#جزائي7 ❤️🌷
حاسه قلبي بيطلع من مكانه ورجع الخوف سيطر عليا:ش شن تقول انت
مهند:نحبك صعبه في الفهم
انا:تحبني شنو لينا اسبوع متزوجين
مهند:من قال اني حبيتك في الاسبوع هدا
دموعي بدو ينزلو:شن قصدك
قرب مني شد وجهي:لبنى نحبك نبيك افهميني عانيت هلبا وتحملت نشوف فيك مرت خوي شي مستحيل بس توا بديتي مرتي ليا انا تخصيني
دفيته بكل قوتي كنت بنتكلم بس خاني لساني وماقدرتش نحكي شي مشيت للدار سكرتها عليا وقعمزت نبكي مستحيل نصدق اللي قاله هدا اكيد يبصر او خرف
عالسان مهند:-
مانعرفش شن خلاني نعترفلها بكل شي، كل اللي فكرت فيه اني نبي نبدا معاها من جديد نحبها ورح نخليها تحبني
فات الليل وانا مقعمز عالصالون دخان ورا دخان نستنا في الصبح باش نشوفها ونكلمها
الساعه 10الصبح ضرب الجرس
فتحت:صباح الخير
رانيا:صباح النور خيركم شن فيه
مهند:خشي
رانيا:اتصلت بيا لبنى قالتلي تعالي تعاركتو ولا شنو
مهند:حكيتلها بس فهمت غلط
رانيا:مفروض مااستعجلت هكي
مهند:بتعرف توا ولا بعدين
نسمع في صوت حكي برا طلعت:رانيا
تلفتت:نعم لولي
مهند:اظن هديتي وخديتي راحتك خلينا نحكو
انا:مانبيش نتكلم معاك نبي شي واحد بس
مهند:شنو
انا:زي ماتزوجتني طلقني
مهند:تحلمي نجوم السما اقربلك
انا:مانبيش نقعد مع واحد نذل شاف لمرت خوه
مهند:لسانك قصريه وماتغلطيش
رانيا:لولي اسمعي منه بهي وماتفهميش غلط
انا:هدا هوا اللي قلتيلي بيجي يوم نشكرك عليه،نقول مسكين انحرم من فرحة عرسه واخد ارمله بولدها وضحى عاخاطر احمد بس تفكيرك طلع احقر من هكي
مهند تعصب:سكري فمك من امس نساير فيك وساكت ماتفوتيش حدودك
رانيا:وطي صوتك تسمع امك قعمزو تفاهمو بالعقل علاش تكبرو فيها وهيا بسيطه
انا: كيف تقولي بسيطه 😢 هدا خان خوه وشاف لمرته هدا مايتأمنش حتا ينعاش معاه في نفس المكان
مهند:هكي هيا
انا:ابدا ماتوقعتك بالبشاعه هدي
قعد مركز فيا وفي عيونه نظرة مافهمتهاش:لا والله قعدا ماشفتي شي من بشاعتي وطالما تشوفي فيا الحقير والوسخ خليني نوريهولك عالمزبوط
رانيا:توا نفهمها ونحكيلها
مهند:ياسرها اللي سمعاته هلبا عليها
انا:طلقني
مهند:طلاق ماتحلميش بيه طلعه برا عتبه الحوش انسيها ونجيبك للطريق يابنت سامي
انا:مريض انت ومستحيل نقعدلك
مهند:جربي فكري في الطلوع اقسم بالله لما نكسرك 😡وزيدي اطلقي لسانك
رانيا:يالولي فهمتي غلط
مهند:هيا توكلي انتي
رانيا:خليني ن
عيط عليها:قلت توكلي ماتزيديش معاي حرف
مشت رانيا وهوا سكر الباب ودار سكر الرواشن كلهم والستائر
انا:نبي نطلق مش واثقه فيك ولا قادرة نقعد معاك
مهند:بري لولدك خير مانلحقك لبوه
انا:مش كان ولدك ولا خلاص كشفت وجهك الحقيقي
مهند:صح معاش محتاج نمثل ولا نسايرك مايمشيش معاك الطيب انتي تقعدي محبوسه هنا غصبا عنك وديري كل واجباتك كازوجة ووقت مانبي حقي رح ناخده 🙂
انا:شنو 😨
مهند:زي ماسمعتي
انا:مريض انت والله
ولع دخانه ومعادش رد عليا، خشيت جنب احمد خذيته في حضني كالعاده وانا خايفه بس نردد:ياربي ساعدني
فات عالاحداث هدي شهرين فيهم نفذ مهند كلامه بالحرف حرمني نطلع برا الحوش لامناسبات ولا مشاوير عائليه ولا حتا حوش اهله كانو هما يجو عندي بس،ومهما حاولو يقنعوه يتراجع سكر راسه.
