البدوي العاشق

19

#البدوي العاشق (١٩)
#بقلمي: زينب امير

صباحيه الجمعه . قمت مع ٦ . بعد اخدت شور وغسلت شعري . صليت وقريت الكهف . ومشيت بهناك . خالتي ولعت فحم الكانون وختت الزيت في النار للزلابيه . دخلت وعملت شاي اللبن .جهزت الكبابي. جات ايلاف داخله . صبحت علي وشالت معاها الصينيه بره .

قاعدين انا وايلاف في سرير وجنبنا ب شويه خالتي قاعده في بنبر بترمي في الزلابيه .سمعنا صوت عمر وخالو من خشم الباب داخلين وبتونسو.( خالو محمد. اصلا عايش معاهم سافر الدهب بعد عرسنا بيومين .  ورجع ليهو اسبوع كده ).
بعدها شربنا الشاي مع بعض . وقمنا نتجهز .ماشين البيت الكبير للكرامه والضبيحه!

بقيت محتاره البس عبايه ولا توب ؟سألت عمر رد لي البريحك بس . شوفي ح تكوني مرتاحه ب شنو والبسيهو. قلت ليهو معناها العبايه . ابتسم بس وم رد .
بعد لبست وجهزت قلت ليهو : ح اشيل معاي المفتاح عشان ح ارجع تاني اغير ملابسي .ح تطلع متين انت ؟ قال لي : بعد ساعه كده حاليا ماف حاجه . راجعه الساعه كم انتي ؟قلت ليهو زي 1 بعد الضهر ، رد : امشي بتلقيني قاعد.
طيب يلا مع السلامه ومشيت  .!

لقيتهم منتظرني اتحركنا ومشينا . البيت كان مليان بناسو خالات ع عمات. سلمنا وبدينا معاهم شغل طوالي . لاقيت فاطمه في المطبخ  شغاله وماسكه التلج للمويه .حضنتها وقلت : اشتقنا . قالت لي كتارات . نخلص بس وتحكي لي عملتو شنو امس ! قلت ليها ضبحو لينا واكلنا بس . ردت لي ي سغيله . عايزه تفاصيل دقيقه حرف حرف . ضحكت وقلت ليها سمح .!

جهزو الفطور  عصيدة وملحات( تقيله ونيعميه) فول. شيعريه. مربى. طحنيه .. الخ

نحنا زاتنا بعد خلصنا قعدنا وفطرنا .كبيت لي شاي ودخلت الصالون . كان في نسوان كبار بتنوسن. شلت كرسي ختيتو ع طرف وقعدت .
بعد خمسه دقايق جات فطوم ، قعدنا ندردش ل بعد الصلاه . بعدها قمنا صلينا وواصلنا وونسه.

تلفوني كان في الشاحن جنبي شلتو ورفعتو الساعه كانت عامله وحده ونص . قلت ل فاطمه برنامجكم مش بعد العصر؟ قالت لي اي ٤ كده . ماشه البيت؟ قلت ليها لالا عايزه اتاكد بس.
م عدينا دقيقتين جات سلمى بت خاله فاطمه . بت ظريفه وعسلل. مسكناها ونسه تقيله.

تلفوني كان صامت . شاشتو تضوي ساي . وانا م جايبه ليهو خبر الا بعد فطوم قالت لي: شوفي الساعه كم . نقوم نشوف لو محتاجين مساعده ولا لا النسوان ديل ! وهو كان اصلا مقبل ع وشو . لقيت كم مكالمه من عُمر💗قلت ليها : الساعه ٣، قامت ع حيلا وقالت: ح اشوف واجي . سلمى زاتا لحقتا وفاتت.

جاتني راجعه وهي بتقول : قومي امشي بيتك بعده ساي . ماف حاجه تاني وشبه خلصو وخالتي زاتا سألتني منك وقالت لي كلمي لجين تمشي ترتاح وترجع بعدين .. احيي حظك عندك نسيبه عسلل . ابتسمت وقلت ليها ي حظي والله. ايلاف قاعده ولا مشت؟ ، ردت لي مع البنات ب هناك شغلات اتصورن ساي. انتي امشي وانا بكلما تلحقك. م نقوم نقطع ليهم جلسه التصوير . ضحكت وقلتا ليها طيب امشي انا.