အစ်မ (သို့) "မ"

Insecure

ဒီနေ့ ဖုန်းထဲမှာ အစ်မပြောခဲ့တာလေးကို
စိတ်ထဲစွဲပြီး ဆက်တိုက်တွေးနေမိတယ်
ဘတ်စ်ကားပေါ်မှာ ကောင်မလေးတယောက်နဲ့တွေ့ခဲ့တယ်တဲ့
သူကအရမ်းချစ်စရာကောင်းလို့ အစ်မနောက်ထပ်တွေ့ချင်မိတဲ့အထိ ဖြစ်နေခဲ့တာ
ရယ်ရယ်မောမောနဲ့ ပြန်ပြောနေပေမယ့် ညီမရင်ထဲမှာ ခံစားချက်တွေ‌ ပေါင်းစုံဖြစ်သွားတာကိုတော့ အစ်မသိမယ်မထင်ပါဘူးလေ
အဲ့ဒါက သ၀န်တိုတာလားလို့မေးရင် မဟုတ်ဘူး
ပထမဆုံး၀င်လာတဲ့ ခံစားချက်က ကြောက်တာ
အစ်မများ သူ့ကိုသဘောကျသွားပြီလားပေါ့
ဒုတိယခံစားချက်က စိတ်မလုံခြုံတာ
ညီမက သူ့လိုချစ်စရာမကောင်းသလို ရုပ်လည်းဆိုးတယ်လေ
တတိယခံစားချက်က ကျေနပ်တာ
အစ်မရဲ့တနေ့တာအကြောင်းကို အသေးစိတ်ပြောပြနေတော့
ညီမက အရေးပါတာပဲလို့ ခံစားရပြန်ကော
နောက်ခံစားချက်က အံ့ဩတာ
တခါမှ မိန်းကလေးတယောက်အကြောင်း
ပျော်ပျော်ရွှင်ရွှင်နဲ့ အစ်မမပြောခဲ့ဖူးဘူးလေ
နောက်ဆုံးခံစားချက်ကတော့ စိုးရိမ်တာ
အဲ့ကောင်မလေးနဲ့ နောက်တခေါက်ထပ်တွေ့ခဲ့ရင်
ဘာတွေများဖြစ်မလဲ
သေချာတာတစ်ခုကတော့ အစ်မသူနဲ့ရင်းနှီးသွားမှာ
နောက်ပိုင်းကိစ္စတွေကိုတော့ မတွေးတာကောင်းပါတယ်လေ

ညီမ ထပ်ပြီးအတွေးတွေလွန်နေမိပြန်ပြီ
မဖြစ်လာနိုင်တဲ့ကိစ္စတွေကို တကယ်ပါပဲ
အခုချိန်မှာ အစ်မမွေးနေ့အတွက်ပဲ အာရုံစိုက်ရမှာ
နောက်လအစ်မမွေးနေ့မှာ အစ်မနဲ့အတူအပြင်သွားဖို့
စီစဉ်ထားခဲ့ပေမယ့် အစ်မကတခြားသူနဲ့ချိန်းထားတယ်တဲ့
မကျေနပ်ချင်ပေမယ့်လည်း အစ်မကိုစိတ်ရှုပ်အောင်မလုပ်ချင်ဘူး
တခြားရက်မှာ သွားလို့ရနေတာပဲမလား
အရေးကြီးတာက အစ်မကိုပျော်အောင်လုပ်ပေးဖို့ပဲလေ
အဲ့အတွက် ညီမပိုက်ဆံစုနေတယ်
အစ်မအတွက်ရော ညီမအတွက်ရောပေါ့
ညီမအတွက်ဆိုတာက အပြင်အဆင်ကိုပြောတာပါ
အရင်ပုံစံကို နည်းနည်းပြောင်းပြီး အစ်မရှေ့သွားကြည့်မလားလို့လေ
မချောရင်တောင်မှ အနည်းဆုံး ချစ်စရာလေးလို့ထင်ကောင်းထင်နိုင်တာပဲလေ

အစ်မနဲ့ ပတ်သက်ပြီးသဘောကျရတဲ့အချက်ထဲမှာ
အဲ့ဒါလည်းပါတယ်
အစ်မက ညီမကို တဖြည်းဖြည်းနဲ့ပြောင်းလဲစေတယ်
‌ကောင်းတဲ့ပြောင်းလဲခြင်းတွေပေါ့
ပြန်စဉ်းစားကြည့်မယ်ဆိုရင် အခုလုပ်နေတာတွေတော်တော်များများက အစ်မနဲ့သက်ဆိုင်နေတယ်
အစ်မနဲ့နီးစပ်နိုင်တယ်ဆိုတဲ့ အတွေးနဲ့တင် ညီမအရာအားလုံးကိုလုပ်ခဲ့တယ်
ဒီအချစ် ဘယ်လောက်ထိခံမလဲတော့မသိပေမယ့်
တချိန်ချိန်ပြန်လှည့်ကြည့်တဲ့အခါ အစ်မက ညီမချစ်ရတဲ့လူတယောက် အမြဲတမ်းဖြစ်နေမှာ