بس الشهرين هادو خلوني نركز عليه وننتبه عاهلبا اشياء فيه طبعه،تصرفاته وحتا كلامه شخص يتصرف باتزان جدا نحسه حاسب لكل خطوة قبل يديرها،يعرف كويس تأثير الكلمه عاصاحبها قبل يقولها،تعودت نراقبه ونركز عليه حتا وقت يمشي لخدمته نستنا امتا يرجع وشن بيحكي ممكن الفراغ خلاني هكي 🤷♀️
كنت واقفه في المطبخ نجهز في فطوره
باسني عاكتفي:صباح الورد
انخلعت منه:ماتقربش مني ثاني
مهند:قلنا صباح الورد
انا:صباح النور
مهند:فيه حد يفيق طايرتله
انا:عادي
مهند:ديري ساده توا تروقي يلا ماشي
انا:بتروح!
تلفتلي وابتسامه عريضه على وجهه:مروحلك
انا:شن تقصد
مهند:نبي حقوقي الزوجيه يامرتي
طاح من يدي الكاشيك:نعم
مهند:زي ماسمعتي بالزبط ح ق و ق ي اللي جاي في بالي ناخدهم الليله
قعدت واقفه نشوفله بس
مهند:نفس القوانين رجلك برا الحوش ممنوع باي ياحلوة
اتصلت برانيا:ايوا لولي
انا:بالله عليك تعالي الحقيني
رانيا:خيرك شن صار تعاركتي مع مهند ثاني
انا:لا بس تعالي ونحكيلك
رانيا:تمام نحط الصغار في المدرسه ونجي
وصلت بعد ربع ساعه:صباحو خيرك باكيه 😅 شن داير فيك خوي
انا:ليش واخده الموضوع ببساطه هكي
رانيا قعمزت:لانه بسيط ياحبيبتي انتي بس خايفه من مهند هلبا ولا نقول هوا زرع فيك خوف قعد معاك معاش تحول بس لو تقربي منه حاتفرحي وترتاحي هلبا
انا:صح نخاف منه حتا اوقات يكون يحكي عادي عقلي يصورلي انه بيضربني
رانيا:لالا ماتوصلش لهنا بهي قوليلي خيره مبكيك
انا:قالي يبي 😓
رانيا ضحكت بصوت عالي:بهي وين المشكله ياروحي راجلك وطلب حقه
انا:اففف مانبيش
رانيا:بهي نسأل وجاوبيني بصراحه، رافضاته رفض تام ولا خايفه منه
انا:بيفرق الموضوع
رانيا:ايه هلبا
انا:بصراحه نخاف منه هلبا مانقدرش حتا نوقف قدامه نتناقش معاه وطالقه لساني لكن قلبي يبدا بيوقف من الخوف
رانيا:مالا توا يحوله هوا الخوف، الهي براجلك وولدك خير ماتجي بنت امها تخطفه منك
انا:منو!
