البدوي العاشق

11

#البدوي العاشق (11)
#بقلمي : زينب أمير

ياخي جاده انتي؟ في زول بلبس اسود يوم خطوبتو؟ رديت ليها وانا بشيل الخيار الفي عيوني، انا ي رغد! وبعدين هو م اسود اسود.. الورود دي كلها م شايفاها!.. قامت ع حيلا وساعه وصلت باب الغرفه قبلت علي وقالت: شوفي ي لجين م ح اكتر معاك كلام،، امشي واجي القاك غيرتي الشي ده..

كل حاجه مرت بلمح البصر.. بقيت بس بعاين بعيوني.. قبلي اسبوع تقريبا وبعد كلامي مع فاطمه بيوم.. ابوي جا داخل الصاله وبندهه ل امي.. سمعتاا صوتو لاني كنت في المطبخ جيت طالعه وانا بنفض يدي في أطراف الجلباب.. سلمت عليهو وقلت: جمعه مباركهه..(الصباح م لاقيتو كان مشى عرس ود صحبو وياداب شوفتو لاني صحيت متأخره من السهر) وامي دي راقده في الغرفه جوه قالت مصدعه شويه.. رد لي تمام ح اشوفا واجي،، عايز لي كبايه جبنه.. قلت ليهو حاضر.. اديني دقائق بس ي ابوي.. قبلي م يمشي عاين لي بنظره حنينه كده وقال :الله يرضى عليك.. ابتسمتاا واتحركتاا..

ابوي وهو راجع ع البيت جاتو مكالمه من رقم غريب.. فتح الخط وقال الو السلام عليكم.. رد ليهو الرقم الغريب السلام وقال ليهو معليش معاي عبدالله الحسين احمد.. رد ليهو ابوي وصلت تب.. اتفضل كيف اقدر اساعدك ؟ الطرف التاني قال: كل خير،، معاك عُمر ابراهيم تاج السر..!

طبعا م يفوتكم بعد الكلام ده بيومين أبوي ناداني وبكل وضوح قال لي الكلام الدار بيناتهم واها انتي رأيك شنو.. اتدخلت امي وقالت لي فكري ي بتي واخدي قرارك كويس والبتقوليهو نحنا معاك فيهوو..

"جانب عُمر" :
بخيت رشه عطر اخيره وأديت المرايه اخر نظره وقلت: خلاص بقيت جاهزز..طلعت من الغرفه وانا بقول : ي جماعه اطلعو خلاص الزمن فات.. عايزين نلحق صلاه العصر دي في الخرطوم..فجأة كلهم بقو يتجارو في البيت وبقيت م فاهم حاجه.. من طرحتي وين.. وتاكدي من كل الابواب انها مقفوله.. نادي خالتك بالحيطه وقولي ليها اطلعي اتحركنا،،

مرت ساعه ونحنا في الطريق.. معاي أعمامي اتنين.. امي اماني،،اختي الصغيره إيلاف واخيرا خالتي وبتها فاطمه..

القصه ابتدت من كم شهر،، اول لمحه وأول نظره.. من ساعه رِجلها داست بلدنا.. شوفتها وهي نازله من العربيه،،صلحت نضارتا َومسكت يد صحبتا وهي مبتسمه،، تابعتها بعيوني لحدي م دخلت وبعدها قلت ل نفسي:دي ياها ي عُمر!

اتوالت اللقاءات بطريقه غير مباشره او مباشره بطريقتي انا.. وكل مره اصراري فيها بزيد..

الحمدلله كنت فرحان وقلبي مرتاح شديدد.. متيقن كل حاجه ل خيرر واليوم ده ح يعدي بخير وهي لابسه دبلتي! ،، اول طريقه واول قرار ل فكره انها تكون لي.!

وصلنا بعد العصر ب شويه.. عمي اتصل ل عم عبدالله يوصف ليهو البيت.. خمسه دقائق وكنا قدامو.. طلع علينا ابوها ومعاهو كم راجل من أهلهم واولادهم الشباب..

أن شاء الله م لقيتو عوجه في الطريق؟ ده كان عمها بسأل.. طبعا عرفتو كيف عشان قدم لينا نفسو.. رد ليهو عمي حسن :لالا الحمدلله.. الا الخرطوم دي كبيره وقلت ياهو التُهنا،، سألتو انت ي ولد حافظ الطريق.. م كمان نقوم نضيع قبلنا.. كلهم بقو يضحكو.. شويه ونزلو الغدا..

صلينا العصر جماعه.. وبقيت مترقب متين ي ربي نبدأ ويقولو عليها  خطيبتي؟؟؟!

#خاطره:
من شروق الشمس حتى مغبيها.. إلى شروقها في اليوم التالي،، ابقي بجانبي!..♡

#يتبع...