#جزائي9 ❤️🌷
ياسين:تي هيا الغدا يافرخه
خيرية:تكلم باهي مع اختك وخيره ماتتغداش في حوشك
ياسين:شن تلزي يما
خيرية:لا لزيتك ولا متعلمه نلز فيكم سألتك
ياسين:مريم تتوحم وكارهه التطييب
رنا حطت السفره:شورخ زايد المشاكل وطوله اللسان فالحه فيها
ياسين:ضمي فمك خيرلك واحمدي ربي خوك شادني عليكم انتي والكلب التاني
رنا:اففف
خيرية:خلاص كل ماتجي بتفتح الموضوع فضها السيره عيسى توا بيبدا نسيبكم
ياسين:نسيبي محمد مانعرفش غيره
رنا:براحتك 🤷♀️
خيرية:اسكتو ريحوني
ياسين:نشوف في سياره مهند
رنا:اي بكري وصل
ياسين:خش طول للمدام ياعيني
خيرية:كل واحد حر في حياته باهي غير اللي طاوعنا وتزوج هوا الحمد لله تهنيت عليه
رنا:وحتا لولي ماشالله عليها بنت ناس 😒
ياسين:تشري في طبخه انتي
رنا:مهند قالك ماتحطش ايدك عليها
ياسين:من شادني عليك انا غير مهند
في حوش عصافير الحب الحلوين 😍
مقعز يدخن ويتفرج عليها راقده بعمق كأنه ليها ايام مش ضايقه طعم النوم
رن هاتفه فيقها
مهند:ايوا.......تم توا نكلمك بعدين
لبنى:ازعاج هاتفك 😥
قاملها شعرها من عاوجها:صحه النوم
لبنى:سلمك
مهند:رقدتي كويس
اتكت عاكتفه:اممم وانت جنبي ليا ايااام محرومه من الريحه هدي
مهند:عمايلك
لبنى:قاعد زعلان مني 🥺
مهند:بعد اللي صار لا 🤤
لبنى: 🫣🤫
مهند:😂😂
لبنى:خلااص
مهند:سكتت نحبك
لبنى:خليني نحبك حتا ني
مهند:توا تحبيني علاش مستعجله وين احمد
لبنى:رفعه شاهين
مهند:اها شن الحنه والحركات المليحه هدي
لبنى:نعرفش كيف بس رانيا قالتلي رح يروح غدوة
مهند:كلبه
لبنى:قلتلها انت
مهند:لا
لبنى:مالا كيف عرفت انا سمعت المكالمه كلها
مهند:اممم متفقين صار
لبنى:كنت مستاحشاتك وماتردش عليا اتصلت هيا 💔
مهند:مادسيش عليا شي اي حاجه تصير مهما كانت تافهه احكيها
لبنى:حاضر
مهند:خلاص ماتزعليش ياستي حقك علينا نعوضك
لبنى:وعد
مهند:وعد ياروحي
لبنى:باه
مهند:نوضي به
لبنى:وين
مهند:شعرك مبلول جففيه وديريلي ماناكل جعان
لبنى:اوك
مهند:ندوش ونجي باش نمشو لامي جيتك هنا طول
لبنى:بهي
جهزت السفرة وكلمت خوها اطمنت عاولدها
حضنها مهند:مستاحشك
لبنى:حتا انا والله
قامها عالطاوله:ومش مصدق اللي صار بينا قبل شوي
تحشمت واطت راسها:امم
مهند:اوقات نحس روحي في حلم يعني هاداكا اللقاء الاول لما قلبي دق بقوه وخديتيه مني فات وبديتي مرتي حلالي حقي انا وبس
لبنى:احنا نصيب بعض من الاول كله ربي مرتبه وانت حطيت كل حمولك وهمومك عليه وهوا عطاك اللي تمنيته
مهند:انتي مش شي عادي في حياتي ولا عمرك حاتكوني عادي ربي بعتك ليا جزاء عاكل شي كويس درته انتي #جزائي حبيبي
حضناته:ربي يخليك ليا
مهند:امين يارب العالمين
لبنى:تعالا كول اكيد استحشت ماكلتي
مهند:هلبا
لبنى:نغير ونجي باش نمشو
مهند:تعالي هنا انتي مريضه! 🤨
لبنى ضحكت:لا
مهند:ضحكتو عليا يعني
لبنى:تخطيط رنو
مهند:تي ماشي مردود
