YOU ARE MY DESSERT [Complete] U+Z

အပိုင်း (၂)

U+Z

အရေးတကြီးထွက်သွားတဲ့ သားလက်ထဲမှာ မွေးကင်းစကလေးတစ်ယောက်ပါလာသည်။ ဒေါ်လွန်းဖြူ တခြားမမေးနိုင်သေးဘူး သားလက်ထဲက ကလေးကိုချီပြီးနို့မှုန့်တိုက်ဖို့လုပ်ရသည်။ သားက သူ့လက်ထဲက ကလေးကိုသူ့လက်ထဲကိုလွှဲပေးပြီးတာနဲ့ကားထဲက နို့မှုန့်တွေပါ ထပ်ထုတ်လာသည်။

အဲ့အဲ့~~~

"မေမေ မြန်မြန်လုပ်ပါ၊ သားလေး ဆာနေပြီ"

သားကိုဘယ်က ကလေးလဲ ဘာညာမေးချင်ပေမယ့် မေးရမယ့်အခြေအနေမရောက်သေးပဲ နို့မှုန့်ဖျော်နေတာကို အေးအောင်အလျင်စလိုလုပ်ရသည်။

"မေမေ့ကိုပေး"

လွန်း မေမေ့လက်ထဲသားကိုထည့်ပေးလိုက်တော့ မေမေကသားကိုသေချာနို့တိုက်ပေးသည်။

"သား"

"ဖေဖေ"

လွန်း ထရပ်မိသွားသည်။ ဖေဖေက အပြင်ကပြန်လာတာနဲ့သူ့ကိုခေါ်ပြီးဝင်လာတာဖြစ်ကာ သူနဲ့ကလေးတစ်ယောက်ပါလာတာက ဖေဖေသိသွားလောက်ပြီဖြစ်သည်။ ဖေဖေကသူ့ကိုကြည့်ပြီး မေမေ့လက်ထဲကသားကိုကြည့်ကာဝင်ထိုင်သည်။

"ကလေးက ကျန်းမာရေးကောင်းရဲ့လား"

"ကောင်းပါတယ် ဖေဖေ၊ ၇ လနဲ့မွေးတာပါ"

"နာမည်ပေးပြီးပြီလား"

"ဟုတ်ကဲ့ ဆေးတမာသော် လို့ပေးထားပါတယ်"

ဦးမြတ်သော် ခေါင်းပဲငြိမ်ပြမိသည်။ ကလေးနာမည်မှာ သားနာမည်ကကပ်ပါနေသည်။ ဖြူ ဖုန်းဆက်ပြီး မေမေကလာခဲ့အုန်း‌လို့ခေါ်နေတာကြောင့် သူမေမေ့ဆီရောက်နေတာဖြစ်ကာ သားအကြီးဖြစ်သူ မြတ်သော်က က 'ဖေဖေ့ နောက်မိန်းမသားက ဘယ်မိန်းမနဲ့ရမှန်းမသိတဲ့ကလေးနဲ့ ပြန်ရောက်နေပြီ' ဆိုပြီးရယ်ကာဖုန်းဆက်ပြောလာတာဖြစ်သည်။ သူ ကြားကြားချင်း ချက်ချင်းပြန်ခဲ့တာဖြစ်၏။

"ကလေးက သားရဲ့ကလေးလား"

"မဟုတ်ပါဘူးဖေဖေ၊ ကျွန်တော့်ကလေးမဟုတ်ပေမယ့် ကျွန်တော့်ကလေးလိုပါပဲ"

"ထိုင်လေသား"

"ဟို ဖေဖေ၊ ကျွန်တော်တာဝန်ယူပါရစေ"