لمن وصلت البيت لقيت عمي وابوي قاعدين في سرير في ضل الحوش وطارق بي كرسيهو جمبهم اول ما خشيت سكتو سلمت ودخلت طوالي قلت ياربي مالهم ابوي ما من عوايدو يجي زي الوقت دا حتى عمي لسه وقت رجعتو ما جات قلبي قبضني وبقيت اقول اللهم اجعله خير، لحدي ما ابوي ناداني هنا اتأكدت انو في شي حاصل لبست التوب وطلعت ليهم.. ابوي قال لي رقمك الوطني ما لقيتو في الشنطه، معاك؟.. قلت ليهو اي.. قال لي جيبيهو لي مشيت جبتو وجيت قلت ليهو في شنو؟؟.. قال لي يوم الاحد حنمشي نطلع الجوازات، بقيت بعاين ليهم باستغراب عمي عبدالله قال لي انا كنت متواصل مع دكتور كويس في مصر ووريتو حالة طارق قال يجيبوهو عشان يعمل ليهو عمليه... قلت ليهو يعني بعد العمليه حيقدر يمشي؟.. عمي قال لي الدكتور قال نسبة نجاح العمليه ٩٠٪ حتى لو ما قدر يمشي بقدر يحرك يدو او يمشي بي عكاز لو اجتهدنا معاهو بي التمارين الفيزيائية .. عاينت لي طارق وانا مبسوطه شديد لقيتو بحمر لي.. قلت ليهم يعني حنمشي كلنا؟؟.. ابوي قال لي طلال ما ماشي انا وانتي وطارق.. قلت ليهم وحيقعد براهو؟.. عمي قال لي عيب منك الكلام دا نحن مشينا وين طلال حيقعد معانا لحدي ما ترجعوا..... قلت ليهم وحنقعد كم في مصر؟.. عمي قال لي شهرين تلاته كدا.. قلت ليهو شنو؟؟؟ ليه لكن.. عمي قال لي والله ما عارف دا كلام الدكتور قال العمليه حتتعمل بعد شهر من تمشو شكلو في فحوصات وحاجات زي دي وبعد العمليه برضو حتقعدو فترة تاني ما معروف كم.. ما كنت مقتنعه بمشيتنا كلنا الا طلال، ما حصل خليتو فترة طويلة براهو الا لمن مشا المركز للتحفيظ... قلت ليهم طيب مسافرين متين... طارق قال بي نهرة: انتي كلامك مالو كتير كدا؟؟ وقت نقول ليك مسافرين تستفي لينا شنطنا وتتخارجي قومي سوي لينا الغدا هسي.. عمي عبدالله قال لالا انا امشي استحمى واغير هدومي دي اول.. ابوي قال ليهو بنستناك خلاص ما تتأخر..... عمي طلع وانا مشيت جهزت الغدا كنت بقطع في السلطه وسرحانه في موضوع السفر الجا فجأة دا.. طلال جا خاشي قال السلام عليكم. قلت ليهو اهلين وعليكم السلام، كنت مع رامي ولا شنو؟ قال لي اي مشيت معاهو من المدرسة عندنا مشروع شغالين عليهو.. قلت ليهو مشروع شنو .. قال لي بتاع هندسيه، ابوي الليله جا بدري خير ان شاء الله.. اتنهدت وقلت ليهو الموضوع طويل كدي اودي ليهم دا واجي احكي ليك انت غير ملابسك المسافه دي، ولا داير تتغدا معاهم؟؟.. قال لي انتي اكلتي؟.. قلت ليهو لا.. قال لي طيب باكل معاك..... وديتو ليهم ابوي قال لي جيبي صينيه غطيه لحدي ما عمك يجي....
طلال بعد غير جاني وريتو بالحاصل قال لي عمي الله يديهو العافيه ما بنقدر نجازيهو والله.. قلت ليهو فعلاً لكن يا طلال انا ما دايرة امشي.. قال لي ليه؟ لازم تمشي لكن ناس ابوي محتاجين مرا تكون معاهم .. قلت ليهو ما دايرة اخليك براك غير كدا انا زاتي محتاجه ليك انت المهون علي قعدة البيت دي والله لمن اشوفك ساي بنسى هموم الدنيا كلها... ابتسم وختا يدو فوق يدي قال لي كلها شهرين وترجعوا ما تفكري في حاجه غير انو طارق حيتحسن ويبقى كويس دا براهو ما سبب كافي يخليك تتحملي لحدي ما ترجعو؟؟.. قلت ليهو والله انا فرحانه ليهو شديد لكن.. قال لي ما تخافي علي انا بقيت زول كبير يا ميسم وعمي عبدالله وناس بيتهم كلهم زيكم واحد انا متأكد اني ما حاتضايق يوم وانا معاهم.... اتنهدت وقلت ليهو ان شاء الله.. قال لي وشغلك حتوقفيه نهائي ولا حتعملي شنو.. قلت ليهو الشغل؟؟ والله نسيتو نهائي تصدق موضوع السفر دا شطب لي راسي.. ما عارفه لكن بتصل لي للمدير وبكلمو لو وافق انو يشغل زول بدلي لحدي ما ارجع خلاص لو ما وافق كمان حاوقف ما عندي حل تاني... قال لي ربنا يكتب الفيهو الخير..
