بعدما استفاقت من ذكرياتها نظرت للطبيب لبيب بتساؤل فاجابها :
_انتي مش بتعاني من اي مرض نفسي يا مدام روح، المشكلة الوحيدة اللى بتقابلك هي انك مش اعطيتي لنفسك فرصة زمان ترتاح كنتي بتخرجي من مشكلة للتانية ومن مخطط للتانى وفجأة رجعتى لحياتك الزوجية من تانى وجبتى طفلة بعد فريد ابنك اتشغلتى بتربيتها وحياتك اتزحمت لكن بدون اشارة الاولاد كبروا والمسؤوليات قلت بالتدريج والهدنة اللى كان المفروض تاخديها زمان بتاخديها دلوقتى ومع انشغال استاذ عاصم في شغله الفترة دي فأنتى حاسة ان اللى حصل زمان مع علا هيتعاد تانى لكن احب افهمك ان كل ده قلق بدون مبرر وبدون استناد على واقع، ادي لنفسك راحة من التفكير وهتلاقي القلق انتهى وخلص صدقيني
همست روح بحزن :
_والعمل ايه انا دماغي مبتوقفش ؟
دون بقلمه على ورقة :
_ده دوا مناسب ليكي هيساعدك على الراحة والاسترخاء وهيقلل من التوتر وإذا احتاجتى تتكلمي هتلاقيني متاح لحضرتك في اي وقت
___________________________________
دلفت بسعادة مفرطة الى غرفة نوم ابنها الاكبر تهلل بفرحة عارمة بينما انتفض زين من اجمل حلم يأخذه بعيداً عن الواقع بسبب الاصوات والضجة المحاوطة له.
هتفت رغد بأبتسامة :
_مبروك يا حبيبي الف مبروك اخيراً فرحت بيك وشوفتك عريس
ازال الغطاء عن وجهه يجلس بدهشة فجلست والدته امامه :
_عريس ايه يا ماما عالصبح كدة؟ فيه حد يهزر الهزار ده ويخض حد كدة!
اصدرت صوت زغرودة عالية :
_هزار ايه باباك كتب كتابك بالتوكيل اللى معاه على بنت زي القمر
شد على شعره المجعد ( الكيرلي ) للخلف :
_بنت مين وجواز ايه وكتب كتاب مين وانتي مين !!!
شهقت رغد بدهشة تضع كفها على جبهة ابنها تستشعر حرارته :
_سلامتك يا حبيبي انا مامتك
قهقه مراد بقوة على ملامح شقيقه البلهاء اثناء دخوله الغرفة :
_ مبروك يا اخويا يا حبيبي ابوك جوزك اماني بنت الحج غانم ابن عمه في البلد
التفت مراد الى فارس المبتسم بتشفى في ابنه المصدوم ليحتضنه بمرح :
_الف مبروك يا والدي، عقبال الحفيد يا حج
سحبه فارس بمزاح مكملاً امام اعين زين المغتاظ من تصرفهم :
_حبيبي يباركلي فيك يا عاقل
نهض زين واقفاً بساقيه اعلى فراشه يصرخ كالاطفال :
_انتوا بتقولوا ايه؟! انت ازاى تعمل كدة يا بابا بتجوزنى واحدة مشوفتهاش ومعرفهاش وكمان فلاحة ويا ترى الخيمة السودا دي هحطها في اي ركنة في البيت !!!
نهضت والدته بقلق :
_اهدى يا زين انزل يا حبيبي من فوق السرير
انحنى قليلاً يهتف بعدم تصديق :
_سيبيني يا ماما سيبييني والله لانتحرلكم من فوق السرير وتتحسروا على فراقي