لبنى:شن علاقتي انا
مهند:نتحاسبو
لبنى:مظلومة 🥺
مهند:بري البسي ونحي تيشرت متعي خير مايصير كلام ثاني
لبنى:بهي 😂
مهند:خوك امتا بيجيب احمد
لبنى:لااعلم
مهند:نمشو نروحو بيه بعدين ومنه نشوف اهلك ليا وقت عليهم توا يقولو نسيب معفن لايدور لايسأل
لبنى:عادي ومش ناوي تسامح اختك
مهند:يصير خير
غير وطلعو لحوش العيله
خيرية:مرحبتين ببكري الغالي
مهند:كيف حالك ياغاليه
خيرية:ناقصتني شوفتك وليدي
مهند:سامحيني يما ديما قاطع قلبك
خيرية:ندعيلك وقلبي راضي عليك ياكبدي غير ترد بالك من مرتك وولدك
مهند:في عيوني
رنا:وانا 😢
شفشفلها شعرها:بنتي الصغيرونه كبرت وبتتزوج
رنا:معاش نبي خلوني معاكم هنا 😭
مهند:هيي كان نرفض توا نصبحو في موال ويطلع عيسى هوا عيلتك
رنا: 😂
خش ياسين:اووو الكبير الحمد لله عالسلامة
مهند:الله يسلمك
مريم:الحمد لله عاسلامتك
مهند:تسلمي
ياسين:قعدت نستنا فيك طولت في حوشك 🙂
مهند:بالك تتحشم امك معانا ولا تبي نخليكم فروخ زابط انت الحشم مش متواجد عندي
ياسين:سكتنا 😂
خيرية:قلال حيا
مهند:قعدين متقاطعين
ياسين:ومن يقدر يقاطعها هدي الملسنه
مهند:وحتا نسيبك افتح صفحه جديده الراجل ممتاز
ياسين:ساهل
مريم في خاطرها تقول "تصالحو وكل اللي درته راح مهند بجديات زي مايحكو عليه شاد العيله كل ومش سامح لحد يخش بينهم، يعني مفروض ضربتي الجايه تكون من ناحيته هوا. عهد عليا نهدمها هالعلاقه الحلوة ونخليكم تكرهو لبنى اللي شادين فيها "
stoop ✋
عرفتوهم الناس امثال مريم الحقوده الحسوده بدون اي سبب، متواجدين في حياتنا كلنا هكي فجأه بدون سابق انذار تلقي وحده كارهاتك وحاسداتك في دم وجهك، وانتي اصلا انسانه عاديه جدا ماعندكش شي زياده عالناس راس مالك ضحكتك
بجد الناس هادو ياريت ينقرضو لانه الحياه مش ناقصتكم اساسا ندفو فيها ومش ماشيه تزيدوها انتم علينا علاش 🤷♀️
نرجعو للرواية
خيرية:الجمعه عازمتنا عمتكم عالمزرعه
ياسين:شن المناسبه
خيرية:قالت لينا فتره ماتجمعنا وعازمة العيله كلها
ياسين:بهي كويس نمشو نغيرو جو ليا وقت عالفرس
رنا:حتا انا نبي نغير جوي لكن دنيا الهم
مهند:تجاهليها وخليك في حالك
رنا:خلي نكلم رانيا تجي باش تمشي معاي
مهند:بتلصق!
رنا:ياعيني 😂
خيرية:وانتي بنتي
مهند:لا لبنى مش ماشيه
خيرية:علاش خيرها وانت قررت بدلها ولا شنو
مهند:ايه مش مرتي انا بنقررلها
خيرية:ومرات هيا خاطرها تمشي
مهند شافلها:خاطرك!
لبنى:احم لاعادي نقعد معاك
مهند:ها اهيا تبي تقعد يما
خيرية:فنصت فيها لكن براحتكم انتم شنو
مريم:ماشيين
رنا:تبيك اختك
خدا الهاتف:اهلا
رانيا:الحمد لله عالسلامة
مهند:عندي مشوار المغرب وبنمر عليك
رانيا:تنورني غاليا
مهند:تم هي توا نهدرزو
رنا:شن عندكم اسرار
مهند:قلتي اسرار وتبي تعرفيها ثاني
لبنى:فضول
مهند:مش باهي الساعه كم
رنا:3
مهند:بنمشي نرقد شويه بتقعدي هنا!
