الــمـَــاو

5

✨الــــمَــــــــــــــــــــــــاو✨

✍️بقلمي : سناء_الصنهاجي

🔸الفصل الأول : ميدنايت

- #كازا

- خرج سيف من الخدمة .. ركب فطوموبيلتو وشد الطريق لدارو .. قبل مايوصل لدار نزل حدا الكتبية ... خدا الكفتة ، داز لعند مول الحانوت خدا الخبز وسقاتة او واحد القرعة ديال كوكا ... عاد مشا لدار ، دخل طوموبيل لكاڤ وطلع فلاسنسور لدارو ... حل ودخل ساد الباب برجلو ... مشا للكوزينة حط داكشي لي جاب .. خارج من الكوزينة كيحيد فتجاكيط ديالو لاحها .. مشا نيشان لبيتو دخل للحمام زول حوايجو طلق عليه الما كيحيد العيا .. خرج نشف راسو ولبس حوايج دار .. دخل لكوزينة جبد البيض ومطيشة .. قاد لراسو طاجين ديال الكفتة .. خلاه كيطيب ومشا لصالون شعل تلفازة وݣلس كيرتاح .

- سونا عليه التيليفون .

- سيف : ألو الواليدة .. لابلس الحمد لله يلاه كنت غادي نسوني عليك .. قسما بالله مانسيتك راه يلاه دخلت لدار ، دوشت ورضيت العشا يطيب وݣلست نرتاح .. أنت مزيانة الواليد .. الحمد لله(بدل سيفتو) الواليدة الواليدة ، واش غادي نبقاو نهضرو فهاد الموضوع بزااف ... واش انا لاقي الوقت حتى لراسي بقا غير نقلب على المرا ... أنا مرتاح بحال هكا الماكينة راه كتصبن الحوايج .. وكاينة مكينة كتغسل الماعن .. وانا راه كنطيب راسي وكتحي لمرا من سيمانة لسيمانة كتضربها بتخميلة لدار وهاحنا ناضيين .. انت ديها غير فراسك وصحتك .. امين ياربي أمــــين ، يلاه الواليدة سلمي على الواليد وعلى لي سول فينا .. أمين أمين تصبحي على خير احبيبتي .

- تنهد تنهيدة طويلة ، شوية تفكر طاجين ناض كيجري ... لقاه نشف بقا ليه شوية ويتحرق .

- سيف : شفتي الواليدة شنو كنتي اديري .. كنتي اتخلينا نباتو بلا عشا .. طفا على طاجين خلاه محلول باش يبرد ورجع لصالون ..

__

- خرجات شامة من الدوش ... نشفات شعرها مزيان حسات براحة ... لبسات سروال ديك بيجامة مع تريكو وقبية ... هزات تيليفونها دارتو فشارجور ، خدات واحد الزيف ديال حياتي دارتو على شعرها ... لبسات تقاشر عاد خشات رجليها فبانطوفة .. حلات الباب كتشوف فالبيبان ، بغات تهضر مع باها ماعرفاتش أشمن بيت عطاوه ... دقات على إيمان ، شوية وحلات ليها ..دخلات عندها :

- بيتك زوين اجنية ..

- إيمان (تلاحت على نموسية) : ماسخيتش أختي نخرج منو ..

- شامة : اجي نݣوليك ، ماعرفتيش فين بيت با ..

- إيمان : ماعرفتش وقيلة شي واحد من دوك البيوت لي لهيه .. بلاتي نلبس بانطوفتي ونجي معاك .

- لبسات إيمان بانطوفتها ودارت عليها بينوار ديال بيجامة .. حلات الباب وخرجو بجوج غاديات كيقلبو على بيت علي ... تحل الباب وخرجات منو صوفيا ، وقفات كتخنزر فيهم .