رانيا:نعرفش اي وحده خاصه انه صايرله جفاف في حوشه معناها بيشوف برا
انا:يدبر راسه 🙄
رانيا:عافكره مهند يحبك هلبا
انا:كيف فهميني
رانيا:مانقدرش هوا محذرني مانحكيش لين يقولي
انا:من لما كان حسام عايش
رانيا:نعرفش جعانه ره جبتيني نجري بلا فطور
انا:توا ندير كلمي رانيا ومريم وعميمه يجو يفطرو هنا
رانيا:بهي
فطرنا مع بعض وشديتهم عالغدا
فتح الباب وخش:السلام عليكم انستونا
خيرية:مرحبتين بالغالي
باس ايد امه وراسها:كيف صحتك ياحنينه
خيرية:الحمد لله قعمز جنبي استحشتك بديت من الخدمة للحوش معاش حصلنا فيك هدرزة
مهند:لومك على كنتك
فنصت عيوني لما فهمت قصده
خيرية:ربي يخليكم لبعض
مريم:ونشوفو صغاركم 🙂
وقف مهند ماشي للدار:لبنى تعالي نبيك
لحقته غصب قدام عميمه:تفضل
مهند:شن خطرلك ديري عزومه اليوم
انا:عادي مستاحشتهم عزمتهم
مهند:اللي في دماغك زابطه لكن الحوش يفضا بعد الغدا تمام
انا:نلز الناس
مهند:لا توا نلزهملك ماتعبيش روحك
انا 🙄🙄
قعد يكح بقوة:توكلي
انا:خيرك
مهند:شي
انا:شورك بتاخد بردة من تغيير اللبس ونوم قدام التكييف
مهند:خايفه عليا هلبا كان تلقي الموت تعطيهالي
انا:مش لدرجه الموت نجيبلك دوا
مهند:مانبي شي
كنت مقعمزه معاهم بس عقلي في الوقت كل ماتمر ساعه قلبي ينقبض اكثر
بعد المغرب روحو الكل
رانيا:زي ماقتلك ماتسكريش راسك معاه وحايصير كل اللي تبيه خوي عارفاته اسمعي مني
انا:ان شالله
رانيا:هي سلام بوسيلي احمد
خشيت للدار لقيته راقد خديت بيجامه خشيت دوشت وطلعت نجفف في شعري
مهند:نعيما
انا:ينعم عليك
مهند:تعالي جنبي
اذكرت كلام رانيا ونصائحها خديت نفس عميق ومشيتله:نعم
مهند:قربي خيرك خايفه
انا:لا مش خايفه عادي
مهند:ليش رافضتني
انا:لا اا مش رافضه هدا حقك ووقت تبيه ني موافقه
مهند:متأكدة
انا:ايه
قرب مني اكثر:يعني لوصار شي بينا توا مش رح ترفضي وديريلي جو دموع
انا:لا
لف يديه عاخصري وكان عاوشك 😘سكرت عيوني
حسيت بيه بعد عليا
مهند:لو رفضتي افضل من اللي ديري فيه
انا:خيرك شن درتلك
مهند:خايفه مني انتي مرعوبه شوفي روحك كيف ترعشي تشوفي فيا وحش
انا:لا مش هكي
مهند:لييش بس شن هوا اللي درتهولك يمكن عصبي وديما ردة فعلي قويه لكني مش سيء
انا:مش قصدي
مهند:تشوفي فينا مستحيلين مع بعض
انا:مش عارفه
مهند:لو بس تعطيني فرصه وحده نخليك تحبيني ونوريك حبي 💔
انا:معادش قادره نفتح قلبي مش بايدي والله 😢
مهند:بس انا نحبك شن ذنبي تحرميني منك شن ذنبي تعامليني هكي رسمتيلي صوره في دماغك غلط ومشيتي بيها
انا:كيف غلط فهمني بهي صححها وخليني نشوفلك بنظرة صح
