ثغرات الماضي

الفصل الثالث والأربعون

#ثغرات_الماضي
#طيبة_الربيعي
*الفصل الثالث والأربعون* 🔥🔥🔥🔥🔥

مساء الخير💙 خاف البارت بي غلط نبهوني لأن عيني راحت ومابية اراجعة
___________ღ____________

إن للمُحب عقداً مع المحبوبِ، فيه شرطاً لن يُمحيه خصامُ
حتى وإن المشاعر تبلدت، تنتفض وتنهض في لحظةِ لقاهُ
وهاك الدليل عندما لاقيتُكَ
غُلب على امري فلم اعد ارى في كبريائي عزٌ ولا جاهُ

رند... من شفت سيارتة دعيت بگلبي انو ميكون هو الجاي، لأن اذا شفتة هسه كل الوعود الي انطيتهة لنفسي راح اخلف بيهة

من طلع وصار گدامي حسيت عيوني صارت مراية للكلام البگلبي
مزيج من المشاعر، مثل الدولاب مرة الكره يسيطر علية ومرة الحب ومرة اريد افتح حلگي واعاتبة، بس بعديش، مشاعري صارت قديمة وعليهة تراب، تبلدت، لكن مجرد ما صار گدامي صحت من جديد

لكن هيهات انذل الك مثل ما چنت اسوي ايام زمان، چنت مثل المي بيدك اجيبني وتوديني بكيفك، هسه اختلفت الأمور، رند هسه مو نفسهة رند القديمة'طيبة_الربيعي'

ابتسمت: السلام عليكم

حسيتة استغرب وجاوبني مثل المتفاجئ

عواد: وعليكم السلام
رند: شو هنا شعجب
عواد: جبت صابرين
رند: اها لعد عماد وين مجابهة هو؟
عواد: شغل
رند: اها تمام، سلملي علة خالة
عواد: الله يسلمچ
رند: حتروح؟
عواد: اي
رند: تمام الله وياك

وأشرتلة بيدي بيباي وداطب

عواد: لحظة

انداريت عليه واني گوة ماسكة روحي حتة مابين ضعفي من نبرة صوتي

رند: نعم؟
عواد: شو تسلمين وعادي

عقدت حاجبي مستغربة والأبتسامة بعدهة مرسومة على وجهي

رند: ليش عندي عداوة وياك؟

انتجة عالسيارة وخلة ايدة بجيوبة، ينظرلي بتعجب من فوگ الي جوة

عواد: لا
رند: اذاً عادي واذا سلمنة على بعض؟ بالنهاية احنة صارت بيناتنة عشرة ومازالت، يعني اقصد عماد وصابرين
عواد: ها، صحيح
رند: يلة من رخصتك
جر نف وزفرة: الله وياچ

بس طبيت انهارت كُل قطع القوة الركبتهن بداخلي، مثل الطفل من تنهار مكعباتة

طبيت بس اخوتي گاعدين، لمحت امي بالمطبخ، صعدت گبل لأن وضعي تخربط، طبگت الباب وانتچيت عليه، مطولت ثواني ونزلت دمعتي، ضربت علة صدري