سحرتي قلبي"مكتملة"💕(باللهجة الجزائرية)

الحلقة 5🌻

الحلقة 5••••••••
•
•
«»«»«»«»«»«»«»«»«»«»

|

روحت للدار و لقيت عمي الساسي قاعد مع راجل محترم كان باغي يشري الدار و الحنوت..الظاهر تفاهمو على كل شيء و سهل ربي في رجعتنا لدزاير تصدقوني قلبي قابضني و موش عارف علاه مع أنها قضية السرقة تسكرت و مابقالي من واش نخاف ممكن خايف من الي مخبيتهولي الأيام ... كملت إجراءات البيع تاع الدار و الحنوت و الله يبارك صوارد كبيرة ...

سرين : خلاااص موش باش نشوفك بعد اليوم ؟؟ منيب : أوووه علاه تبكي دزاير و تونس خطوة من الي يكون عندي وقت نجي نطل عليكم .. ..كاش واحد ينسى أختو ؟؟ سرين : (تمسح في دموعها ) أي أي أختك ...باهي ربي يسهل طريقكم ....(راحت تبكي و تخبي في حزنها و حسرتها )

سرين عشقت في منيب من أول نهار شفاتو فيه في الحومة النهار الي داتلهم فيه صحن الملوخية ...

عمي الساسي : هيا منيب راح الحال ...

ركبت في الطوموبيل بعد ما ودعنا جيرانا و أحبابنا و بديت نمشي و نخمم ...مانعرف علاه وليت نحس سرين حساسة النهارين هذم ...

عمي الساسي : الحب يا وليدي و مايدير ..

منيب : سرين تحب ؟ شكون ؟ وقتاه ؟؟ عمي الساسي: ياخي بهيم ياخي أنت في كل شيء طاير غير أمور الحب و الغرام نقلك بهيم تقلي راني هنا ...الطفلة طايحة فيك من الي شافاتك الناس كل علابالها ...

منيب : تحبني أنا ؟ لااااااا كل عمري نتعامل معاها كي أختي جامي قلتلها حاجة تخليها تحبني ...

الساسي : القلب و مايريد ...

منيب : وعلاه ما ولهتنيش ؟ علابالك بيا معقد درك باه تقلي يا عمي ....

الساسي : خليها للأيام هي الي تفرق و تلم ...

وصلنا لدزاير ...و تلاقينا الحباب و الجيران و فرحو بينا الناس كل ...

قعدنا عند واحد من صحاب عمي الساسي بين ما ريقلنا أمورنا قررنا نشريو دار نسكنو فيها ...كنت نخرج ندور في المدينة نحوس على دار حتى نلقى دار المير للبيع ماعرفتش علاه سقسيت على المالك تاعها مابقاش المير ساكن فيها و قررت نشريها مانعرف علاه.

أمين : واش راك شريكي ؟؟ منيب : أهلا بالبق والله غير خدمت لاطاي ههههه

أمين : الله لا يتربحك مازلت تشفى ؟؟ منيب : وعلاه حاجة تتنسى؟ واش حوالك واش داير فيها ؟؟ أمين : مازلت نقرأ هاني مع الجامعة ... و انت هاك ريڨلت أمورك الطوموبيل و الخدمة و بقيت أنا ...

منيب : عمي الساسي ظهر عندو رزق كبير في تونس خلاتو أمو ...الحمد لله فرجها علينا ربي .

أمين : أحشيلي أحشيلي هكاك عمي الساسي و بتاتي و باتاتا ماتكلخنيش خلااااه دفناه مع بعضانا...و ديت كل شيء و خليتني بصح أنا فحل عليك ماحكيت والو و سرك في بير ....

منيب : واش راك تهدر أنت ؟؟؟

♕♕♕♕♕♕♕♕♕♕♕♕♕♕♕♕♕♕♕♕
كملت الحلقة قولولي الا عجبتكم 💞👻