لبنى:جايه معاك
رنا:الصقي 😂
لبنى:خزي ياحيوانه
مهند:اااخ نحس في روحي متكسر
لبنى سكرت الباب:نديرلك مساج
مهند:تعالي هنا قبل المساج قوليلي
لبنى:شنو
مهند:زعلتي لاني قتلك مافيش مشي
لبنى:ابدا بالعكس انقضتني لانه مانبيش نرد عميمه ونقلها لا وفي نفس الوقت بنت عمتك هادي مانرتاحلها بكل وكان نلقا نبعد عليها
مهند:هدا السبب نبيك تبعدي عليها دنيا طيره شر وماتخافش وانا ماعنديش دماغ للمشاكل نبي نرتاح بس معاك انتي واحمد
لبنى:حاضر
مهند:هيا توا مسجيني
لبنى:دقيقه بس نجيب الكريم
دنيا:حلو هكي كل شي جاهز
عربيه:ربي يهديك يابنتي ديري رقبه في رقبتك وتركبي روحك الحرام علاش حسام الله يرحمه وتوا يجيك نصيبك
دتيا:هيا السبب هيا قتلاته ورح نحرقلها قلبها على ولدها ونرد حق حبيبي اللي حرمتني منه جهزيلي روحك بس يالبنى
عربيه هزت راسها بياس من تصرفات بنتها
الساعه 7
مهند واقف عالمرايا:ترا مديلي الطاقيه البيضا
لبنى:علاش بتلبس طاقيه
مهند:صقعان شكلي بنمرض
لبنى:بهي البس التوب متعك حتا لبسك خفيف
مهند:لالا بهي هكي واتيه انتي
لبنى:ايه
مهند:ساوي وشاحك معاش نبي نعاودها الجمله هدي شعره برا لا
لبنى:بهي
طلعو متجهين لحوش اهلها
لبنى:شكله عندهم حد فيه كنادر غريبات
مهند:خلاص خشي وناديلي شاهين للمربوعه
فتحت لمى:لولي 😍 استاحشناك ياكلبه
لبنى:ني اكثر كيف حالكم
لمى:خشي شوفي من عندنا
لبنى انصدمت اول ماخشت للصاله:اا السلام عليكم
عماد:الله عالحظ تلاقيت مع لولي
سلمت عليهم وقعمزت:شاهين مهند برا
سامي:نوض دخل راجل اختك مش براني
خش مهند قعمز:كيف حالكم ياعيله
احمد:بابا بابا
مهند:مرحبتين بولدي
عماد:سبحان الله قداش الوقت يجري من قال لولي تتزوج وعندها وليد
مهند شافله برفعه حاجب
عماد:تعرف يااخ شن اسمك زمان كانت متسميه عليا الكل عارفين لولي لعماد بس ربي كاتبها لغيري
لبنى:حي عليا سكتوه لحمار هدا
لمى:غدوة جنازتك 😂
مهند:نوضي ديريلي قهوة راسي مصدع
انسحبت لبنى ووراها امها وخواتها
عماد:شن تشتغل حضرتك
مهند:ضابط وامر ساريه
عماد:بلطجه ولا شغلك الاساسي
مهند بدت اعصابه تتلف:قلنا ضابط
عماد:واحمد ولدك ولا ولد المرحوم
مهند:بوه الله يرحمه وتوا ولدي انا
عماد:نستنو بالك دور الدنيا وتترمل لولي تاني ونكون انا رقم 3 😂😂
سامي حاول يدارك الموقف:بعيد الشر خيرك تفاول ربي يطول في عمره
مهند:الاعمار بيد الله ماتفكرش المره هدي لو ربي خدي امانته ناوي نرفعها معاي
عماد:شنو كبدت حتا انت 😂
مهند وقف وتكلم بصوت عالي:لبنى جيبي ولدك والحقيني للسياره
لبنى:وووه ياماما خايفه مانبيش نروح
ليلى:بلا هبال شن بيديرلك راجلك
لبنى:ماتعرفيشي لما يتعصب انتي
لمى:انتي هاتتنفخي 😂 ولد عمك طينها
لبنى:كان قتلني ماتسكتوش على حقي وجرجروه في الحبوس 😢
احمد:بابا
لبنى:اهو بنمشو ربي معانا حمودي
لمى:مع السلامه ياشهيدة
عماد:لولي تعالي بنقولك
لبنى:والنبي فوتني خدت شنطتها وطلعت
ركبت وهيا خايفه مهند ولع السياره وطلع بسرعه
احمد يمد في ايديه يبي يمشيله:بابا
لبنى:اششش حبيبي بابا يسوق
مهند:هاتيه
لبنى:بالك يضايقك
مهند:هاتيه قتلك
لبنى:طايرتلك مني!
