الــمـَــاو

15

✨الــــمَــــــــــــــــــــــــاو✨
✍️بقلمي : سناء_الصنهاجي
📍الفصل الثالث : خيوط العشق📍

  - حلات شامة الماريو ديالها ، جبدات اللبسة لي غادي تلبس ، كتجبد حوايجها وعقلها مكاينش ... عقلها مرفوع مع التصويرة لي شافت ، كيفاش جنيد يكون موديل او وجه إعلامي ، عمرها جات لبالها نهائيا ... بدلات حوايجها ولبسات اللبيسة لي جاتها زوينة وعلى فورمتها ، طلقات شعرها دارتها ريحتها هزات ساكها دارتو على الحنب هزات السوارت وتيليفون وخرجات ..

_______
- فبزار خاص للمفروشات ، معلقين طلامط زرابي ... المحال كان كبير وأنيق ، البيرو كان ديال الخشب فالبيج مع كراسة فالأحمر ، الحاج أسماعيل كان ݣالس ورا البيرو ديالو ... معاه السيد لي مقابل ليه المحال ..

- وقفات طاكسي ونزلات منها شامة ، خلصات او وقفات كتشوف فالواجهة ديال المحال ، هادي هي الوقت لي كيكون فيها الحاج فالمحال ..

- شامة (تنهدات تنهيدة طويلة) : بسم الله توكلت على الله ، اللهم يسر ولا تعسر ... توكلات على الله ودخلات ، السيد لي خدام مع الحاج غير شافها وسكت عند بالو كليانة ..

- شامة ( بإبتسامة) : السلام عليكم
- الحاج : وعليكم السلام ، مرحبا الالة ..
- شامة : الحاج إسماعيل شمسي؟
- الحاج : أياااه هو هذا ، أش حب الخاطر أبنتي ؟
- شامة : سي الحاج ، الى كان ممكن بغيت نهضر معاك ومديرهاش مني قلت صواب ، مغاديش نعطلك ..

- الحاج (بإستغراب) : تفضلي أبنتي ݣلسي .. ݣلسات شامة حادرة عينيها ، الحاج كانت عندو واحد الهبة ، لابس جلابة بيضة وطربوش فالحمر ..

- شامة(خلات السيد حتى مشا وضارت عند الحاج) : سي إسماعيل ، انت تبارك الله السمعة ديالك سابقاك ماشاء الله ، وكولشي كيشكر المحالات ديالك وخدمتك ..

- الحاج : الحمد لله هذا من فضل الله ، كملي أبنتي كنسمعك ..

- شامة : انا كنت خدامة فمعمل ديال الحوايج ، وخرجت منو شحال هادي بلاما ندخل فتفاصيل كثر ... عندي ديبلوم ديال الخياطة ، ومكرهتش اسي الحاج نخدم معاكم نكسب خبرة كثر ، واخا عندي ديبلوم ولكن تبارك الله عليكم أستاذ ومكرهتش نتعلم منك ، انا راه اي حاجة ݣلتيها نديرها وراسي خفيف ونتعلم ، وعندي مع البيع والشرا فاش ماحطيتيني تلقاني ..

- الحاج (ضحك) : باين عليك أبنتي ، الصراحة انا عندي 3 ديال البنات ، وحدة فمحال الحرير وجوج فمحال الثواب ... ودابا مولات الحرير تزوجات الله يسهل عليها ، ولي فمحال الثوب مشات للموضعها ، ودابا ناقصني بنت ... ولكن ابنتي سمحيليا ومديريهاش مني قلت الصواب ، أنا كنبغي لبنات لي يكونو خدامين عندي يكون محجابات ..
  - شامة : هادشي أنا عارفاه الحاج ، وكان ممكن نجي بالحجاب ونكدب عليك ، وتخدمني وغير نخرج من الخدمة نحيدو كيف دايرين بزاف ديال البنات ، بلاما نݣوليك الحاج انت عارف هادشي ، ولكن انا باغية نخدم بنيتي ... مابغيتش ندخل بالغدر باغية نخدم بصفا النية ، وحتى دابا اسي الحاج الله يكبر بيك عطيتيني وقتك ... وقفات شامة أشرات ليها براسها وعطاتو بظهر غادية ..