🌸 නිදහස් හදවත් 🌸 [COMPLETED]

15

ඒ ගෙවුනෙ ජීවිතේ අමාරුම කාලයක්.

හිරණ්‍යට වගේම නිවර්තනාටත්.

සංසලා, විදෙස් ගත වෙන්න සියල්ල සූදානම් කර තිබියදී ගමන මගින් නවතා, පොලොන්නරුවට ගිහින් තිබුණෙ ඇයි කියලා හිරණ්‍ය දැනගත්තෙ සියල්ල අවසානයේ ඔහුට ලැබී තිබුණ මග හැරුණ ඇමතුම් සහ වොයිස් මැසේජ් නිසා.

" Hiranya, ඔයා කියපු දේ ගැන මම ගොඩක් හිතුවා. ඇත්තටම මම නිසයි මේ හැමදෙයක්ම වුණේ. If possible forgive me"

ඒ පළමු වොයිස් මැසේජ් එක.

ඉන් පැයකට පමණ පසු දෙවන මැසේජ් එක ලැබී තිබුණා. එහි තිබුණෙ හරිම කැළඹුණ හඬක්.

" හිරණ්‍ය, ඔයා යන්න එපා. මට මොකක් හරි අවුලක් ඇති කියලා දැනෙනවා. ඩැඩී ගත්ත කෝල් එකකින් තමා මට ඇහුනෙ, කෙල්ලො, නිල්හාන් පොළොන්නරුව කියන වචන. එයා කවදාවත් මේ වෙනකල් එයාගෙ අය එක්ක කරන කතා මට ඇහෙන්න කරලා නෑ.. හිරණ්‍ය please answer the phone. Its a trap"

" මම හිතුවෙ නිල්හාන් මගෙ ගැන ඔත්තු බලනවා ඇති කියලා, ඒත් දැන් මට බයක් දැනෙනවා. ඔයා කිව්වා වගේ මම නිසා ඔයාලට ආයෙත් අමාරුවේ වැටෙන්න දෙන්නෙ නෑ මම. මම එනවා..."

ඉන්පසුව දිගින් දිගටම සංසලාගෙ කෝල් ඇලර්ට්ස් තිබුණත් නිහඬ කරලා තිබුණ දුරකතනය නිසා ඒ සියල්ල හිරණ්‍ය දැනගනිද්දි පමා වැඩි වුණා.

හිරණ්‍ය සුරත් එක්ක ගණුදෙනු කලේ වෙනම දුරකතන අංකයක් හරහා. ඒ තමන්ගෙම ආරක්ෂාව වෙනුවෙන්. ඒ දුරකතනය ඒ රැයම අවදිව සිටියත් සංසලා පණිවිඩ එවූ දුරකතනය නිහඬ කර තැබීම ගැන හිරණ්‍ය දිගින් දිගටම තමන්ට දොස් පවරාගත්තා.

සංසලා තමන් ගමන් කළ කැබ් රථය නැවත හරවාගෙන පොළොන්නරුවට එන්න තීරණය කළේ තමන්ගෙ වචන නිසා කියන හැඟීම හිරණ්‍යට දිගටම වද දුන්නා. ඒත් ඒ වෙද්දිත් හිරණ්‍ය පමා වැඩියි.

තමන්ගෙ පාසල් කාලෙ ඉඳලම හිටිය හොඳම මිතුරියන්ගෙන් කෙනෙක් වුණ සංසලා අන්තිමේදි සියල්ල අත් හැර නිදහස් වෙලා යන්නම යන්න ගියා.

නිල්හාන් අතින් නිදහස් වුණ වෙඩි උණ්ඩය අවසානයේ නතර වුණේ සංසලාගෙ හදවතේ. ඇයට වචනයක් කියාගන්න තරම්වත් අවස්තාවක් වෙඩි උණ්ඩය ලබා දුන්නෙ නැහැ.