مهند:عندنا حوش نحكو فيه ومش قدام الولد
لبنى:تمام
وصلو قدام الحوش
مهند:انزلو هي
لبنى:وانت
مهند:بنمشي لرانيا
لبنى:بهي انزل شويه
مهند:توا نروح ونتفاهمو ساهل
لبنى:بهي ماتعطلش
مهند:تم نلقاك في الحوش ماتطلعيش
لبنى:حاضر
مهند:ناقصكم شي
لبنى:لالا
وخر سيارته وطلع
طلعت رنا:ماعطلتوش خيركم
لبنى:تسمعي بيه قليل البخت
رنا ضحكت:طلعلك العظم في الريه 😂😂😂
لبنى:طلع
رنا:خشي احكيلي ونديرو قهوة
لبنى:لالا فكيني خوك قالي مشوار رانيا وجاي ماتطلعيش
رنا:اه بهي حتا غدوة الصبح نتلاقو
لبنى:تمام
خشت للحوش حطت ولدها راقد وطلعت لبسها بتغير وخايفه من مهند
رانيا:مرحبتين بغاليا استحشتك
حضنها وباس راسها:كيف حالك
رانيا: كويسه بشوفتك وخي ماننحرم منك يارب
مهند:وين الصغار مالا
رانيا:في حوش حناهم توا يجو
طلع محمد:اهلين نسيب
مهند:مرحب شن الامور
محمد:بخير والله وين ياراجل بديت زي هلال العيد معاش ملحقين عليك
مهند:مشاغل
محمد:حتا ربطوك بمرا قاعد تغطس
مهند:اهو نحاولو ننتظمو
محمد:ربي يعاونك
مهند:شن دايره معاك القردة هدي
محمد:ياودي الله يبارك فيكم على هالربايه بنت اصول
مهند:ربي يخليكم لبعض
محمد:امين هيا نستأذنكم خود راحتك
مهند:منور
رانيا:خيرك متكنطي الحواجب مقرونات
مهند:خلي الموضوع هدا عاجنب شن معريتني تعرايه مليحه قدام لبنى
رانيا:😂😂😂والله ماصارها عيب عاد انا صندوقك الاسود
مهند:لقيتها تستنا
رانيا:لو شفتها شن صاير فيها لما سيبتها انت بروحك تسخف عليها المرا ليل نهار عالدموع هيا وولدها تعلقو بيك زي الصغار انت احتويتهم ودرتلهم ملجأ في وقت كانت لبنى منتهيه
مهند:انتي تعرفي قداش نحبها
رانيا:صدقني وحتا هيا رح تحبك اكثر منك، بس اختفائك هدا تمشي وتسيب في كل شي يخلي فيها تدمر وتخاف بروحها بعد ماعطيتها الامان
مهند: عارفه اعصابي انا نهرب منها باش مانغلطش
رانيا:حاول تسيطر قرب منها هدي مرتك سترك وغطاك اما موضوع انك تقعد هكي تلم لبسك وتمشي رهو علاقتكم عمرها ماتتقوا وهيا بتتعود على جفاك
مهند:افففف موضوع والله خايف في يوم تكبر بينا ونغلط معاها عارفتيني لما نفصل
رانيا:توا تتعود وتهديك هيا غير تقربو
حول طاقيته حدفها عليها:ياخرا اللي في دماغك وتبيه ومجهزتله صار
رانيا:قول والله 😍
مهند:متعود نكذب عليك ياكلبه
رانيا:اخيرا 👏
مهند:هبله
رانيا:وخيرك مخليها وجاي توا
مهند:رفعتها لأهلها انحرق دمي روحت بيها وجيت بروحي
رانيا:علاش
مهند:لقيت ولد عمها غادي يبيها الكلب وقعد ينبح في دوه اخييي للنم
رانيا:احنا بنغار 😂😂
