أحزان الكمان

البداية 4

فى الصباح وعلى غير عادتها إستيقظت حسناء مبكرا وعندما خرجت من حجرتها نظر لها والديها بدهشة وسألتها ليلى: خير يارب بقالى سنين مشفتكيش بتصحى بدرى ..

أنس عزمنى على الفطار فى الفندق ومش عايزة أتأخر عليه إنت عارفة إنه بيحب يصحى بدرى.

نظرو لها بدهشة وسألتها ليلى: أنس عزمك!!

أيوه ياماما مستغربة ليه ؟.. أنا نازلة بقى أشوفكم بعدين...

خرجت حسناء بسرعة وقال صالح: غريبة ! أنس يعزم حسناء ليه؟؟

الموضوع ده فيه إن.... إستنى ..

هاتعملى إيه؟

هاطلب أنس طبعا ..

إستنى هاتقولى له إيه؟؟

دلوقتى تسمع,

إتصلت ليلى بأنس وعندما أجابها قالت: أنس صباح الخير...

صباح الخير ياعمتى أخباركم إيه؟

الحمد لله هاروح النهاردة المحل ,جدولك إيه النهاردة ياحبيبى ؟؟.

مفيش أنا بأفطر وهاروح أقابل الموظفين اللى إخترتهم.

بتفطر لوحدك؟؟؟

أيوه لوحدى هافطر مع مين هنا؟

أشارت ليلى بإصبعها لصالح وقالت: هاشوفك النهاردة فى المحل..

مش عارف ظروفى والله ياعمتى بس أكيد هاحاول آجى..

خلاص هانستناك, أنا ونغم...

وبعدين ياعمتى؟

ضحكت ليلى: هو أنا قلت حاجة .. متتأخرش بس..

ماشى إن شاء الله.

أغلقت ليلى الهاتف وقالت: بنتك بتكذب, أنس بيفطر لوحده ..

وليه مقلتيش إنها رايحة له؟

سيبها تروح ويحرجها علشان تتعلم....

البنت دى عايزة وقفة ياليلى.

متقلقش ياحبيبى أنس هايوقفها عند حدها المهم أحكى لك بقى أنس باينه بدأ يحب..

يحب!! مين؟؟

هاقولك...

....

كان أنس يشرب قهوته وفكر فى نغم فأمسك هاتفه وأرسل لها رسالة على الواتس: صباح الخير, هاتروحى المحل إمتى؟

إنتظر بلهفة إجابتها وأمسك هاتفه بسرعة عندما جاءته الرسالة وقرأ : صباح النور , أنا فى المحل دلوقتى.

طيب إعملى حسابك هاجيب غداء النهاردة وآجى ..

تانى!! مالوش لزوم تكلف نفسك..