الــمـَــاو

11

✨الــــمَــــــــــــــــــــــــاو✨

✍️بقلمي : سناء_الصنهاجي

🔥الفصل الثاني : كافيين🔥

- كانت هاديك هي أخر مرة شامة غادي تشوف جنيد كيدور بيها من ديك الليلة ، الغد مشافتوش نهائيا ... زينب عيطات على توفيق علماتو على قبل الخطوبة ديال سامية لي غادي تكون فسيمانة الجاية ،، وعلماتو على ود زياد وإيمان ، حتى واحد مدا مجاب على قبل السلسلة لي فعنق شامة ، ولا على سكاتها ... داز نهار الاحد عادي ... ناس فرحانين وناس مكوي قلبهم بنار الحب وناس تايهين معارفين راسهم من رجليهم .. شامة هي العنصر لي كانت تايهة وعقلها محاضرش ، معاها ماعندهاش الݣانة ، عقلها كيدي ويحيب .. ونفس الوقت مندماتش على قرارها بنسبة ليها صحيح .. وكلامها كاملو لي كالتو لجنيد صحيح .. تنهدات تنهيدة طويلة كدور فبيتها ، البيت لي مابقى ليها والو وغادي تودعو ، دوزات فهاد الدار أيام زوينة بزاف ... أيام عمرها تنساهم وعائلة عمرها تنساها وعمرها شافت بحال طيبتها .. ولكن لكل بداية نهاية ، جا الوقت لي تبدل حياتها كلها ... ودفن شامة القديمة وتحط فبلاصتها شامة جديدة ، هدفها الاول هو المستقبل ديالها ودير علاش تولي ..

- طلات من السرجم كتبان ليها واحد المرة مقابلة معاها واقفة فالبالكو ، فالڤيلا لي قدامهم .. كتشوفها واقفة كتبان ليها داخت وطاحت على الكرسي .

- شامة (شهقات) : ويلي ويلي ، السيدة طاحت مسكينة .. خرجات من بيتها غير بتيشورت وسروال ديال بيجامة وكلاكيطة ، هبطات كتجري مع الدروج حلات الباب وخرجات على برا .. غادية كتجري قطعات الشانطي وقفات قدام باب الڤيلا ... سونات وتسنات شي حد يجاوبها ... كتسوني كتسوني ولكن والو ..شوية بدات كضرب فالباب بجهد حتى تحل على غلفة ..

- كان قدامها واحد الراجل كبير فسن كيشوف فيها بفضول ..

- شامة (بلهفة ) : واحد المراة عندكم راه طاحت ..

- عبد الرحمان : كيفاش ؟

- شامة (دفعاتو ودخلات كتجري) : واحد المرأة الفوق طايحة فالبالكو ..

- عبد الرحمان (مخلوع) : الفوق البيت الاول على يدك ليسر (طلعات سبقاتو حيت هي خفيفة وصغيرة ) وصلات لفوق حلات باب البيت لي ݣاليها ... ودخلات كتجري نيشان للبالكو كتبان ليها سخفانة على الكرسي ..

- شامة (تحنات عليها كتحرك فيها) : لالة لالة فيقي لالة ..

- عبد الرحمان (دخل مخلوع) : عالية عالية ..

- شامة : واش مريضة ولا شنو واقع ليها ؟

- عبد الرحمان : يمكن السكر نزل ليها .

- شامة : واش مالف كينزل ليها ولا كيطلع ؟

- عبد الرحمان : لا كينزل ليها ..