سَأتغَيرُ إلى الأفضَلِ

الالتزام بالصلاة 💞

بسم الله الرحمن الرحيم
اللهم صل على محمد وآل محمد
♡♡♡♡♡♡♡♡♡♡♡♡♡

السلام عليكم ورحمة الله وبركاته،
مثل ما تشوفون اليوم موضوعنا عن الالتزام بالصلاة وهوه آخر قسم، رح نتكلم فيه عن أعمال وخطوات تساعد على الالتزام بالصلاة.

النية والتوكل على الله:
طبعا أول شي وأهم شي لازم ننوي إن احنا نريد نلتزم بالصلاة ونتوكل على الله سبحانه وتعالى كأي عمل آخر

مصاحبة الصالحين:
إذا كنت مصاحب ناس صالحين رح تتأثر باللي يسوونه وهمه رح يساعدونك ويشجعونك بإنك تلتزم أكثر، فهذا شي جدًا مهم مو بس من جانب الالتزام بالصلاة همه رح يخلونك تلتزم بأعمال أكثر

دوام ذكر الله:
إذا دائمًا تذكر الله سبحانه وتعالى ينشرح صدرك وتحس براحة وهذا يساعدك تبادر للصلاة

المبادرة إلى الصلاة مباشرة:
أول ما تسمع الأذان اترك كل شي وروح صل، حتى لو كنت ويه أهلك لو أصدقائك لو جماعتك عوفهم وروح صل حتى ادعوهم للصلاة يمكن بعضهم ما يقوم بس اللي عليك سويته وانته دعوتهم، ويفضل تكون قبل الأذان بسجادتك حتى الشيطان ما يوسوس لك ومن تسمع الأذان على طول تكون بدأت بالصلاة

ترك المعاصي واجتناب المنكرات:
المعاصي والذنوب تورث قسوة القلب والبعد عن الله سبحانه وتعالى فلازم احنه نجتهد لحتى نتركها وندعو الله يغفر لنا ذنوبنا، وبهاي النقطة اكو ناس تسوي ذنوب بس ما تدري إنها ذنوب مثلا اكو هواي ناس يسمعون أغاني وهمه ببالهم إن هيه حلال أو شباب وبنات يتصادقون ويسوون علاقات ويه بعض أو انته وأصدقائك تتكلمون على واحد تعيبون على خلقته وتصرفاته هذني كلهن ذنوب تتسجل علينا فلازم ننتبه إلها ونبحث عن الذنوب والمعاصي لحتى نعرفها ونجتنبها

الاستعانة بالبرامج والتطبيقات الحديثة:
طبعًا هسه اكو هواي تطبيقات تقدر تستخدمها تذكرك بموعد الصلاة وتنبهه إلك بحيث من يجي وقت الصلاة يأذن بجهازك، وهذا كلش زين للي ما يسمعون الأذان يعني اكو مناطق المسجد بعيد عنها فما يسمعون الأذان، وهاي التطبيقات غالبًا يكون فيها أذكار وأدعية تقدر تستعملها لحتى تقرأ منها إذا ما عندك كتاب أدعية لو مو حافظ أدعية

اعمل جدول:
ارسم جدول لو اكتب الصلوات ومن تصلي اشخط عليهم، وخلي هدفك تكمل الجدول يعني كلشي بالجدول تسويه لحتى تصير عادة عندك

تذكر الموت:
تذكر إن رح يجي يوم وراح تموت تخيل بس تموت وانته ما تصلي، وتتمنى ترجع للحياة وتصلي بس خلاص ماكو مجال ترجع وتندم ندم، وبعدين من يجي وقت الله يحاسبك يشوف أول شي الصلاة وانته ما تصلي!

الصوم:
جدًا مفيد منها تاخذ أجر ومنها يلزمك عن الذنوب خو ما تقدر تذنب لأن صايم فيبعدك عن الذنوب وكذلك يخليك تصلي لأن ما ينقبل الصيام من غير صلاة

الاقتداء بالأنبياء والأئمة عليهم السلام:
الأنبياء والأئمة همه قدوتنه بالإسلام واحنه لازم نقتدي بيهم نشوف شلون كانوا ملتزمين ويحبون لقاء الله، نقرأ أحاديثهم ونقرأ قصصهم ونتعمق بيها، ونحاول نصير مثلهم

مشاهدة محاضرة إسلامية قبل الأذان:
هاي النقطة كلش مهمة واني عن نفسي كنت اسويها ولحد هسه اسويها إن قبل ما يأذن بساعة لو بنص ساعة افتح إلي محاضرة دينية خصوصًا إذا كانت تحكي عن يوم الآخرة لو عن حياة البرزخ لو عقوبة ترك الصلاة مثلًا واقعد اسمع الشيخ شنو يقول لأن بعد المحاضرة يجيني شعور إن إيماني يقوى واريد اروح اصلي، اني هيچ احس فلهذا قلت اكتب هاي النقطة لحتى تستفادون منها

هذه بعض النصائح اللي اجت في بالي يمكن اكو أكثر بس هذا اللي قدرت اكتبه، إذا عندكم نصائح أكثر اكتبوها بالتعليقات يجوز واحد يطبق وحدة من نصائحكم وينحسب إلكم الأجر.

خِتامًا ادعو لكل شخص يحاول يلتزم بالصلاة إن يلتزم وإن الله يغفر إله أعماله في الأيام اللي مضت ويهديه لطريق الحق.

دمتم برعاية صاحب الزمان 💚
نسألكم الدعاء 💞