HBS 2: New Generation - The Player (Gxg) COMPLETED

TP: 18

Felicia POV

Tinupad nga ni Skyler ang sinabi niyang aalis kami para bumisita sa Manlac Island. Ang isla kung saan ako nanggaling.

Sabado ngayon kaya pareho kaming walang klase. Nagkataon kasi na walang klase si Skyler dahil merong event sa kanilang University.

Kaya naman maaga pa lamang kanina, madilim pa ang paligid ay umalis na kami sa mansyon upang bago pa man sumikat ang araw ay makakarating na kami sa isla.

Gamit namin ang sinakyan din naming helicopter noong gabing sinundo nila ako sa isla. Walang traffic at napakabilis lang talaga ng biyahe.

Hindi maitago ang saya na aking nararamdaman noong sandaling nakatapak na akong muli sa isla na aking pinagmulan. Halos masubsob pa ako sa pagbaba mula sa helicopter dahil sa sobrang excited.

Kasama rin namin ni Skyler ang dalawang bodyguard na labis na pinagkakatiwalaan nito.

Bitbit ng mga ito ang mga naglalakihang bag na mayroong mga pasalubong para kina Beauty. Panay pagkain iyon na alam kong hindi pa nila natitikman at iba pang mga kakailanganin nila sa araw-araw.

Sobrang biglaan ng pagdalaw namin kaya nabigla at nasurpresa talaga silang tatlo noong makarating kami sa kanilang bahay.

Halos ayaw akong bitiwan nina Beauty at Aling Lucia mula sa kanilang mahigpit na pagyakap sa akin. Ganoon din si Mang Ben na panay ang pag-agos ng luha. Para kaming mga ewan na nag-iiyakan at nagyayakapan lamang sa loob ng ilang minuto.

Sobrang miss na miss ko sila at ganoon din sila sa akin.

Akala raw nila habang buhay na nila akong hindi na masisilayang muli.

Noong sandaling kumalma na kaming lahat ay isa-isang pumasok na rin ang dalawang body guard sa kanilang bahay para ipasok ang mga dala naming pasalubong.

Ngunit labis ang ipinagtataka ko noong sandaling iginala ko sa buong paligid ng bahay ang aking mga mata. Nakita ko kasi na mayroong mga bagong gamit ang mga ito. Napansin ko rin na ang karamihang pagkain at delata na dala namin na paralubong para sa kanila, ay meron na ring nakalagay sa kanilang kusina.

Awtomatikong napakunot ang noo ko. Ngunit mukhang agad naman na nakuha ni Aling Lucia ang pagtataka at mga katanungan sa aking isipan.

"Ahhh...ehhhh... hindi mo ba alam na halos linggo-linggo kaming dinadalaw dito ni Sky?" Tanong ni Aling Lucia sa akin na labis kong ikinagulat. Dahil sa totoo lang, hindi ko talaga iyon alam at wala rin siyang nababanggit sa akin.

"Magmula noong kinuha ka nila rito sa isla. Akala namin iyon na rin ang una at huling makakakita kami ng mga armadong kalalakihan. Pero hindi." Dagdag pa nito.

"Kasi palaging pumupunta rito si Skyler." Si Mang Ben na ang muling nagsalita. "Palagi niya kaming binibisita, kinakamusta, sinasabi sa amin kung kumusta ka na at ano na ang balita sa'yo. At sa tuwing bumibisita siya meron siyang dalang mga pasalubong para sa amin. Ayan!" Sabay turo ni Mang Ben doon sa mga delatang nakasalansan na tinitignan ko kanina.

"Tapos may mga armadong lalaki siyang kasama palagi. Hanggang sa isang araw, nagulat na lang kami rito na may tatlong armadong lalaki na ang nagbabantay sa paikot ng bahay. Sinadya talaga silang iwanan ni SKyler para raw safe kami rito lalo na kapag may masasamang loob na maligaw." Dagdag naman ni Beauty na labis na ikinagulat ko dahil hindi ko talaga alam na madalas pumunta rito si Skyler.

"Andoon nga sila ngayon sa likod ng bahay. Pinatayuan na lang ni tatay ng kubo na tutuluyan nila." Sabay turo ni Beauty sa may likod ng kanilang bahay.

Hindi ko alam pero sobrang nakakataba ng puso ang ginagawa ni Skyler para sa kanila. Ang saya-saya ng puso kong malaman na ligtas sila rito at hindi nagugutuman dahil sa proteksyon at alaga na ibinibigay sa kanila ni Skyler.