"زي لمّا تنوم منتظر تاني يوم بفارغ الصبر"
قامت من النوم ابدر من مواعيد كل يوم طبعت قبلة على خد زوجها وقامت من السرير لمت شعرها بالمشبك واتوجهت على الحمام.. اخدت دش دافي وطلعت، كان لسه نايم اتنهدت وهي مستغربه فيهو، كيف قادر ينوم ومفروض الليله يمشوا يشوفوا بيتهم، ما حاسي بنفس احساسها دا؟ ولا عشان شافو قبل كدا ما هاميه.. قعدت في طرف السرير ودنقرت عليه رفعت خصله من شعرها فوق وشو وخلت قطرات المويه تنزل عليهو.. غمض عينو وحرك راسو، لحقتو بخصلة شعرها زاتا.. شهقت لما فجأة لقت نفسها في صدرو.. جراها عليه وقال بصوت نعسان وهو بعاين في عيونها: مالك يا زولة... بلعت ريقها وهي لسه مصدومه من حركتو السريعه والمفاجئة كانت مفتكراهو نايم، ضحك بدون صوت على ملامح وشها، ليهم قرابة ال٣ سنه متزوجين ولسه بترتبك لما يقرب منها شديد.. سرحت فيهو وفي ضحكتو البتربكها ذيادة، فجأة قامت وختت يدها اليمين في نصها
" انت نايم لحدي هسي لشنو؟ ما عارف عندنا مشوار"
ختا يدو ورا راسو وفضل يجول بنظرو عليها ، كان قاصد يربكها بقت تتمتم
" ببا سل هي ا.نا ببتكلم معاك"
زما شفايفو عشان يكتم ضحكتو لكن ما قدر، فكا ضحكة بصوت عالي خلتها تعاين ليهو باستغراب
" كويس اصبر لي "
طلعت من الغرفة بخطوات سريعه ما انتبهت لاحلام وامال القاعدين في الصاله ولابسين عباياتهم..
امال: مالها دي؟
احلام: بري شكلهم اتشاكلو
امال: هسي مش اخوك كان بضحك؟
احلام: اصبري هسي بنعرف
دخلت وبدت تجهز الشاي وهي لسه زعلانه من تصرفاتو.. شمت ريحة الكيكة فتحت الفرن لقتها نضجت، كانت لسه بتفكر في الحصل مدت يدها شالت الصينيه بسرعة بدون قِطعة واول ما لسعتها حرارتها فكتها وصرخت صرخة صغيرة " آي" نفضت يدها والصينية وقعت في الارض... بقت ماسكه يدها من معصمها وبتعاين لاصابعها المحمرة
" دا شنوو"
قبلت لقت امال واحلام واقفين جمب باب المطبخ
ميسم: وقعت مني
امال دخلت رفعتها والكيكة كانت اتقلبت على الارض: وانتي بالك وين لمن وقعت منك؟؟ هسي نشرب الشاي بشنو؟
ميسم: بسوي وحده تانيه يا عمتي
اتقدمت عشان تشيل منها الصينية امال زحت يدها: تسوي شنو تاني ما ضروري اشربو الشاي ساي اصلا الخمج في البيت دا ذاد عن حدو
احلام: نشرب الشاي ساي كيف يا امي
امال: ااي اشربوه ساي اسوي ليكم شنو يعني
