قال لي وهو بكورك بأعلى حس: زحييي مني قلت ليك خليني في حالي.. ختيت كباية المويه وقلت ليهو لمتين حتتصرف بالطريقه دي؟ قايل كواريكك دي حتحسن وضعك؟ وريني انت بتعمل كدا لشنو، كلنا في البيت دا بنحاول بقدر الإمكان نساعدك ونخفف عليك وما بنلقى منك غير الشكل والنِّهير... قال لي انا ما طلبت من زول مساعده ولا دايركم تجو جنبي خلوني في حالي بس.. قلت ليهو وحتعيش كدا كيف؟؟ اذا يدك ما قادر ما ترفعها حتاكل وتشرب كيف ولا داير تموت؟... سمعت صوت نحنحه وضربات عكاز قبلت وراي لقيت طلال خاشي بلبس المدرسه قال لي ميسم ختي الصينيه واطلعي.. طلعت وانا زعلانه ومليانه من طارق من يوم الحادث الحصل ليهو وهو اليوم كلو زهجان ويكورك في الماشي والجاي.. السيخه الدخلت في ظهرو عملت ليهو شلل وبقى قاعد في الكرسي ما بقدر يتحرك عملو ليهو عملية اخدت ٦ ساعات وطلع منها بالشلل دا اترقد في المستشفى اسبوع والليله ١٠ ايام من طلعوه، كلنا اتأثرنا بالحصل ليهو واكترنا ابوي لأنو بعتبرو ضراعو اليمين، بقى هو البأكلو وبشربو وبقضي ليهو حوايجو كلها، طارق كان ما بخلي زول يقرب منو ولا يهبشو غيرو مستعد اليوم كلو يقعد جعان لحدي ما ابوي يرجع من الشغل.. مشيت عريشة المطبخ وقعدت في السرير خاته يدي في راسي تعبت انا تعبت من الحاصل دا.. رفعت راسي بصوت طلال بقول لي ميسم مالك؟.. مسحت دمعتي وقلت ليهو ماف شي .. قعد جمبي في السرير وقال لي ما صح القلتيه لي طارق دا.. قلت ليهو قسيت عليهو صح؟؟ قال لي شديد.. دموعي تاني جات جاريه بكيت قدرتي وطلال كان بعاين لي بدون ما يقول حاجه بعد قشقشت دموعي قال لي غسلي وشك وتعالي عندي معاك كلام.. مشيت الحمام غسلتو وجيت قعدت مكاني قال لي داير اسألك سؤال لمن تجيك الملاريا الكعبه ديك وترقدك في السرير كم يوم احساسك بكون شنو؟.. قلت ليهو بكون زهجانه وعايزه اتعافى سريع.. قال لي ليه؟.. قلت ليهو كيف ليه؟ عشان ماف زول ماسك البيت غيري اكلكم وشرابكم النظافه ،الغسيل، المكوه.. قال لي ما خالتي صفيه ما مقصرة قعد تجي وتعمل دا كلو لحدي ما انتي تقومي.. قلت ليهو فعلاً ما بتقصر لكن برضو هي عندها مسؤوليات تانيه وبتتعب شديد بين بيتنا وبيتهم.. قال لي طيب شوفي انتي ملاريا رقدتك يومين ما استحملتيها فما بالك بي حالة طارق هسي، زهجو وكواريكو دي كلها بسبب الحاله النفسيه الداخل فيها.. طارق يا ميسم بين يوم وليلة لقى نفسو قاعد في الكرسي واقل حوايجو ما قادر يقضيها, الحمام لا مؤاخذه الا بمساعدة ابوي وطارق بالذات انتي عارفه طبعو قادرة تتخيلي احساسو كيف بعد التغير الجذري الحصل ليهو في حياتو؟.. زي ما انتي شايفه اننا بنتقِّل على خالتو صفيه لمن تمرضي هو كمان بقى شايف نفسو متقِّل علينا وعلى ابوي شايف انو ابوي بقى براهو الماسك مسؤوليتنا كلنا... عشان كدا نحاول الفترة دي نستحملو بقدر الإمكان لأنو محتاج وقفتنا معاهو بدون ما نحسسو بالنقص، لمن يشوفنا حنينين عليهو هو زاتو بحن عارفه هسي بعد طلعتي واتكلمت معاهو براحه قِبل يشرب من يدي المويه؟؟ الكلمه الطيبه بتغير حال انسان ١٨٠ درجه دا غير الأجر البنؤجر عليهو ليه نحن نبخل بالحاجه دي؟..... كنت منزلة راسي زي الطفل البسمع عتاب امو على غلطه عملها رفعت راسي وقلت ليهو انت كيف قادر تكون كدا؟ .. قال لي كيف ما فاهمك؟.. قلت ليهو خلاص انسى امشي غير ملابسك لحدي ما اسوي ليك حاجه تاكلها.. قال لي ما تسوي حاجه بحاول تاني مع طارق عشان يفطر وباكل معاهو..
