The Moon Is Coming To Me (Chapter-61.1)
Chapter-61
ထောင်ရှီးက သစ်အယ်သီးသကြားလှော် အိတ်တစ်လုံးကို ကိုင်ထားသည့် လင်ချင်းဟယ်ထံသို့ အပြေးသွားလိုက်သည်။ ထိုအခါ တစ်ဖက်လူက အိတ်ကို သူ့လက်ထဲသို့ ထည့်ပေးလာသည်။
သစ်အယ်သီးများမှာ နွေးနေဆဲဖြစ်ပြီး အမွှေးရနံ့လေးက သူ့မျက်နှာထက်သို့ သင်းပျံ့လာ၏။ ထောင်ရှီးက တစ်ခုနှိုက်ယူကာ အခွံခွာလိုက်သည်။ ချိုအိနေသော အရသာကြောင့် သူ့မျက်လုံးများ မှေးစင်းသွားရပြီး စိတ်ညစ်နေမှုများလည်း ပျောက်ကွယ်သွားရသည်။
သူ လင်ချင်းဟယ်ကို မေးလိုက်သည်။
“ ငါ သစ်အယ်သီးသကြားလှော်စားချင်နေတာ မင်းဘယ်လိုသိတာလဲ…။ ဘယ်ကနေ ဝယ်လာခဲ့တာလဲ…”
လင်ချင်းဟယ်က မလှမ်းမကမ်းတွင်ရပ်နေသည့် ယန်ကျန်းမင်ကို တစ်ချက်ကြည့်လိုက်သည်။ ထို့နောက် ထောင်ရှီးနှင့်အတူ ဓာတ်လှေကားအပေါက်ဝဆီသို့ လျှောက်လာရင်း ပြောလိုက်၏။
“ သစ်သီးဆိုင်ရဲ့ဘေးမှာ သစ်အယ်သီးသကြားလှော်ရောင်းနေတဲ့ဆိုင်ရှိတယ်…”
မတိုင်မီ သစ်သီးများဝယ်စဉ်က ထောင်ရှီးမှာ သစ်အယ်သီးများကြော်လှော်နေသည့် ဘေးချင်းကပ်လျက်ဆိုင်ကို ခဏခဏအကြည့်ရောက်နေကြောင်း လင်ချင်းဟယ်က သတိထားမိလိုက်ပြီး သူစားချင်နေမှန်းသိသဖြင့် ထောင်ရှီး အဖိုးအဖွားများနှင့်စကားပြောနေချိန်၌ သွားဝယ်ပေးခဲ့ခြင်းဖြစ်သည်။
“ ဟုတ်လား…ငါတောင် မမှတ်မိတော့ဘူး…”
ထောင်ရှီးက သစ်အယ်သီးနောက်တစ်လုံးကို အခွံနွှာလိုက်ပြီး လင်ချင်းဟယ်ကို ခွံကျွေးလိုက်သည်။
ထောင်ရှီး၏မျက်နှာက ပုံမှန်အတိုင်းဖြစ်နေသည်ကိုမြင်ရမှ လင်ချင်းဟယ်မှာ စိတ်သက်သာရာရမိတော့သည်။ လူနာခန်းထဲတွင် ဖြစ်ပျက်ခဲ့သမျှကို သူမမေးတော့ပါချေ။