مهند:بتضمي فمك ولا تنضربي
رانيا:خلاص سكتت بهي هيا شن ذنبها طارتلك منها
مهند:ماتحملتش الزح مانبيش حد يشوفلها بنرد غيضي فيها قلت نطلع شويه ونروحلها
رانيا:ماتقدرش على بعدها
مهند: 😒
رانيا:ربي يخليكم لبعض
مهند:ان شالله مدي القهوة صقعت
رانيا:تفضل غزيلي
مهند:بتمشي معاهم لعمتك
رانيا:ايه
مهند:كويس ردي بالك وافتحي عيونك
رانيا:ماتوصيش بتمشي انت ومرتك
مهند:لا بننفرد بيها شويه
رانيا:حليلي عالمنفردين
مهند:هي بنتوكل انا
رانيا:خليك ندير عشا
مهند:اياح هالدراع
رانيا:خزي والله بديت نطيب
مهند:مش عارفه كيف صابر محمد
رانيا:يحبني ميت فيا
مهند:مش صافي الراجل
رانيا:بارد
مهند:توصي شي
رانيا:سلامتك ياغالي ماننحرم من طلتك عليا
مهند:بوسيلي الصغار
رانيا:يوصل سلم على لولي وحموده
مهند:ان شالله خشي واتصلي براجلك يجي
رانيا:اوك
فتح حوشه وخش يشوف للمكتبه والممرات معبيات غبره المطبخ ماعين والصاله حايسه:اففف خرابه مريم مريم
خش لدار النوم لقاها راقده دفها بقووة
مريم:ها خيرك خلعتني
ياسين:تي شن الحاله هدي تقول عايش في مكب طول النهار راقده نوضي ضمي حوشك
مريم:حبيبي والله ماقادره نتحمل تعبانه ونقرب اي حاجه طول نستفرغ
ياسين:اياااه اول ولا اخر وحده تحمل
مريم:نتوحم بهي
ياسين:تتوحمي عالخمر تي الحوش اندفن بالغبره يجينا حد يضحك علينا قرفت نروحله لاماكله لا هدمه نظيفه لامكان نقعمز فيه يفتح النفس حتا لبس الحوش نرفع فيه للمغسلة
مريم:تحملني حبيبي هالشهور
ياسين:مافهمتاش انا وحم من اول ماطلعتي حامل هوا كل يوم ناكل مع العيله حتا امي لقحت عليا
مريم:اهلك عادي
ياسين:زمري انا نخرف يمين وهيا تقولي يسار تي تحركي ضميه الخارب هوا طالع ونروح مانلقاشي حوش محترم بايته عند بوك اهو قلتلك
مريم:شنو
ياسين:وديري رايك طلع وقربع الباب
قابله مهند نازل من سيارته:خيرك تقربع في الباب
ياسين:كاره عيشتي فوتني
مهند:تعالا هنا نكلم فيك
ياسين:شنو
مهند:تعشيت
ياسين:وين نحصله العشا بطني تليفت من الماكله في القهاوي
مهند:هيا تعالا نتعشو ونهدرزو
ياسين:فوته ياراجل مانبيش نثقل عليهم
مهند:امشي قدامي بلا جو برانيه خش للمربوعه نغير وجايك
ياسين:تمام
مهند:لبنى
طلعت حضناته:عطلت
مهند:امم خدتنا الهدرزة
لبنى:استحشتك
مهند:اهووجيتك
لبنى:هي خش غير وتعالا نفتحو فيلم
مهند:ياسين في المربوعه نبو عشا
لبنى:اه بهي حاضر
خش لبس توته وطلع:طيبي مانبيش خفيف
لبنى:بهي تعالا شوف شن نديرلك
مهند:تي شن بنشوفلك اول مره طيبي 😅
لبنى:غير تعالا
مهند:بهي بري قدامي هي
لبنى:لحم!
