا:ابدا طول الوقت تهدرز وتقصقص
لبنى:مابعدك
رنا:مش عاطيتها وجه
رانيا:احسن وين راجلك ماجاش قاعد
لبنى:رافع حمودة للحلاق
رنا:شن مافيش حويجه 😉
لبنى:حاجه شنو
رانيا:بيبي
لبنى توترت:لالا مزال خيركم مستعجلين
رنا:نبو نشوفو خلفتك انتي ومهند
لبنى:حمودي قاعد صغير
رانيا:صغير شنو سنتين ماشالله قريب يسكرهم يمشي ويتكلم وفطمتيه من زمان ماعندكش اي مانع تحملي توا
لبنى:ربي يرزق
رنا:ان شالله
رن الجرس
رنا:هدا اكيد مهند افتحيله لولي
احمد:ماما 😭😭
لبنى فتحت الباب:خيره
مهند:انا كشخت عليه
لبنى:علاش
مهند:عارف روحه شن دار
لبنى:شنو عارف روحه قصدي صغير بتبدا من توا تعيط عليه وتضربه
مهند:ولدي وبنربيه كيف نبي ماتدخليش
خدت منه احمد وخشت تنفخ
مهند:السلام عليكم
رنا:مرحبتين بغاليا
مهند:اشيه درنا حوش وبدينا نستقبلو في الناس
رنا:شن رايك
مهند:فرخه قعدا
رنا:بارد هيا خش الناس جعانه
رانيا:خيره ولدك وهوا كان فتح فمه معاش يسكت
لبنى:نعرفش مهند كشخ عليه
رانيا:اممم داير عمله معناها حبيب عميمه تعالا
لبنى:هدا صوت عمتك
رانيا:ايه ان شالله مش معاها العقرب بنتها
خشت رنا:هيا ياحلوات اخبزو البازين
لبنى:وانتي شن وظيفتك
رنا:نوتي السفر 🙂
رانيا:بالاسم العزمة عندها كلبه انتي كيف دايره لراجلك
خشت اخت عيسى:شايفها ومش مصدق عنده رنا واقطع الخبر طول الوقت سرحان فيها زي الاهبل
رنا:خمسه وخميسه 🖐️
دنيا:خير ياعيله
فات باقي اليوم حلو تغدو وهدرزو وقضو ساعات جميله ❤️
مهند طلع:هيا لبنى
رن هاتفها:شويه بس نلبس عبايتي
خشت للدار تتكلم في ظنها انها بروحها بس الله اعلم من سمع حديثها كله بالحرف 🤷🏼♀️
مر اسبوع عالجمعه هدي وجي يوم انقلبت فيه كل الموازين
مقعمزة لبنى توكل في احمد وتهدرز مع رانيا لين
خش مهند وقربع الباب بقوة:لبنى 😡
رانيا:بسم الله خيرك
مهند:خودي احمد وبري لحوشكم
لبنى خافت:شن فيه
مهند:سمعتيني ولا
رانيا:غير اهدا انت شن صاير معاك
قلب الطاولة وحدف هاتفه:قتلك خودي الفرخ وبري ماتخلينيش نقتل امكم كلكم 😡😡
لبنى:خلاص امشي
طلعت رانيا وخلتهم
لبنى:شن فيه حبيبي
خنقها وقربها منه:هوا سؤال واحد تجاوبي ومانبيش نعاوده 😡
لبنى:اا خيرك سيبني
مهند:جواااب بس
لبنى:شنو
مهند:تاخدي في حبوب منع حمل
حس برعشتها بين ايديه ودموعها نزلو
لبنى:انا 😢
مهند:يعني تاخدي
لبنى:مهند بتقتلني😭
طلع من جيبه شريط وحدفه عليها:علااااش 💔
لبنى تبكي:ولدي صغير مانبيش نحمل لين يكبر
مهند:سألتك مليون مره شن داسه عليا ولا 😡😡
لبنى:هدا موضوع يخصني بعدين انا ناخد فيهم من لما جبت احمد وبعلم حسام
جبدها من شعرها:شن علاقتي بحسام انا راجلك انا نبي صغار ولا انتي اكتفيتي بولد من حبيب القلب
لبنى:شن تقول انت انجنيت 😢
مهند:وتكذبي عليا نحبك ونبيك وماتخلينيش لا ممثله ماشالله
لبنى:والله ماكذبت عليك في حاجه مهند نحبك بجديات
خيرية تخبط عالباب:افتحيلي ياولد شن دير
مهند:قتلك قبل اللي يحب مايأذيش وانتي كسرتيني يالبنى
فتح الباب وطلع
لبنى تعيط:مهند ماتخلينيش مهند والله مانكذب عليك 😭😭
شدتها رانيا:اسكتي يالولي خلاص مشا هوا
لبنى:لاااا خليني نلحقه بنمشي نكلمه هوا ماسمعنيش
رانيا:توا يجي وتكلميه اهدي
لبنى:لا توا نبي نكلمه 😭 مهند
خيريه:بسم الله عليك يابنيتي شن جاكم
لبنى حضنتها ومنهارة:كلميه ياعميمه يجي بالله عليك قوليله والله نحبه انا
خيريه:حاضر غير اسكتي واهدي
لبنى:مهند 😢
رانيا:خيركم بهي شن فيه
ماقدرتش تحكي شي استمرت عانفس الحال ساعات
كلمو رنا عاامل تقدر تهديها بس بدون فايده
لبنى تبكي:ياربي ساعدني 😢
رنا:اهدي وراس حمودي
لبنى:مش قادره المره هدي مستحيل يسامحني
رنا:ليش شن صار ماحكيتي لحد قوليلي انا بلكي نقدر ندخل ونكلمه
لبنى:مستحيل ماحد يقدر يدخل النظره اللي شفتها في عيونه اليوم تأكدت اني خسرت مهند خسرته للابد 💔😭
الساعه 11الليل
"عالسان لبنى"
تقوت المطر بشكل كبير صنعت غدران وبرك في وقت بسيط
واقفه في الجنان نتفرج ودموعي ماوقفوش زي المطر هدي ويمكن اقوى،ماحسيتش بيه امتا جي ووقف جنبي
نفخ دخانه وحدفه قدامي:جابنا النصيب لبعضنا بطريقة حقييرة للنم لكن، حبيتك وربي يشهد عليا
شفتله وفي عقلي الف فكرة:بهي
ابتسم وواضح انه مخنوق،مد يده مسحلي دموعي وقال اللي شق قلبي نصين:انتي طالق لبنى.......يتبع
مش هدي النهاية ماتخافوش 😁 تصبيره لحد مانكمل الحلقة
واسفه عالتأخير، و للناس اللي راسلوني ومارديت عليهم
