البدوي العاشق

6

#البدوي العاشق (6)
# بقلمي : زينب أمير

ساعه دخلنا البيت كان نوعا ما هادئ،، الضبيحه لسه م انتهو منها الشباب، علشان كده الشغل م كان كتير لحدي م هم يخلصو ويجيبوها،، نحنا البنات اتقسمنا،، البتملي السرامس مويه بارده والبتشد في الملايات،، والبتساعد في النسوان الكانن بعوسن في الكسره وبعملن في الملحات،، شويه وجابو صواني اللحمه من الشارع وبدو يقطعو فيها وع النار طوالي،، من شيلي وختي واعملي، صواني الفطور دي طلعت سريع سريع وبدو الشباب يشيلو الاكل ل ديوان الرجال،،

الساعه اتنين بعد الضهر والشمس في نص السماء،، الجو مسخن والناس جايطه،، وقتها كان انتهينا خلاص من الشغل وماف حاجه تاني، خاتين كراسي البلاستيك في طرف الحوش ونتونس ساي ..

قلت ل فاطمه فعالياتكم شنو؟ عندكم حفلات وكده ولا النظام شنو !! ردت لي والله حفله دي م اظن لي،، لكن في السيره والجرتق ورقيص العروس،، رقيه قالت ليها "باستغراب " سيره؟؟ ضحكنا عليها ورديت ليها انا، يعني ي رقيه الناس كلهم بطلعو من بيت العريس ل بيت العروس برجلينهم، نسوان ع رجال ، البنات بغنن والشباب بصفروا، ابشر ابشر ي عريس،، ضربت يديها مع بعض وقالت "بحماس" لا الصراحهه حبيتتتت حرفيا ي بنات انا مبسوطه شديد ،، ردت ليها فاطمه،، اصلا ي رقيه ده الحيحصل بإذن الله، اعراسنا ولا أعراس الخرطوم زاتها.. وان شاء الله تنبسطي اكتر، عاينت ل رغد وعاينت لي وكملت كلامها : انتو زاتكم ي بنات ح تشكروني بعدين،،رغد قالت ليها الموضوع من بدايتو شكلو حلو وي رب ينتهي حلو برضو..

يوم صباح جديد وناس جديده !!
بمناسبه الناس الجديده دي كان امس بالليل جو باقي أهلهم الفي مختلف أنحاء السودان،، رسميا كده العرس باقي ليهو يومين،، اليوم واقع اربع، والجمعه طوالي العرس،،

قريب ل للمغرب ب شويه، الناس دي كانت قاعده بتعمل في شاي اللبن وبتجهز في اللقيمات،، منها بعد الصلاه طوالي جو شالوها مع الشاي وطلعو ع الشارع ،، كنا قاعدين انا ورغد في غرفه كده جنب باب الشارع ب شويه بنتونس ،، لحدي م سمعنا اصوات طلق ناريه.. طلعنا بره نشوف.. لقينا حتى النسوان طلعو والشفع وغايتو، طلع ده اخو العريس وأصحابو،، شايفه الناس الجنبي كلها تضحك ومبسوطه، بعد موال الرصاص ده.. دخلنا جوه ، البنات جابو الدلوكه وقعدو يغنو، ل الساعه عشره نحنا قاعدين في الحوش بكراسينا.. جاتني مكالمه من امي استأذنت وقمت ارد،، واقفه جنب براميل حقات مويه، مدنقره راسي وبغسل في رجولي، خاته التلفون في أضاني وماسكاهو ب كتفي.. وبيدي التانيه رافعه طرف الفستان الكان طويل علي حبه.. رديت ع امي الكانت بتوصي فيني انتبه ع روحي، قلت ليها والله ي امي م شفتي الاجواء دي كيف.. م اتوقعت انبسط كده خالص، اهو العرس بعد بكره، الفرحه الاكبرر .. والحمدلله منتبهه ع نفسي م  بتجيني عوجه ان شاء الله،، قالت لي م شاء الله والله العرس عندكم لكن، ضحكت وانا بقول ليها فاتك والله ، واصلت كلامها وقالت :  المهم يلا ل بكره ان شاء الله ابوك ده قفل اللمبات خلاص شكلو عايز ينوم.. قبلي م ارد ليها سمعت صوت حمحمه، وانا بنفس الوضعيه قبلت ع جهه الصوت.. شفت لي رجول.. رفعت راسي وانا بعاين ل فوق،، كانو شابين شايلين تلج اي واحد ماسك لوح.. وقفت عديل وزحيت ع جنب.. جاني صوت امي، وهي بتقول تصبحي ع خير، رديت ليها ومشيت ع جهه البنات...

يوم الخميس من الصباح قمنا انا والبنات ع بيت خال ناس فاطمه،، المهم قالو المره البتحنن قاعده بترسم للبنات ب هناك، فعلا ساعه وصلنا الصف ده طويل م يديك الدرب،، رغد قالت آها ل متين مع الجمهور ده.. رقيه قالت ليها انا م حابه أرسم ف طلعوني من الموضوع ده فكرو انتو ح تعملو شنو.. فاطمه صرت ليها عيونها وقالت ليها سمعيني تاني كيف يعني م عايزه ترسمي م ع كيفك والله.. ترسمي معانا والا جد جد المره دي م بعرفك انا،، رقيه قعدت تعاين فينا وحده وحده، رغد قالت ليها م عندك حل وافقي بس واسي نعمل شنو مع الزحمه دي،، اتحركت فاطمه وهي بتقول بتصرف م عليكم،، جات راجعه بعد خمسه دقايق، قالت لينا ارح اتحركوا.. مشينا شويه ودخلنا في بيت بابو كان فاتح بسيط،، جاتنا بت ضيفتنا ودخلتنا ل جوه، قالت ل فاطمه والله انا الشغله دي  من زمان بطلتها
بس عشانك بس ح ارسم ليكم ،، بعدين تعالي النسألك مالك قال اتاخرتي كده؟ العروس دي م اختك؟ فاطمه ضحكت وردت ليها اعمل شنو بس تخيلي نسيت عديلل والله وبعدين كانت في حاجات كتيره ناقصه للعروس ف انشغلت بيها بس،،، ساعه ونص بالكتير كان خلصنا الحنه وطلعناها،، كنت بعاين ل يديني ب إعجاب كده، الرسمة لونها كبدي وحلوه شدييدد.. الوقت داك الساعه كانت ماشه ل عشره صباحا... ونحنا ماشين ع البيت.. كانو بركبو في الصيوان بره، م متذكره اسمو منو بس ياهو زاتو الزول الشفتو بالليل، وياهو زاتو الوصفتو لينا فاطمه قبلي كده.. كان راكب فوق كراسي كتيره وبربط في المشمع حق الصيوان، 

#يوم الجمعه #يوم العقد :
صباحيه يوم العرس سبحان الله الجو ده كان بارد كده وعجيب، صليت ومسكت تلفوني قريت منو الكهف، بعدها قمت لبست مع البنات، الساعه 9 الناس دي كلها فطرت ولابسه اللبس السمح،، تم العقد الحمدلله..
وبعد الفطور طوالي،،  جابو العروس،، بعد موال التبريكات والتهاني،، البنات فرشو فرشه في الأرض واترصوا حولها، عملو دايره كبيره وجات العروس وقفت فيها لابسه فستان احمر فوق الركبه ب شويه،، مع أصوات ال زغاريد ودق الدلوكه، بقت ترقص وتتمايل،، الاغاني السودانيه بأصوات النساوين والبنيات كانت عاليه ومبهجه،، وابداع العروس واحترافها في الرقيص والخطوات..

يتبع..