مهند:ايه مالا بديري دجاج 😏
لبنى:بهي ماتشوفليش هكا
مهند:خيرك انتي شن في دماغك
لبنى:شي 🥺 مسقي ولا شنو
مهند:شويه نتصل بيه ها
ياسين:شنو نوض نقلب وجهي
مهند:تي لا ياخرا نديرو مسقي ولا مبكبكه
ياسين:والله مستاحشها المبكبكه موت
مهند:هههه بهي يامجاعه
لبنى:شنو
مهند:ديري مكرونه خوي بمرته وجعان في بطنه الزح عليك دنيا كلبه
لبنى:حاضر نديرلكم حاجه معاها
قاملها شعرها يديرلها في ضفرة:لو تلحقي ومش تعب عليك ديري عادي ولو تحسي روحك بتتعبي فيها فوتي ديريلنا مكرونه بس
لبنى:تمام
مهند:كان نعرف شن مزعلك بس
لبنى:شي
مهند:بهي غير بعدين نتفاهمو
لبنى:اوك
مهند:فيش بوسه لراجلك
وقفت عاروس صوابعها وباساته عاخده:ماتعطلش عليا
مهند:حاضر
ياسين يتفرج عالمربوعه كيف نضيفه وريحتها بخور والطاوله تلمع تنهد:استغفر الله العظيم
مهند:غير خيرك تتنهد تقول عندك عشره صغار ومطلق مرتك
ياسين:كان قعدت عالحال هدا مطلق باذن الله
مهند:صلي عالنبي شن صاير
ياسين:تعبت ياوخي والله كاره معيشتي نروح للحوش تالف من الخدمة نهار كله برا زي الكلب حشاك، نلقا لبسي خامر اكداس ماطيبتش مريضه مانظفتش مش متحمله فديييت
مهند:بهي المرا مريضه خيرك معليشي دير الكيد على روحك فتره
ياسين:سامحني بندوي معاك في كلام مفروض ماينحكاش لكن بنفرغلك قلبي وتحملني
مهند:قول وسرك في بير
ياسين:هيا هدي حياتي من بدايتها من قبل تحمل مش جديد الشي
مهند:لاحول ولاقوة الا بالله
ياسين:والله كرهت حياتي وكان نمشي نشوف برا ولا نتزوج طلعني خاين حقير
مهند:اعطيها فرصه وماتتسرعش
ياسين:شن بندير
مهند: البنت مايردهاش الا امها وبوها جيبهم وريهم بنتهم ويروحو بيها فتره وردها تعدلت وبها ماتعدلتش خليها في حوشها وجيب عليها ضره بالحلال جو الحرام والعلاقات فوته، طلاق لا المرا حامل ماتشردش عيلك
ياسين:يصير خير شن جوك انت شورك متريح يامعلم 😉
مهند:شن علاقتك بيا
ياسين:واضح عليك وجهك متريح للمليون
مهند:الحمد لله
ياسين:ايامك حقك ساد ماتعبت وتعذبت في حياتك توا وقتك ترتاح مفروض حتا الخدمة تاخد اجازه طويله منها
مهند:لا وين مانقدرش
ياسين:بنسألك سؤال
مهند:تفضل
ياسين:تزوجتها وانت راضي يعني قصدي ماتبيش تاخد بنت ثانيه او في دماغك وحده
مهند:لا من قبل مش ناويله الزواج جت لبنى خديتها وتريحت معاها وتمت باب وسكرناه
ياسين:افرض بعد وقت قابلت بنت حبيتها شن بدير
مهند:مانقابلش
ياسين:طحت يعني
مهند:بوجهي 🙂
ياسين:هههه ربي يهني
لبنى من برا:مهند العشا واتي
ياسين:الرقه ياعيني 😂
مهند:ضم فمك خير ماتروح جعان ياوسخ
ياسين:سكتت
مهند يتفرج عالسفره باعجاب:امتا لحقتي ديريه هدا كله
لبنى:هوا شنو مكرونه عالسريع درتها وبيتزا وكرات دجاج مش صعب
