طارق كان بكورك لي من الصاله طلعت من المطبخ قال لي تلفونك دا صحاني من النوم ساعه بضرب امشي صمتيهو يا ردي.. لمن مشيت الغرفه لقيتها خالتي صفيه داقه لي مكالمة واتس رسلت ليها " برجع ليك بعدين يا خالتي هسي بجهز في الافطار، انتو شكلكم فطرتو بدري" ... رجعت المطبخ وجهزت صينية ناس ابوي وصينيتي الصغيرة، طلعت العصير من التلاجه وكسرت فيهو التلج.. ابوي جا من برا شايل كيس العيش قال لي الفطور دا لسه ؟؟ قلت ليهو جاهز هدا شيلو.. قال لي محجوب قال هو اخف حيجينا... قلت ليهو كويس.. ختيت ليهم الصينيه في الصاله وشلت صينيتي دخلت الغرفة، سمعت صوت محجوب بسلم بي برا.. وجودو في نفس المكان معاي بقى بخنقني وبحسسني بالخوف في نفس الوقت، لكن ما عندي حل غير استحملو....... من جينا مصر لينا اسبوع والليله اول يوم في رمضان، بعد يومين من جيتنا ابوي ومحجوب مشو للدكتور مع طارق ادوهو ادويه يستخدمها لمدة شهر زي ما قال عمي عبدالله وبعد داك حيعملو ليهو العمليه يعني تقريباً حتكون نهاية رمضان.. بعد داك مشو المقابله مرتين.. انا من جيت ما طلعت من الشقه النزلنا فيها بعاين للشارع من الشباك بس.. كنا في الطابق الأرضي عشان العمارة ما فيها اصانصير وحركة طارق حتكون صعبه.. الحي النازلين فيهو كانت حركتو كتيرة والشفع طوالي بلعبوا كل ما ازهج بقعد هناك بعاين ليهم، من قبل رمضان بكم يوم زينو الشوارع منظرها كان سمح شديد تحس انو رمضان دخل خلاص قبل يجي... الاذان لمن اذن شلت لي لقمة وشربت مويه بس اصلا ما كنت صايمه.. بعد داك طوالي اتصلت لي خالتي صفيه لكن ما ردت رسلت ليها رسالة لقيتها ما خاشه قمت اتصلت لي خنساء قالت لي ناس كايرو.. قلت ليها ناس السودان.. قالت لي خبرك شنو ورمضان كيف عندكم.. قلت ليها لو ما الزينه الفي الشوارع دي ما كنت حاحس بطعمو.. قالت لي يا حليلك فقدناك والله السنه دي قبيل وقت الافطار امي دي تبكي ساي تقول يا حليلها ميسم بتي... قلت ليها انا زاتي فاقداكم والله غايتو ما عارفه حاقدر اقعد باقي الشهرين ديل كيف.. قالت لي الله يصبرنا بس، اها فاطرة براك يعني ؟ ناس عمي مشو للفقر داك ولا شنو.. قلت ليها لالا هو الجا.. قالت لي اجي الجابو شنو.. قلت ليها قال لي شكلو عشان طارق ما يمشي ويجي كل يوم قال احسن يجي هو... قالت لي مشششششم مخير الله.. قلت ليها وينها خالتي صفيه اسلم عليها قالت لي مشو التراويح هي وطلال.. قلت ليها ايواا اها ومرتضى امس اتكلم مع امك؟.. قالت لي بري امي نامت بدري للعشا الا صحيناها لكن قال لي اول ما تجي من التراويح بتصل ليك اتكلم معاها.. قلت ليها يعني في النهايه هو الحيكلمها.. قالت لي ما قدرت يا ميسم والله قدر ما احاول افتح معاها الموضوع بلقى نفسي ما قادره وبنسحب .. قلت ليها ما مشكله هو كان حيكون احسن لو كلمتيها انتي لكن لو وريتيها انك كنتي خجلانه حتفهمك... قالت لي ان شاء الله ياخ والله خايفه خوف عندي احساس امي ما حترضى بي علاقتنا دي... قلت ليها ما تفكري كدا ان شاء الله حتتفهمك خالتو صفيه ما عندها التعقد الشديد دا... قالت لي ان شاء الله غايتو..... بنتونس كدا ابوي ناداني قلت ليها ناس ابوي شكلهم دايرين القهوة يلا لي بعدين.. قالت لي طيب يلا سلمي عليهم....
