بسم الله الرحمن الرحيم
اللهم صل على محمد وآل محمد
♡♡♡♡♡♡♡♡♡♡♡♡♡
السلام عليكم ورحمة الله وبركاته،
الحجاب فرض على كل النساء أما اللي مو لابسته فهذا الشي حرام ومعصية ومو حرية ولا قرار ناخذه وقت اللي نريد، الله سبحانه وتعالى أمرنا بالحجاب مثل ما أمرنا بالصلاة والصوم وباقي الأعمال وماكو فرق بينهم.
أما اللي تقول إنه يضايقها ويمنعها فهذا مجرد كلام فاضي، الحجاب عمره ما منع أي بنت من التقدم والنجاح، فإذا صدق الحجاب يمنع فشلون سيدة نساء العالمين وابنتها العقيلة واجهوا اللي مروا بيه من آلام وطغيان بحق الشريعة، واعلمي إنهم واجهوها بكامل عفتهما وسترهما وما اطاعوا قومهم ولا سكتوا عن الحق، فالسيدة فاطمة سلام الله عليها اغتصب حقها وداهموا دارها وأسقطوا جنينها وبرغم ذلك فهي چانت تلوذ بالباب حتى ما يشوفوها، والسيدة زينب عليها السلام بعد واقعة كربلاء وسبيها للكوفة والشام، كانت محافظة على حجابها وحيائها وعفتها رغم الأمور الصعبة اللي مرت بيها ألا إنها كانت صامدة وقوية وترد على من يذلها بكلمات عظيمة، والكل يعرف بخطبتها الشهيرة فهي بكلامها نصرت دينها ولم ترضى ليزيد وأمثاله بأن يقللوا من شأنها وشأن أهلها ودينها، بتفكيرها وانتقائها لكلامتها اسكتته وخلته مثل الأخرس ماعرف شنو يرد وبقى حاير ضايع خايف، شلون مرة تسوي هیچ بيه وآني الكل يهابني ويسمع كلامي وبحرف واحد ما يتطاول عليه؟
فهنا يتبين لنا إن المرأة قيمتها بعقلها وبتفكيرها مو بشكلها، تجي وحدة تقول الحجاب يمنعني وما يخليني و.. هذا غلط الحجاب ما يمنع بلعكس الحجاب يحمي وخصوصًا العباءة الزينبية كلش حلوة وكلش ستورة عكس باقي العبي اللي على الچتف مثلاً واكو بنات بس يلبسن حجاب من غير عباية يعني حجاب وملابس عادية أنا كلش ما اشجع على هذا وغيري هواي ما يشجعون على هذا الشي لأن خاطئ، اكو شروط للحجاب مو قطعة وغطيت شعري لا غلط لازم يستر ويخفي الزينة انتبهوا قلت الزينة مو الجمال مو تجي وحدة تقول الحجاب يخفي الجمال هم غلط هوه يخفي الزينة وليس الجمال واكو فرق بيناتهم وهوه إن:
-الزينة يعني نزين من نفسنا بأشياء مثل المكياج الاكسسوارات العطور وهكذا..
- أما الجمال فهو قيمة مرتبطة بالشعور والعاطفة وكل إنسان يشوفها بغير شكل، والجمال إله أنواع هوايه مثلاً اكو جمال بالشكل واكو جمال بالروح واكو جمال داخلي واكو خارجي وهكذا..
لذا حتى من نشوف بنية متحجبة نقول شكثر جميلة بالحجاب فهنا دانمدح شكلها، أحيان لا نشوف وحدة نقية وطيبة نقول شكثر جميلة روحها وهكذا يعني مايخفي الجمال إنما الزينة..
فالحجاب يخفي الزينة وليس الجمال، الزينة مو حرام مو معناته محجبة وملتزمة يعني ما تتزين لا بلعكس احنا نتزين ونحط مكياج وعطر ونلبس ملابس حلوة ونكشخ بس بحدود الله خلاها إلنه، مو بكيفي اسوي شي والله محرمنه، الدين إله أوامر ونهي بيه حلال وحرام واحنا مسلمين وهذا واجب علينا نطيع الله ورسوله، الله مو محتاج إلنه احنا النحتاجه احنا اللي رح نتعاقب احنا الضعفاء والله القوي، الله بيده كلشي بهلدنيه يقدر بلحظة ياخذها الروح، وبعدين تندم وما رح يفيدك الندم وقتها.
