البدوي العاشق

8

#البدوي العاشق (8)
#بقلمي : زينب امير

بعد موال العرس انتهى.. كنا قاعدين في الحوش وخصوصا في فرشه كبيره في الأرض.. فيها القاعده وفيها الراقده.. بنتناقش وبنتونس في أحداث العرس المرت علينا بكل تفاصيلا.. وقدامنا كبابي شاي وقهوه..بتعرفو شعور الزول البكون طول الوكت سرحان ومسهي؟! في شنو بالضبط م معروف.. بس اللهم سرحان.. عموما دي حالتي انا..اثناء قعدتنا.. لفتني صوتو وهو بقول : قهوه بس م عايزين شاي.. زي سبعه انفار كده.. لقيت نفسي بلتفت ع مصدر الصوت تلقائيا..كان واقف مع امو.. اللي هزت راسا وقالت ليهو سمح ي ابوي.. اتحرك مشى فات.. كنت بعاين ليهو لحدي م طلع من باب الشارع.. لكزتني رغد وهي بتقول لي بهمس : ارح معاي عايزه ادخل الحمام.. هزيت راسي بموافقه.. واتحركنا.. هي دخلت وانا بقيت واقفه منتظراها..

الكهرباء شكلها قطعت والجو بقى مسخن شدييدد.. غلبني النوم عديلل.. كنت بتقلب كتيرر.. لحدي م سمعتاا.. (الصلاة خير من النوم) مسحت وشي بيدي اليمين.. قمت بتكاسل وخمول عجيب.. كنت لابسه فستان بيت عادي لونو سماوي.. اتناولتا طرحتو من طرف السرير الراقده فيهو.. واول م طلعت من الغرفه لاقاني هوا بارد.. اتنفستا بعمق ومشيت.. كنت قاعده في المصلايه وبدعّي.. بعد انتهيت رفعتها وقمت.. اول سرير عيني وقعت عليهو اتوسدتا فيهو ونمتاا..

صحيت والشمس في وشي.. كنت نايمه جنب الحيطه وفي طرف الحوش كمان! رقيه ورغد كانو قاعدين في نفس السرير وبتونسو.. رفعت راسي وقلت ليهم الساعه كم؟ رقيه قالت لي صباح النور! قلت ليها م ركزت مصدعه شدييدد.. ردت لي الساعه سبعه ونص ومصدعه علشان الشمس دي في وشك والجو زاتو سخن .. نحنا زاتنا ياداب صحيناا.. قومي صلي علشان نشرب الشاي.. قلت ليها صليت انا ح اقوم اغسل وشي واجيكم.. لمن جيت راجعه دخلتا الغرفه.. لقيت بتين كده م بعرفهم بالاضافه ل رغد.. قالت لي اديك بندول؟ قلت ليها لا بشرب الشاي بس والصداع بِمش.. وين رقيه؟ قالت لي مشت تجيب الشاي أسي بتجي..

قعدنا يومين معاهم وفي اليومين الفاتو ديل شفنا معظم قريتهم دي.. الصراحهه هي سمحه شديدد.. كان من ناحيه المزارع  ولا من ناحيه الشكل العام.. اتعلمتاا اني فعليا م لازم احكم ع الكتاب من غلافو لازم اقراهو اول وافهمو..

زي عشره صباحا كده طلعنا من بيت العرس.. طبعا ده بعد اصرار شديد اننا نقعد لحدي م نفطر وياهو بعد فطرنا ورتبنا أمورنا طلعنا.. ركبنا في عربيتو وكان معاهو صحبو.. ونحنا البنات التلاته ورا. نسبه ل انو فاطمه قالت ح تاخد ليها يومين تلاته حتى ترجع.. علشان البيت لسه بناسو.. عاينت بالشباك وبقيت سرحانه في الشارع.. لابسه سماعاتي وبسمع في اغنيه(until i found you) (قبلي السفر ده بيوم.. كان كلمنا فاطمه اننا ح نسافر بعده.. حاولت تقنعنا نقعد شويه بس قلنا ليها م ينفع وانتو م قصرتو مننا وانبسطنا كتير معاكم والحمدلله.. قالت لينا شينه منكم.. اقعدو شويه ونرجع تاني سوا.. غايتو بعد محاولات من رقيه وكلمه مني وكلمه من رغد حتى خلتنا.. تاني يوم الصباح ونحنا بنجهز في نفسنا قالت لينا دامكم قررتوا تمشو.. ف ح تمشو مع عمر وأحمد هم اصلا كده كده ماشين الخرطوم.. ) جنبي رغد ومنها رقيه..بعد ساعتين العربيه وقفت جنب كُشُك صغير كده ببيع( لبان بسكويت سجائر شوكلاتات) نزلو الاتنين سوا.. رغد قالت لي عارفه! زهجتا انا.. من ركبتا ياها القعده الواحده دي اصلي م اتحركتا ولا غيرتها.. قلت ليها لاحظت فعلا مالك قال.. قالت لي بري.. حاسه شكلي غريب غري.. قبلي م تكمل كلامها.. جو راكبين تاني.. ومعاهم كيس.. مدا لينا صحبو وهو بقول اتفضلو ي جماعه.. استلمتو رغد وهي بتقول ليهو "بابتسامه" شكرا.. الشارع كان فاضي الا من تلاته اربعه عربات في الظلط.. الهوا كان بارد وهو طالع من فتحات المكيف.. والهدوء عامي المكان.. رغد بتتصفح ب تلفونها ورقيه ماسكه كتاب بتقرأ فيهو.. رجعت ضهري ل نهايه الكرسي وبقيت بعاين بالشباك.. لحدي م شويه شويه لقيت نفسي غفيت! بلمسات يد خفيفه بترتب ع راحه يدي فتحت عيوني بتثاقل وتعب واضح شديدد.. كانت رغد بتقول لي صحصحي معاي وصلنا.. ايوه لف شمالك وامش طويل وبعدها لف شمالك تاني.. رغد قبلت ع عمر السألها من وصف البيت وردت ليهو.. مسحت وشي بيدي وشلت شنطتي دخلت فيها التلفون والسماعه.. قفلت باب العربيه وبقيت واقفه جنب رقيه قلت ليها بصوت مرهق : نعسانه وعايزه انوووم قالت لي حتى انا والله متين اصل السرير بس.. نزلو الشنط واي زول شال حقتو بعدها شكرناهم وعزمناهم.. رفضو وقالو عندهم شغل ضروري علشان مسافرين في باقي اليوم ده زاتو.. اتحركو وفاتو.. رغد قالت لي نحنا زاتنا نمش يلا قلت ليها ادخلو اشربو مويه وارتاحو شويه قالت لي ها بت ها.. هدا ليهو البيت كم خطوه بس يلا.. نحنا اتنين بنمش سوا الا انتي براك علشان كده وصفت ليهو بيتكم قلت ليها تمام ي زوله يلا. قبلت ع رقيه وقلت ليها بكره معاي ها قالت لي م عندك مشكله..

#خاطره:
انت فقط من يُلفت انتباه قلبي دائما.. ♡

يتبع..