سحرتي قلبي"مكتملة"💕(باللهجة الجزائرية)

الحلقة 1 🌻

سلام لبناااااات ان شاء الله يعجبكم الكرووووونيك تفاعلووو 🙏💜
.
____________
.
.

واش نزيد ...نحكيلكم على بابا ...سامحوني مانعرفوش يدخل و أنا راقد و يخرج و أنا راقد و اكثر الوقت مسافر و مشغول ...

هذا كامل ماهمنيش المهم عندي ريحة أم و أب ...بصح لا مافضتش عند الحد هذا ماتفاهموش و حبو يطلقو و كل واحد فيهم باغي يتخلص من نتائج الزواج هذا الي كان أنا .... بصح نكرههم و مانسامحهمش و أنا خير منهم و خيرت نهنيهم من همي و نراهنكم أنهم ما حوسوش عليا خلاااااه.

لقاني راجل كبير نهار مطر و ريح الناس كامل في ديارها و لابسة قشها و أنا كنت عريان و حفيان و نرجف تحت المطر ...حن قلبو عليا و داني معاه ... "عمي الساسي" كان يخدم سراق و علمني كل شيء علمني نقرأ و ننجح و نكذب و نسرق و نولي راجل و نعول على روحي علمني معنى تمرض و عبد يسهر عليك يخاف عليك و يحبك أكثر من والديك ...

عمي الساسي العام كي لقاني كان عندو وليد خوه مات في أكسيدون و الصدفة قدي في العمر مابلغش على وفاتو و عشت طول عمري بالهوية تاعو ...قريت و

كبرت و وليت راجل و درك عمري17 سنة عمي الساسي مرض و حبس الخدمة

(السرقة ) و مابقالناش بواه نعيشو ...

كبرت و أنا نسمع في عمي الساسي يقول السرقة في السراق حلال و يقلي يا منيب ولدي النهار الي تسرق ماتسرقش زوالي كيفك أسرق واحد يسرق في صوارد الزواولة و قعدت هدرتو في راسي دور ...

حتى جاء النهار الي قررت ندير أول سرقة كبيرة ليا ... ولازمني نخير عبد مشهور بالفساد تاعو و ماكلت مال الزواولة ...

منيب : شوف لكن راح تضربك الخلعة غير قلي درك و ماتروحش معايا خلاااه ..

أمين : خسارة عليك شريكي رانا ليزوم ...

منيب : بللللع قالك ليزوم و انت تشوف الدولة تخرى على روحك ....بصح المرة هذي مادير والو... أوقف في الباب تشوف واحد داخل بيبيلي ...فهمت ؟؟

وصلنا لباب الدار تاع رئيس البلدية الي خلااااها و كلاها كل في كرشو وواحد ما خذا معاه لا حق لا باطل ظالم و حڨار و ناس البلدية كل شاهدين أنو عبد رخيس ...عسيت دارو حتى عرفت أنهم رايحين للعرس ستنيتهم يروحو و يرقدو ....طفاو الضواو و كانت الساعة12 تاع الليل دخلت بعد ما حليت الباب الصغير تاع الدار الي جاي على جنب أمين واقف يعس...و أنا كانت ليلة سعدي ... دخلت نحوس على صوارد ولا ذهب المهم الحاجة الغالية الي تسوى ... نشوف نلقى الكوفر تاع الذهب معبي و محطوط فوق طابلة في الصالون خرجو عينيا من راسي و أنا نشوف في هذاك الذهب كل ...هزيتو و أنا طاير بالفرحة جيت خارج حتى نتلاقى طفلة صغيرة هي تشوف و أنا نشوف معاها ترسمت صورة هذوك العينين في مخي جات تحل فمها تعيط ضربتها بحاشية الكوفر طاحت و خليتها في نص دمها غارقة خرجت نجري كنت هاز في يدي قيمة مليار ذهب بصح عقلي خليتو في الدار عند الطفيلة الصغيرة هذيك

أمين : واش عملت ؟؟ منيب : والو هيا نروحو ...

أمين : واش فيه ؟؟ منيب : فارغ حسبتو فيه بصح لقيتو فارغ ..

أمين : هات نشوف ...

منيب : نحي رب يدك روح *** عليا روح تروح قتلك فارغ ...كنت رايح للدار و الخلعة في قلبي نكون قتلتها ؟؟ عمي الساسي : منييييب هذا أنت ؟؟ منيب : هيه أنا ...

عمي الساسي : ڨدم عندي واش بيك واقف في الظلمة ؟؟ دخلت عندو ووجهي يمد الخبر ....كنت نرجف و هاز الساشي الأكحل هذاك الي في نصو الكوفر و نخبي فيه من وراء ظهري ...

عمي الساسي : واش بيك بسم الله الرحمان الرحيم تقول قاتل روح ...؟؟ وواش في يدك ؟؟ ماحسيتش بروحي كيفاه تربعت في الأرض و حطيت يديا فوق راسي و بديت نبكي ...قتلتها ....

و الدقيقة هذيك عمي الساسي تنطر من بلاصتو وقف و حكمني بيد وحدة و لصقني مع الحيط (ماقلتلكمش عمي الساسي راجل ضخم و كي تشوفو من بعيد تخاف ) شكون قتلت...

منيب : والله ماقصدت والله غلطة ماعلاباليش إذا ماتت ولا لا والله موش بالعاني ....

‘________________________
حبوباتي تفاعلوا نكمل 🙏😎