باسلها ايديها:يسلمو وسامحيني عالتعب
لبنى:تعبك راحه حبيبي
مهند:اااخ خلي نرفعله يتعشا باش يقلب وجهه ونفضا بيك
لبنى:صحتين وعافيه ❤️
مريم تبكي:فديت ياماما شن هالعيشه ضمي نضفي طيبي
امها:مش ارتحتي بعد قلتيله حامل
مريم:اليوم دارلي عركة وقالي ضمي والا باتي عند بوك
امها:وشن درتي
مريم:ضميت شن بندير يعني
امها:اسمعيني فوتي هاليومين اللي بتطلعو فيهم وبعد تروحي تعالي قدام اهله واطلبي من سلفتك تجي تعاونك في الضمان احرجيها ولما تجيك ارقدي وخليها ضملك
مريم:زعما ديرها
امها:اي خاصه قدام عزوزتك دير روحها فالحه
مريم:ان شالله تصير
امها:ديري زي مانقولك بس
ياسين:منوره عالعشا يسلمو
لبنى:صحتين
ياسين:وين احمد
لبنى:راقد
ياسين:نوم العوافي غدوة نشوفه هي ليلتكم سعيده
لبنى:سلم على مريم
مهند:زي ماتفاهمنا
ياسين:تم
سكر الباب وخشو
لبنى:ضاعف هلبا خوك
مهند:من الهم يشيب حتا الراس
لبنى:ربي يفرج عليه
مهند:ماسألتيش يعني
لبنى:لو موضوع عادي كنتو حكيتو قدامي طلما خشيتو بروحكم معناها خوك يفرغ في قلبه ومايخصنيش هدا
مهند:سلملي العاقله اللي تفهم في الاصول
لبنى:مضايق مني
مهند:علاش شن ذنبك انتي بس تعصبت من كلامه الوسخ ولد عمك
لبنى:بس بكري
مهند:فوتي لكن الوقت بينا والله لما نداويه
لبنى:ليش
مهند:هدا اللي جاه
لبنى:براحتك
مهند:وين
لبنى:بنشوف احمد
مهند:بسرعه وتعالي
لبنى:احكي نسمع فيك غير بنغطيه بادي يحول في البطانيه
مهند:لحضني هيا
لبنى اتكت عاصدره:شنو
مهند:راضيه عاللي صار بينا امس
لبنى:شن خطرلك السؤال هدا
مهند:لاني نحبك ومش طايق بعدك ماصدقت قربنا والقرب هذا نبيه يستمر ويقوا اكثر، كل انسان تصير في حياته لحظات ضعف نبي نفهم امس ضعف ولا تبيني، مانبيش لما نقرب منك ثاني ترفضيني ولا تقوليلي غلطة وصارت وانا مانبيش نغصبك
لبنى:راضيه سلمتك روحي وقلبي نبيك ونبي نكمل حياتي معاك في حضنك انا وولدي، تعلقت بيك هلبا ومانبيش نبعد عليك مهند
حضنها بقوة:نتعب معاك ياروح مهند انتي
لبنى:قداش كنت نخاف منك ونحسب الف مره قبل نتكلم معاك
مهند:للدرجه هدي
لبنى:شخصيتك تخوف وصوتك
مهند:وتوا
لبنى:تصدق لو قتلك مانرتاحش بعيد عليك
مهند:سبحان من غير الاحوال 😅
لبنى:اسمع اقعد معانا الفتره هدي مستاحشينك
مهند:حاضر غير نوضي وتي لبسكم انتي وولدك
لبنى:ليش
مهند: احسبي حسبة ليلتين برا
لبنى:ماتقولش بنمشو معاهم 😢
مهند:لالا هي جهزيهم ندخن ونجيك
ناض احمد يبكي
مهند:توا نشوفه انا
رانيا:حبيبي
محمد لاهي في هاتفه:نعم
رانيا:بنمشي مع اهلي غدوة عمتي عازمتنا لمزرعتها
محمد:بترفعي الصغار
رانيا:ايه خلي يغيرو جو
محمد:بهي براحتكم خودي فلوس من الدرج
رانيا:سلم راجلها
محمد:بتروحي الجمعه
رانيا:ايه
محمد:خيره مهند بسرعه وروح بكري
