فتحت عيوني بي صوت ابوي وهو بصحي فيني قال لي يا بت ميسم نايمه من متين انتي.. قمت مخلوعه قلت ليهو ابوي انت جيت متين، الساعه كم؟.. قال لي العشا قعد يأذن.. قلت ليهو انا نمت دا كلو؟ ... قال لي انتي شكلك من جيتي نايمه عبايتك ما قلعتيها.. قلت ليهو اي .. قال لي ومجدعه شنطتك وحاجاتك جمب الباب ليه؟... قلت ليهو ااا الشنطه وقعت مني وكنت تعبانه شديد من امس ما نمت فرقدت طوالي.. قال لي قومي طلعي لي غيارات راجعين تاني انا ومحجوب.. قلت ليهو وانا حـابيت براي؟.. قال لي اخوك راقد في المستشفى اخليهو وانوم بي جاي ؟... قلت ليهو خلاص خليني امشي معاكم انا بخاف براي يا ابوي.. قال لي تخافي من شنو مافي شي بجيك اقفلي الباب عليك بس الشارع دا متحرك لحدي الصباح الناس حايمين فيهو.. سكت وانا بعاين ليهو قال لي سوي لينا كمان حاجه ناكلها من فطور الصباح ماف حاجه دخلت خشمنا تاني.... مشيت عملت ليهو العشا وهو اتصل لي محجوب جو اكلو وختيت ليهم منو في العمود بعد داك طلعو.. شلت تلفوني واتصلت لي غسان قال لي ميسم انتي كويسه؟ .. قلت ليهو الحمدلله تمام.. قال لي الحاصل عليك شنو؟.. قلت ليهو مافي شي خطير بس عشان رجعت براي وكنت خايفه.. قال لي في حاجه معينه مخوفاك؟.. قلت ليهو لالا.. قال لي ميسم انتي داسه مني حاجه ما تخليني اركب جني وأقوم اجيك هسي... قلت ليهو انا حصل كذبت عليك؟ مش كنت بتقول لي اكتر حاجه بريدها فيك انك ما بتكذبي... قال لي انا حاسي في حاجه حاصله وانتي ما دايرة توريني .. قلت ليهو البخليني ادس منك شنو.. سكت شويه بعدين قال لي حمدلله على سلامة اخوك.. قلت ليهو الله يسلمك.. قال لي شفتيه ولا منعوكم؟.. قلت ليهو لالا شفتو كويس الحمدلله.. قال لي الحمدلله، ابوك لسه ما جا؟.. قلت ليهو جا لكن رجع تاني بايت هناك.. قال لي كيف الكلام دا وانتي بايته براك؟.. قلت ليهو اي.. قال لي محجوب مش بايت معاهو؟.. قلت ليهو اي.. قال لي ما كان في داعي ابوك زاتو يبيت.. قلت ليهو ابوي لسه خايف عليهو.. قال لي الحيجيهو شنو مادام طلع من العمليه كويس، مادام محجوب معاهو ما كان يخليك براك.. قلت ليهو خلاص ما تخوفني اكتر مما انا خايفه.. قال لي هسي خايفه؟.. قلت ليهو لا لكن بعد تقفل حاخاف.. قال لي القال ليك حاقفل منو؟ .. قلت ليهو حتتكلم معاي للصباح يعني.. قال لي ما حاخليك براك.... فعلاً فضلنا نتكلم لحدي ما الصبح اذن عندهم قال لي بصلي وبرجع ليك قلت ليهو انا نعست ، انت زاتك نوم بعد ترجع.. قال لي انا ما عندي طريقة نوم بعد دا، حاطلع بدري ماشي المصنع بعدين بمشي الوكاله.. قلت ليهو حتشتغل كيف وانت الليل كلو مساهر.. قال لي عادي ما اول مرة.. قلت ليهو امممم كنت بتساهر مع منو قبلي؟... قال لي مع الشغل .. قلت ليهو شكلك ما عايز توريني طيب يلا.. قال لي لمن تصحي اتصلي لي.. قلت ليهو طيب... بعد قفلت استنيت الصبح لمن اذن بعدين صليت ورقدت نمت....
الاسبوع عدا بين الجري بين المستشفى والبيت.. ابوي كان بجي يستحمى ويشيل الاكل ويرجع تاني وانا بساهر مع غسان في المكالمه لحدي الصباح، مشيت يومين لي طارق وكان اتحسن شديد بقى بحرك يدينو لكن المشي لسه بواجه فيهو صعوبة.. الدكتوره المتابعه معاهو العلاج الفيزيائي قالت لينا لحدي شهر كدا حيمشي طبيعي.... يوم كانو مطلعنو جهزت ليهم الفطور من بدري وبقيت منتظراهم.. جو داخلين وهم ساندنو لحدي ما وصل السرير نفسو كان قايم والعرق نازل من وشو.. ابوي قال ليهو شويه شويه بتتحسن ما تشيل هم كونو قدرت تقيف على رجلينك دي اهم حاجه الباقي هين ان شاء الله... طارق عاين للكرسي الختاهو محجوب جمب سريرو قال ليهو زح الشي دا من جمبي ما صدقت خلصت منو.. محجوب قال ليهو خليهو معاك لحدي ما تتم علاجك.. طارق قال ليهو لالالااا ما دايرو.. ابوي قال لي محجوب شيلو خلاص... قلت ليهو حمدلله على سلامتك مره تانيه يا اخوي .. قال بطرف خشمو وبدون ما يعاين لي الله يسلمك...ابوي قال لي الفطور جاهز؟.. قلت ليهو اي اختو ليكم؟.. قال لي اي... جهزتو ليهم ودخلت الغرفه وقلبي واجعني ما عارفه طارق دا ليه بتعامل معاي بالطريقه دي افتكرتو بعد العمليه دي يمكن يتغير شويه لكن غير اتمادى ذيادة ما حصل شي نفسي اعرف ليه بكرهني كدا طارق دا عمرو كلو ما حصل اتعامل معاي زي اي اخ واختو ولا حصل اتونس معاي ولا اتكلم معاي برواق كلامو كلو نهير وشكل بس ما عارفه انا غلطت في شنو عشان القى منو القسوه دي كلها بالعكس انا بعمل جهدي عشان احنن قلبو علينا انا وطلال لكن كلو بدون فايده، اتنهدت ومسحت دمعتي النزلت... اتصلت لي خالتي صفيه كان قالت لي لمن يرجعو اتصلي لي.... هي وخنساء اتصالحو اول يوم في العيد بعد خالتي صفيه اقتنعت بمرتضى وقال حيتقدم ليها في الايام الجايه دي.. ونحن بنتكلم قالت لي اها حتمشي للدكتور متين؟ قلت ليها ما عارفه والله قالت لي اكلم ابوك؟.. قلت ليها حتقولي ليهو شنو؟.. قالت لي بقول ليهو عندها مشكله بتاعت بنات هو براهو بفهم... قلت ليها طيب كلميه.. قالت لي جبت ليك عنوان المستشفى الشغال فيها الدكتور ما بعيد من حتتكم.. قلت ليها كويس طيب..... اتونست معاها مسافه بعدين قفلت وطلعت عملت الشاي لي ناس طارق .. ابوي كان الفرح باين عليهو من كلامو وضحكو الكتير في الونسه دعيت انو دائماً اشوفو كدا واتمنيت يجي يوم واكون جزء من الفرحه الشايفاها فيهو دي..
