خالد وفريده ؛
قام خالد وهو يشوف فريده باقي نايمه صلى الفجر وجلس يتأملها : في ذمتي انك حلوه وين جمالك عند البريطانيه ! اول مره آيد اختيار امي والله
تحركت بانزعاج من شعرها اللي على وجهها
ابتسم خالد وتقدم وهو يبعد شعرها لامست اصابعه خدها البارد فزت فريده وهي تناظر فيه : يمه
ضحك خالد : وش؟
ضحكت فريده وهي توها تستوعب
ابتسم خالد لضحكتها : مااكل ترا !
فريده : مين قال انك تاكل الحين؟
خالد بابتسامه : اوف يابنت متعب ، بتشخصنينها من البدايات؟
فريده : عاد انا ملكة الشخصنه
خالد : ملامحك جمالك ضحكتك كلها تخفي شخصنتك
فريده ارتبكت : بقوم اصلي
قامت وانسدح خالد على ظهره : والله وطحت ياخويلد هذا وهو مامر الا ايام كيف ثلاث شهور !
.
يوم زواج ( سيف & وتين )
الهنوف وعيالها ؛
الهنوف : كلمي سالم يجي يودينا القاعه
وسن وهي تفرك عيونها : الساعه سبع يمه وين نروح !
الهنوف : وش وين نروح؟ احنا اهل العروس لازم اول المتواجدين
وسن بهمس : امحق اهل وامحق عروس
مهند : يمه وسن تقول احنا امحق اهل ووتين امحق عروس
الهنوف : وسن وبعدين معك؟
وسن : طيب عادي اكلم حور تجي تروح معنا؟ بطفش لحالي هناك وباقي بدري
الهنوف : طيب كلميها اذا صاحيه نمرها
وسن : طيب ، طلعت تكلمها
مهند تذكر فهد من طاري حور : وانا بكلم فهد يجي هنا وقبل العصر نروح القاعه راح وهو يرسل لفهد " ولد تعال بيتنا بيروحون القاعد مابيقعد الا انا واتمنى ماتجي بيدك فاضيه جب معك فطور بموت جوع "
رد فهد " طيب "
الهنوف : تمام
وسن : يمه اصبري خلينا نتاخر شوي فيصل بيجيب حور الحين
.
حور ؛
كانت تهوجس بعد ماجاها حساب وهمي وارسل لها
" نسيتيني؟ " قاطع هواجيسها اتصال وسن
وسن : بنت
حور : هلا
وسن : اسمعي تكفين تعالي روحي معنا طفش وبنروح القاعه من الحين
حور : طيب بسأل امي واكلم فيصل بس عندي شرط
وسن : وش؟
حور : مكياجي وشعري عليك
وسن بشهقه : ليه ياروحي؟ خلفتك ونسيتك؟
حور بضحك : اجل دزي مابجي
وسن : خلاص كلي تراب وتعالي
حور : اوك
وسن : يع يع تكفين اكره اللي يقول اوك قولي طيب وتراب بفمك بعد
حور وهي قاصده تستفزها : اوك بيبي
قفلت وسن في وجهها وهي تضحك
.
مها وشريفه ؛
شريفه : وش الحل؟ صار لك قرب الشهر وهو راميك كذا وهايم في العسل مع الحيوانه اللي معه
مها : هذي خططك شفتي وين وصلتني؟
شريفه قربت وهي تمسك شعرها : لا تحطين العله بخططي تذكري لو ماهي خططي ماكان تزوجك سعود
مها بضحكه : السحر تسمينه خطه؟
شريفه وهي تشد على شعرها : السحر ذا اللي مستهينه فيه زوجك بحبيب القلب اذا باقي تتذكرين حبيبتي
مها : ليتني اقدر انسى
شريفه بغمزه : زي ماسحرناه وتزوجك نسحره ويطلقها
.
سعود وناديه ؛
ناديه بابتسامه وهي تشوف سعود توه قايم : صباح الخير
سعود بابتسامه مماثله : صباح النور يااللي ماشفت النور الا من يوم عرفتها
ناديه بضحكه : اوف كلام كبير !
سعود ابتسم : ضحكة من ثغرك حياة لقلبي
ناديه : شرايك اعلمك خبر يحيي قلبك صدق؟
قرب سعود وهو يجلس قدامها اردف باستغراب : خبر وش؟
ناديه مدت له السونار وتحليل الحمل : قريبًا بينور عبدالله بن سعود
سعود وهو مااستوعب : كيف
ناديه وهي تضحك على فهاوته : احسب من الحين ٩ شهور وتصير اب يافاهي
نط سعود واردف بصدمه : حامل؟
ناديه بابتسامه : بدري توك تفهم؟
سعود : يعني ايه؟
ناديه : ايه ايه
سعود : في ذمتك انك صادقه ماتكذبين !
ناديه : اكذب ليش؟ ايه والله صادقه
قرب سعود وهو يحضنها بقوه ساد الصمت لدقايق بعدت ناديه انصدمت وهي تشوف دموعه : وش؟
سعود : اخيرًا اخيرًا من سنين وانا احلم بذا اللحظه
ناديه : وهذا هي جت