رانيا:مخلي مرته بروحها
محمد:شن وضعه معاها
رانيا:كويسين شويه شويه يتعودو على بعض
محمد:ربي يهنيهم
ثاني يوم الصبح الكل جاهزين وبيتوزعو عالسيارات
خيرية:خوك بيطلع ولا شنو
ياسين:مش عارف شكله لانه دخل سياره الخدمة ومطلع الثانيه
طلعت لبنى:صباح الخير
رنا:صباحو بتمشو معانا 😍
لبنى:علمي علمك 🤷♀️
احمد يجري:نانا
خيرية:سلم وليدي 😘
مهند:صباح الخير قاعدين ماطلعتوش
ياسين:نستنو في محمد عطل بيرفع اختك
مهند:امم
رنا:ووين ماشيين
مهند:استراحتي هي تفضلي معانا
رنا:حاق
خيرية:قعمزي هني روحك
مهند:ماصدقت 😂
رنا:خزي 😪
لبنى:اول مره نشوفك لابس هكي كاجول 😍
مهند:بطول عمرنا مزال فيه حاجه
لبنى:لالا
مهند:احمد تعالا بابا هي
وصلت رانيا وراجلها
ياسين:ساعه نستنو
رانيا:نقص منك 🙄كيف حالكم ياعيله
خيرية:هوا هداكا الطريق طويله يابنيتي
رانيا:وين ياحلوين
مهند:الهي في روحك خيرلك
رانيا:لولي تعالي نبيك
مهند:اركبي السياره محمد شد مرتك علينا
رانيا:ماشي توا نوريك
مريم جت بتركب من قدام
ياسين:خيرك انتي هبلتي امي جنبي
خيرية:خليها ياوليدي براحتها
مريم:غير من تالي ضيق
ياسين:لا وانتي بطنك لركابك مهو تي اقلبي وجهك خير مانحلفلك عليها المشيه
رانيا:تعالي معانا امي
ياسين:والله ماصارت بتركب معاي
رانيا:وكان جت معاي شن يعني خلي مرتك ترتاح في سيارتها
ياسين:سيارتي وامي جنبي
مهند:ياسر انت وياها 😡 توكلي مع راجلك، اركبي ياامي هي
خيرية:غير لاه هدا كله اني نركب في اي سياره عادي
مهند:انتي فوق الكل ياغاليه واحسن مكان ليك
مريم قلبت وجها مش عاجبها
مهند:توصلو سالمين
خيرية:ربي يحفظكم مع السلامه
رنا:باي لولي حمودي
مهند:دخلي راسك ياقرده
ركب السياره:شن بترقد من توا
احمد:بابا
مهند:عيونه
لبنى:ربي مايحرمنا منك ❤️
شد يدها باسها:وماننحرم هالعيون اللي يتعبو فيا
دنيا دور وتجهز مبسوطة وتستنا على نار
عربيه:خيرك بطيري من الفرحه
دنيا:تعرفي بعد فكرت قررت بناخد مهند حطيه في راسي وبندا من اليوم عالاقل مانطلعش ايدي فاضيه
عربية:ومرته
دنيا:رح يطلقها اصبري عليا بس
عربية:مهند مايجيش للمزرعه الا لما تكون فاضيه وانتي عارفه
دنيا:لالا يجي اليوم اكدت على مرت خالي تعزمهم كلهم
عربية:توا نشوفو
سمعت صوت المنبهات والغفير فتح البوابه
وقفت مبتسمه:وصلو يامرحبتين
نزلت خيرية:السلام عليكم ياعيله كيف حالكم
عربية:انستو هي تفضلو
رانيا:الله قداش مريح الجو هنا
رنا:وبنت عمتك ملوثاته
رانيا:ضمي فمك ياكلبه 😂
دنيا:وين الباقي
رانيا:لبنى طالعه مع راجلها لمكان ثاني مش جايين
دنيا:لاا 💔😥😣
رنا خبطتها عاكتفها:فسدو مخططاتك 🙃ياناري مسكينه
دنيا طارتلها وتلفتت بتخش
شدتها مريم:استني عندنا كلام مع بعض مهم ويفيدك 🙂.....يتبع