فاللي تحط حمرة وكحل وعدسات وغيرها من الزينة داتعصي مو داتجمل ولچ إلمن هلحمرة والكحلة كلمن تطلعين تحطيهن عندچ بالبيت لو تسبحتي بيهن عادي بس من تطلعين كضي نفسچ والله الدنيا هسه مابيها أمان الزلم صارت نسوان والعكس صحيح هسه حتى البنات صارن يحبن البنات وهواي خالفوا الفطرة السليمة اللي الله خلقها بينا، تجين تطلعين بهذا الشكل ياهوه يضمن سلامتچ يجي واحد ينعجب بشكلچ ويسوي بيچ شي لا سمح الله، كلشي جايز بالدنيا وهواااي بنات صار إلهن هيچ ولچ حتى الساترة الكلشي ما باين بيها يصير إلها هیچ لعد شلون انتي وانتي بهذا الشكل، اهمتوا بنفسچن بنات واتذكرن وراچن حساب وورا الحساب رح تنالين جزائچ يا بالجنة يا بالنار وكلنا نريد الجنة مستحيل أحد يتمنى يروح النار، فعلى شنو جاية اعصي إلمن اعصي منوو دا اعصي؟؟ الله بعظمته وجلاله اعصيه آني الضعيفة اللي حيل ما بيه، آني شلون عايشة شلون اتنفس شلون امشي شلون اشوف اقرا اشم اسمع احچي ابچي هاي كلهن شلون اسويهن ها؟ الله انطاني إياهن وآني اجي اعصيه بيهن؟ صدق ما استحي اي آني ما استحي من اعصي اللي انطاني هاي النعم بيهن، لچ كلشيي مابيه الحمد لله نظر سمع عقل فكر دين كلشي عندي وهم اعصي! عيب والله عيب الجاي اسويه مفروض اخجل من نفسي واستحي اعيده بس شنو؟ ارجع اذنب واستمر بهذا الشكل ما مليت من نفسي؟ المتى أضل هيچ كله ذنوب ومعاصي حياتي لازم اخلي حد إلها مو صحيح؟ اسوي لي جدول التزم بيه، ابعد من الذنوب واحد واحد لين ما ابعد عنهم كلهم ويصير ملفي أبيض ذنوب مابيه.
ويجي واحد يقول والناس؟ اقله والله؟ الله ما يستحق يعني تقلي الناس، الناس منو؟ اهلك؟ أصدقائك؟ منوو ذووله؟؟ يوم القيامة رح يتحاسبون وياك مثلاً؟ لو شنو؟ صدقني من يصيدك شي ما راح يهتمون إلك نادرًا ما رح يسألون عليك نادرًا ما يزورونك أصلاً كلهم رح يروحون رح يجي يوم تشوفهم مو وياك، وإذا خايف منهم على هيچ فهذوله مو خوش ناس، اللي صدق يحبك هوه اللي يوقف وياك بكل خطوة تخطيها مو اللي يعارضك على شي لصالحك، إذا شفت شخص يقربك لله هذا صدق يحبك، أما إذا العكس اتركه اسمعها مني واتركه هذا مو زين ويمكن يكون زين بس غافل عن الله انصحه إذا چنت تحبه وإذا ما رضا بعد قله الله وياك، قله وراي حساب وراي آخرة وآني اريد الجنة اي قله هیچ لا تستحي هذا الصدق لازم تلحق عمرك قبل لا تضيع.
نرجع نكمل موضوعنا اللي چنا نحچي بيه طبعًا ذكرت إنه اكو شروط للحجاب إذا تحققت فحجابچ هنا صحيح وكامل ومطابق لشرع الله ومن ضمن هذه الشروط هو إن الحجاب:
- ما يكون ضيق ويفصل الجسم لازم يكون واسع
- ما يكون بيه زينة سواءً يلمع أو لونه ملفت أو ريحته عطر
-يكون ساتر لكل الجسم عدا الوجه والكفين، وإن كان الأفضل تغطيتهما
-يكون ثخينا لا يشفّ عما تحته، يعني قماشه مو شفاف
-ما يكون لباس شهرة وما يكون يشبه لباس الرجال أو الكافرات
ونصيحتي لكل بنت هي أن تبتعد عن كلشي يبعدها عن الله، وتنتبه لدينها أكثر شي لأن هوه اللي رح يتحدد مصيرها منه وهوه الشي الوحيد اللي رح يفيدها بالدنيا والآخرة...
دمتم برعاية صاحب الزمان 💚
نسألكم الدعاء 💞
أنت تقرأ
سَأتغَيرُ إلى الأفضَلِ
عشوائيلست بنفسي أتباهى فإنني مثلكم خطاء وخير الخطائين التوابون، هلم نتوب قبل فوات الأوان فوالله لا شيء أفضل في هذه الدنيا من توبة صادقة، جاهد نفسك وواعدها أنك إن خرجت من هنا ستكون قد تغيرت للأفضل ❤.
