၂ ဗီလိန်၏နူးညံ့သိမ်မွေ့သောမေမေ(ရှအန်း)

Chapter 258

'ဒေါက် ဒေါက် ဒေါက်'

တံခါးခေါက်သံကြားသည်နှင့် ကျုးတချင်းက နီရဲနေသော မျက်လုံးများဖြင့် တံခါးဖွင့်ပေးလာသည်။

"မစ္စရှ ရောက်လာပြီပဲ... အထဲဝင်ပါဦး...."

သူ၏ပုံကိုကြည့်ပြီး ရှအန်းက သူတို့ ကျူးပိုင်ရွှယ်ကို ပြောပြပြီးကြောင်း သိလိုက်သည်။

ရှအန်းက ကလေးနှစ်ယောက်ကိုခေါ်ပြီး ကျူးတချင်းအိမ်ထဲ ဝင်သွားလိုက်သည်။

'ဘမ်း'

တံခါးပိတ်သွားသည်နှင့် အိမ်နီးချင်းအချို့က ခေါင်းပြူထွက်လာကြသည်။

"ကျူးတချင်းတို့ အိမ်ထဲဝင်သွားတာ ဘယ်သူလဲ... သူ့ကြည့်ရတာ အတော်လေးချမ်းသာတဲ့ပုံပဲနော်..."

"အမျိုးတွေများလား...."

"အဲ့လိုလည်း မတူဘူးနော်... ကျူးတချင်းတို့မိသားစုက ဆင်းရဲကြတာပဲကို... သူတို့မှာ ဘယ်လိုလုပ် ချမ်းသာတဲ့ အမျိုးတွေရှိမှာလဲ..."

"ဒါပေမဲ့ နေကာမျက်မှန်နဲ့ မိန်းမက အရမ်းလှတယ်နော်..."

"သူတင်မဟုတ်ဘူး ကလေးနှစ်ယောက်ရောပဲ... သူတို့ကလည်း ပန်းချီကားထဲက ခုန်ထွက်လာကြတဲ့လူတွေ အတိုင်းပဲ.."

"သူတို့က ဘယ်သူတွေများလဲ.. ကျူးတချင်းနဲ့ ဘာတော်တာတဲ့လဲ..."

.....

သူတို့က ရှအန်းနှင့် ကလေးနှစ်ယောက် ကျူးတချင်းအိမ်ထဲဝင်သွားသည်ကို မြင်သည်နှင့် အတင်းတုပ်ကြလေတော့သည်။

ရှအန်း ကျူးတချင်းအိမ်ထဲဝင်လိုက်သည်နှင့် သူမကို မဝံ့မရဲကြည့်နေသော သူမ၏ သမီးအရင်းကို တွေ့လိုက်ရသည်။

နီရဲကာ ဖောင်းနေသော မျက်လုံးလေးများက သူမကို ကြောက်လန့်ကာ လေးစားနေသလို ပျော်ရွှင်နေသော ခံစားချက်မျိုးစုံဖြင့် ကြည့်နေသည်။ သူမက အလွန်အမင်း မဝံ့မရဲဖြစ်နေလေရာ သူမမြင်ခဲ့ဖူးသော တက်ကြွသွက်လက်သော ကလေးမလေးနှင့် လုံးဝတူမနေတော့ပေ။

"ရှောင်ရွှယ်... သူက သမီးအမေလေ... မေမေလို့ခေါ်လိုက်ပါဦး..."

ဝမ်လန့်ကျီက သူမ မျက်နှာပေါ်မှ မျက်ရည်များကိုသုတ်ကာ ဘေးတွင် ကုတ်ကုတ်လေးရပ်နေသော ကျူးပိုင်ရွှယ်ကို ရှေ့သို့ တွန်းပို့လိုက်သည်။