البدوي العاشق

22

#البدوي العاشق (٢٢)
#بقلمي : زينب امير

بعد اسبوع واثناء م برتب في الملابس وادخلا الدولاب . جاني عمر داخل وهو فرحان . كان شايل اوراق في يدو وبحركا قدامي يمين وشمال . عاينت ليهو باستغراب . قال لي م عايزه تعرفي ديل شنو . قلت ليهو احكي لي.
=تتذكري قبلي فتره كنت جاري ورا اوراق وتجديد جوازات .
_حصل . قول لي كل حاجه اتسهلت خلاص وح نسافر .!
=وحجزت كمان!
_ جادي انت؟
=ابتسم : الاسبوع الجاي ان شاء الله يوم سفرنا .  يوم الاربعاء من الصباح ح نمشي الخرطوم طيارتنا الحضور  ١ ضهر والاقلاع ٤ عصر .
_ الحمدلله . ح امشي اكلم خالتي سريع واجي .كنت عايزه اجري . مسكني من يدي . خالي قاعد البسي ليك حاجه وامشي. ضربت راسي ب يدي . طيب طيب نسيت . فرحانه الف .
= عاين لي وهو مبتسم ربنا يديما عليك .

اتاكدي من كل حاجه انك شلتيها ، اوراقكم المهمه.بندول بنفعكم برضو في السفر . اي ي خالتي كلو قاعد وشوفتو اسي تاني . ايلاف قالت لي م تنسي ي لجين ذكريهو دائما عشان م ينسى ويجيبو لي .خالتي قالت ليها دام قال ليك بجيب ليك تلفون يعني بجيبو ليك . الشفقه تطير . قلت ليها حاضر ي عسل . م طلبتي حاجه . في النهايه دي هديه النجاح . لازم لازم( جابت 80).
بعد شويه سمعنا عمر ينادي :
اتحركنا كلنا ع باب الشارع ، كان واقف بره مع خالو واعمامو. ودعتهم من الباب ومشيت ع الرجال قلت السلام عليكم وركبت مع عُمر.
الساعه كانت ٩ الا . ركبنا عربيه خاصه . حقت واحد من اهل البلد واصلا هي نظام ترحال كده للسفرات الزي دي .وصلنا الخرطوم وم قدرنا نمشي ع ناس امي عشان الوقت قرب . 1 بالضبط كان دخلنا المطار . بعد عملنا كل الاجرائات وقعدنا في صاله الانتظار شويه .  عُمر قام وخلاني مع الشنط . مشى صلى وجا . قال لي قدمي العصر طوالي عشان ح نصل جده مع المغرب . فعلا قمت صليت وجيت راجعه. طلب لينا عصير . كان فطرنا في الشارع ساعه كنا جايين . قعدنا ل تلاته ونص . حتى زاعو رحلتنا.

كنت قاعده جنب الشباك ومن خلالو بعاين ل بقيه الطائرات ، خوف ع حماس ع مشاعر كتيره ملخبطه جواي بس اللهم مبسوطه .
مع المغربيات هبطنا ونزلنا ركبنا الباصات . نزلتنا في مطار جده الدولي . بعد كملنا الاجراءات كلها .م واجهتنا صعووبه نسبه للتكاسي الكانت واقفه بره . عُمر وصف ليهو وجهتنا فندق (دار المها ) كنت بعاين للمباني والمطاعم والاماكن  بانبهار . تقريبا لي حكايه سبعه سنوات م جيت السعوديه اخر مره كان جيت مع امي وابوي وحاليا جيت مع راجلي💗
اخدنا مسافه ساعه الا حتى وصلنا .
حجزنا واستلمنا مفتاحنا . واي زول جاري وراهو شنطتو .
عباره عن شقه فيها غرفتين وصاله صغيره ومطبخ صغيروني وحمام  .
دخلت في واحده من الغرفه . طلعت الطرحه والاسبورت. جاني عُمر داخل .
= اجهزي . نطلع ناكل ونجي .
_ممكن تمشي تجيبو وتجي؟ .
=حاسه ب حاجه ؟
_ابدا ، شويه ارهاق بس
= طيب . استحما واطلع .
هزيت ليهو راسي ب اي . طلع ليهو لِبس ومشى الحمام . قعدت في طرف السرير عشان م انعس وانوم. بعد اتجهز وطلع . دخلت بعدو .