الساعه كانت ماشه ل٩ صباحاً لما جا طالع من غرفتو، نزل الدرج بخطوات سريعه، اتقدم عليهم وهو بصلح شعرو بأطراف اصبعو السبابه والوسطى والإبهام.. كانو كلهم في الجلسه الفي الصاله ابوه واموه واخواتو.. صبح عليهم وواصل خطواتو للمطبخ وهو بكفكف اكمام القميص الابيض ومخطط بالطول باسود اللابسو... لحقتو نظرات امو لحدي ما دخل، قبلت على بناتها وسألت بعد اختفى من عيونها: ماشي وين شغال الليله؟...مطت غيم شفايقها ورفعت اكتافها وهي مركزة في التلفون دلاله على عدم معرفتها.. غدير قالت ليها بتسألينا نحن ليه شوفيه هو.. لما شافتو طالع من المطبخ وفي يدو مق القهوة قالت بصوت واطي هس خلاص.. ضحكو الاختين وابوهم على حياة
غسان وهو بقعد وبرفع بنطلونو الجينز: بتضحكو في شنو؟
حياة :حتى الليله شغال؟
_ لا ما شغال
سكتت وهي لسه بتعاين ليهو منتظراه يشبع فضولها بس ما رد، قالت ليهو اختك جايه الليله تقيل معانا... مع اخر كلمات نطقت بيها سمعو صوت خلاهم يقبلو كلهم عليهو
" جايه لشنو؟؟"
وقف جمب كرسي امو وهو بعاين ليهم بتساؤول عبدالرحيم طبق الجريدة ختاها في التربيزة العلى يمينو وشبك اصابعو قدامو: البمنع شنو من انها تجي؟
مرتضى: والحيوان داك جاي معاها؟؟
حياة: مرتضى احسن تمسك لسانك دا عليك لأنو ذودتها شديد
مرتضى: انا الذدوتها مش؟ انا ولدكم بدل تقيفو معاي واقفين مع الحيوان داك
غسان قام على حيلو وبصوت عالي: مرتضى! دي شنو حركات الشفع البتعمل فيها دي؟؟ كم مرة حنقول ليك انو باسل ما عندو علاقة بفقدانك للوظيفة ، اذا في زول مفروض يقع اللوم عليهو ف هو انت لأنك ما عملت المطلوب منك والشي دا خلاك ما تنجح في المعاينه، عشان ما تجي كل يوم تزعطنا بالموضوع دا، وبعدين الظبط ليك موضوع الوظيفه دا منو ؟! باسل أساساً ما عرف الا لحظة انت مسافر، انا الجبت ليك الشغل دا وانا العملت الإجراءات كلها ليه ما جيت سألتني؟
غيم قالت بصوت واطي: هو يقدر؟!
غسان اداها نظرة خلتها تنزل راسها وتعمل روحها مركزة في التلفون.. رجع قبل على اخوه الكبير وقال ليهو من هنا ولقدام السيرة دي تاني ما تتفتح في البيت لأنو لا حتقدم ولا تأخر..
مرتضى فضل يعاين ليهو بدون اي رد فعل.. غسان دنقر شال اغراضو من الطاولة الفي نص الجلسة وطلع
عبدالرحيم: اقعد خليهم يجيبو ليك الشاي، وعليك الله ما تعمل لينا حركة المره الفاتت وتحرجنا مع راجل اختك
مرتضى: طالع ومخلي ليكم البيت دا عشان ترتاحوا مني
حياة: انا تعبت مع الولد دا ما عارفه متين حيكبر ويعقل