مهند:صح حبيتك من اول مره شفتك فيها مع خوي لما جيتي سلمتي علينا يوم المحضر لفتي انتباهي بقوه وحسيت قلبي اتاخد مني لكن وحق الله ماعمري خنت حتا بتفكيري، وانتي شايفه كنت لانسلم عليك ولا نتعامل معاك وديما تصرفاتي قدامك صعبه كنت نبيك تخافي مني باش تبعدي ومانضطرش نتعامل ونزيد نحبك، كنت نهرب للخدمة باش مانشوفكش وحتا وقت تخوني نفسي ونفكر فيك نفوته الليل كله صلاة ونقرا في القرآن باش مايجرنيش تفكيري لشي غلط،يشهد عليا ربي ماعمري فكرت نقربلك ولا نحكيلك عااحساسي ولا نشوفلك نظره غلط
لقيت روحي نبكي وانا نسمع فيه هوا في حد يحب بالطريقه الصادقه هدي
مهند:وقت توفا حسام ومشيتي اعتبرتها صفحه وتسكرت وانتهت من حياتي بس ربي راد تنفتح ثاني لما امي قالتلي ردها، وافقت لاني نحبك نبيك نبي نبدا من جديد معاك نعوضك عالمر اللي شفتيه مع خوي ونكون لاحمد البو اللي انحرم منه
انا:خوك دمرني خلاني معاش قادره نوثق في حد ولا قادره نحب من جديد 💔
مهند:فهمت خودي راحتك بنرقد برا
انا:ماتزعلش مني
مهند:متعود عالعيشه بروحي لكن اللي قاهرني اني حبيتك وانا اللي كنت محرم الحب على قلبي
طلع من الدار وخلاني نبكي وجعني وهدا وين عرفت انه مش شرير وشخص طيب بس نصيبنا 💔
فقت الصبح دوشت لاحمد ورضعته ورجع رقد طلعت للصاله لقيته راقد قدام للمكيف وهوا مريض حاولت نفيقه:مهند مهند
فتح عيونه:ها خيرك
انا:علاش راقد قدام التكييف وانت مريض
مهند:مافيا شي
انا:حرارتك مرتفعه
مهند:نقي حولي من قدامي
غير لبسه وطلع من الحوش قعدت اليوم كله مشغوله نفكر فيه نذكر قبل حسام حكالي انه مهند مرضته قويه هلبا اوقات توصل فيه يرقد ايام في المستشفى
مع الساعه 10الليل روح وباين عليه منتهي
مهند:جعان
انا:هيا اهو بنحط العشا شن تحس في روحك
مهند:كويس
انا:بهي نكلم ياسين يرفعك تعاين
مهند:لا
حطيتله تعشا وقعمز في الصاله يدخن
جيت جنبه:ياسر منه حرام عليك بتهلك صحتك
مهند:وشن يعني كان انهلكت
انا:بتخلينا
مهمد:لو نحس بيك تبيني حتا 1%مانسيبكش وكان نموت
رن هاتفي:ايوا
رنا:شن الجو لولي
انا:الحمد لله
رنا:بكري شفت مهند شكله واخد برده
انا:ايه ومسكر راسه مقعمز يدخن لايبي يعاين ولا ياخد دوا
رنا:ردي بالك منه بالله عليك مرضته قويه رهو عنده مضاد ياخد فيه عندنا توا نجيبهولك
انا:تمام
كل شويه نطلع نشوفه، بدت حرارته ترتفع وقعد يهلوس
مهند:سيبيني في حالي خيرك
انا:غير خود دوا وخليني نديرلك كمادات بس
مهند:اييي علينا باش تفهمي مافيا شي معاش تقربي مني
انا:بالله عليك وغلاوتي عندك
مهند:فوتيني قتلك 😡
انا:نبيك ترقد جنبي
مهند:شنو
