مَـــــــلاك بِــذُنــوب لا تُـــغـــــــفَــر🔥
بأنامــل ✏ : ربــاب نجمة.
بـَــــــــــراعــةُ عاهـِـــــــــــرَة 🌺
💫الـــجــــزء الـــحـــادي عــشــر💫
هزات التيليفون من الأرض وبقات كتلعب بيه فيديها وسنانها كيلعبو بشفايفها....تفكيرها تشوش، وعقلها ماقادرش يفكر فشي طريقة مناسبة باش تخبر بيها صاحبتها.....
وقفات كتمشي وتجي في داك المرر، فجأة هزات كتافها وهضرات....
أصالة: وأنا مالي ؟ علاش لي غانقوليها خلي عائلتها هي تكلف....وأنا ماعليا غير نواسي ونخفف.....
بقات كتسنى حتى خرج الطبيب وخبرها بلي حالتها مستقرة...طمأنها وانساحب...توجهات هي للحمام تقضي حاجتها حتى حسات بهاتفها كيڤيبري على فخاضها.... هزاتو وطلعاتليها مكالمة من باباها......
غسلات حالتها وغسلات يديها ونشفاتهم وجاوبات بعيون لامعة بفرحة....
أصالة: وافين ألواليد!!
ضحك بهدوء وهو حاس بالشوق من جهة بنتو الوحيدة....
علي: هاني توحشت بنتي الغزالة... شفتك مابقيتيش تسولي العفريتة....
شافت فالمرآة كتقاد عكرها ونطقات مخرجة عينيها....
أصالة: أنا مكنسولش حشومة عليك تقول هكا.... كيداير بعدا كلشي مزيان....؟
علي: بخير مني سمعت صوتك... غير هو كاين واحد المشكل....
استغربات والخوف تملك جسدها...
أصالة: أشمن مشكل يا ربي السلامة....
ضحك ونطق بمشاكسة...
علي: مليت الوحدانية خصني شي مرأة تعمر عليا الدار....
دلات شفتها السفلية ماعاجباهاش الفكرة ونهضات فيه فورا....
أصالة: يا والله أسي علي ودرتيها يا حتى نغبر عمرك تشوفني...
هزات يديها كتشوف فأظافرها وتنفخ عليهم...
أصالة: حتى نتزوج أنا بعدا وديك الساعة مانزيدك غير الخير.... واش تبغي بنتك فأخر يامها تحكم فيها مرات باها....
علي: على أساس نتي غاتسكني معها، الله يهديك أ أصالة إلا بقيت كنتسناك نتي حتى تزوجي غانموت أعزب.....
ميقات وعوجات فمها هاتفة بخفوت....
أصالة: سير سير دبا، خليني راني مشغولة حتى نجي وندويو فهاد الموضوع أبا علي يلاه تلاح.....
ضحك حتى بانوا سنيناتوا المستفين ونطق...
علي: وخا على مك كتجري عليا....
أصالة: إوا حدك تما الوليدة فالتيقار خليها مرتاحة فقبرها راك غير جيتيني با أما نديروا شي طاب وشي ماطاب....
ضحك وهي كذلك ضحكات من ديما علاقتها مع باباها علاقة صداقة كثر ماهي علاقة بين أب وبنتو.... منين كانت صغيرة والأب ديالها لاعب دور الأب والأم والأخ والأخت يعني كيحاول يملأ الفراغ لي خلاتو المرحومة.....
قطعات المكالمة وخرجات بإتجاه غرفة صديقتها... تسنات ساعة حتى سمحليها الطبيب باش تخرج صاحبتها.....
#يتبع...
أنت تقرأ
ملاك بذنوب لا تغفر
Actionبأنامل: رباب نجمة 🌟 قصة تجمع بين💫البراءة 💫حياة العهر 💫براعة عاهرة💫التضحية 💫حب بنكهة أخرى 💫الدراما 💫الجرأة والرومانسية💫الأكشن 💫الإجرام💫الإنتقام💫الإنتحار💫 قصة تخرق الخطوط الحمراء وتفجر الأسرار وتكشف عن ما وراء الستار الأحمر..... تكشف عن...
