YOU ARE MY DESSERT [Complete] U+Z

အပိုင်း (၂၂)

U+Z

လွန်း အခုသူ့ကားကို မသုံးပဲသော်လေးကားနဲ့ပဲအတူသွားနေတာဖြစ်သည်။ ကားကို အိမ်ကထည့်ပေးလိုက်ပေမယ့် သွားစရာထွေထွေထူးထူးမရှိတာကြောင့် ထားခဲ့လိုက်တာဖြစ်သည်။ အခုတော့ သော်လေးနဲ့သူနဲ့ကတစ်စီး၊ အန်ကယ်နဲ့အန်တီနဲ့ကားတစ်စီးနဲ့ ကုမ္ပဏီကိုသွားနေတာဖြစ်သည်။ ဒီနေ့ အန်ကယ်က သူ့ကိုယ်စား သော်လေးနဲ့သူဝင်လာတာကို အားလုံးနဲ့မိတ်ဆက်ပေးမှာဖြစ်သည်။ ရှယ်ယာပိုင်ဆိုင်မှုတွေကိုတော့ နောက်မှလွှဲပေးမယ်လို့ ဆိုလာ၏။

ရှယ်ယာရှင်တွေလဲအားလုံးရောက်နေတာဖြစ်ပြီး အန်ကယ်ကြည်သာနဲ့အန်တီသက်စုတို့ ရှယ်ယာကအများဆုံးဖြစ်နေတာကြောင့် သူတို့ပဲလုပ်ငန်းကို ထိပ်ပိုင်းကနေအုပ်ချုပ်နေတာဖြစ်သည်။ သူတို့ဝင်လာတာကို တစ်ချို့ကကြိုက်ပေမယ့် မကြိုဆိုတဲ့သူတွေလည်း ရှိမှာပင်။

"အစည်းအဝေး ဘယ်အချိန်စမှာလဲ ကိုကောင်စံ"

"နောက် ၁၅ မိနစ်နေရင် စမယ် ကိုလွန်း၊ ဒါနဲ့ ဆေးတမာသော်ရော"

"ရှိတယ် နောက်ဘက် ခဏဝင်သွားတယ်"

"စိတ်မပူနဲ့ အစ်ကိုတစ်ယောက်လုံး ရှိတာပဲ"

ကောင်းစံ ကိုလွန်းကို အားပေးလိုက်ရသည်။ ဒါရိုက်တာတွေ၊ ဌာနခေါင်းဆောင်တွေကတော့ ၁၈ နှစ်ကျော်ရုံပဲရှိသေးတဲ့ ဆေးတမာသော် အုပ်ချုပ်သူနေရာကိုဝင်လာကို ကြိုက်ကြမှာမဟုတ်။ ရှယ်ယာအများဆုံးဖြစ်နေတာရယ်၊ ကိုလွန်းမြတ်စေရာသော် ရှိနေတာရယ်ကြောင့် ငြိမ်နေကြတာဖြစ်သည်။ ကိုလွန်းမြတ်စေရာသော်က သူ့ဖွားဖွားနဲ့ဖေဖေပိုင် ကုမ္ပဏီကိုတစ်ယောက်ထဲ အုပ်ချုပ်ခဲ့တာကြောင့် သူတို့လက်ခံထားတာ။ ကိုလွန်းက image လည်း ထိန်းထားနိုင်တာကို။ ကိုလွန်းလည်း ဒါကိုသိလို့ ဆေးတမာသော်နဲ့ ဒီနေရာကို ပူးတွဲပြီးလုပ်ပေးတာ။ ဆေးတမာသော် တစ်ယောက်ထဲသာ အဆင်ပြေရင် ကိုလွန်းကလွှတ်ထားပေးမယ့်ပုံရှိသည်။ 

လွန်းကတော့ ပုံမှန် ပုဆိုးနဲ့ရှပ်လက်ရှည်ကိုဝတ်ထားပြီး လက်ပတ်နာရီတစ်လုံးနဲ့ လုံးဝသန့်နေတာဖြစ်သည်။ နောက်ကပြန်ထွက်လာတဲ့ သော်လေးကတော့ ပုဆိုးခဏခဏ ပြန်ပြင်ဝတ်နေရတာကြောင့် ဒီနေ့တော့ style pants နဲ့ ရှပ်လက်ရှည်ကိုတွဲဝတ်ထားပြီး ကုတ်တော့ဝတ်မထားပေ။ ရှပ်အင်္ကျီအောက်ကို ဘောင်းဘီထဲထည့်ဝတ်ထားကာ သူ့ခန္ဓာကိုယ်နဲ့ အံဝင်ခွင့်ကျဖြစ်ကာ ကြည့်ကောင်းနေ၏။