انا:ايه خايفه في دار بروحي ارقد معاي
مهند:بهي
دخلته للداروعطيته الحبوب بالسيف قعدت نديرله في كمادات لين نزلت حرارته مع الفجر
فاق احمد درتله شيشه ورقدته
انا:مهند شن تحس في روحك
شد ايدي باسهاورقد في حضني:طول ماانتي جنبي مهند كويس وممتاز
قعدت نتفرج عليه قداش هادي بس يبان في وجهه وعيونه ارهاق وتعب سنين كأنه كان في حرب وربحها خداني النوم معاش حسيت بشي
فقت الساعه 9مخلوعه مالقيتاش جنبي شفت الحمام والمطبخ مش موجود مالقيتش لبس الخدمة عرفته مشا للمقر
اتصلت بيه ماردش بعتلي مسج "صارتلي خدمة طوارئ"
رديت عليه"امتا بتروح"
مهند"مش عارف "
انا"انت مريض كيف تطلع هكي "
مهند:احسن اليوم الحمد لله يلا نتلاقو ردي بالك على روحك وولدي"
معاش رديت عليه اضايقت هلبا لانه مشا 💔
بعد اسبوعين
دنيا:عندي فكرة حلوة جدا
عربيه:شن ناويه
دنيا:حلفت اني نحرق قلبها على ولدها زي ماحرقتلي قلبي على حسام
عربيه:بهي وتوا
دنيا:بكري شفت رانيا قالت جايه تاخد في دوا لاحمد مريض
عربيه:وليد صغير ملايكه شن ذنبه
دنيا:ذنبه امه حقيره هيا نوضي غيري بنمشو لحوش خالي
عربيه:بهي
رنا:ياسر من البكا
انا:ياناري وليدي بكري يبكي 😢 ضايقاته الحرارة
رنا:معليشي صغير ومعرض يمرض لولي خيرنا
انا:قعدت بروحي 💔
رنا: نتصلو بيه بس مايردش
انا:تعرفي استاحشته
رنا:ايااه لا فيه تطورات
انا:☹️
رن الجرس
رنا:توا نفتح
خيريه:خير شن ولد خوك حاله توا
رنا:تنزل شويه وترتفع ثاني الحرارة
خيرية:لاحول ولاقوة الا بالله
عربيه:ماعندكم سو ياعيله
رنا:اهلين عمتي تفضلي
دنيا:لاباس عليه
رنا:ماتشوفي باس
طلعت انا:اهلين انستونا
عربيه:مرحبتين كيف حالك
انا:الحمد لله
جت رانيا:اسمعي الدوا هدا قالي الصيدلي كويس
انا:متأكدة
رانيا:ايه خودي اعطيه منه
دنيا:ترا نقرالك عليه
انا:لالا صحيتي
دنيا:براحتك
رنا:نديرله الشيشه
انا:ايه باش نعطيه الدوا مره وحده
دنيا:معليشي الحمام وين
انا:نهاية الممر عاايدك اليسار
بعد ساعه بدت حرارة احمد ترتفع ثاني ووجهه ابيض هلبا
انا:رنا يارنا
جت تجري:ها شنو
انا:شوفيه خيره معاش يبكي ولا شي كأنه دايخ 😨
رنا:ياربي 😭
للحظه نحسابه مات معاش حسيت بروحي قعدت نعيط ونشد فيه لحضني بقوة، مانذكرش حتا كيف لبست ورفعناه للمستشفى وين ماصدموني انه الدوا للي عطيتهوله لمرضى القلب وحالته خطيره
مقعمزين في الممر وانا بروحي نبكي:ياربي ماتوجعلي قلبي عليه ياربي اشفيه ولدي ماعنديش غيره 😭 ياربي ساعدني ياربي ساعدني
حسيت بيه حط يده عاكتفي:لبنى
قمت راسي شفتله وقتها بس تأكدت انه هدا سندي:مهند 💔.....
تفاعلاتكم وتعليقاتكم 🙂
