رمت التلفون تحت الكتاب اول ما سمعت صوت زول جاي على الغرفة.. اتجمدت مكانها وما قدرت تقبل وراها لحدي ما سمعت صوت امها
" خنساء لسه انتي بتقري؟؟"
عاينت ليها اختها القاعده في السرير القصادها، كانت راقدة وشايلة تلفون امها
" بتك مجتهدة شديد خليها تقرا عشان تجيب ليكم نسبة كبيرة"
اتقدمت صفية على خنساء، جرت التربيزة وختت كباية عصير المنقه المنديه وربتت على كتف بتها
صفية: ما تساهري اكتر من كدا عشان تقدري تقومي بدري وتراجعي
خنساء بتوتر ملحوظ: كويس
صفية: امتحانكم ٨ونص مش؟
خنساء: اي
صفية: سمح نومي بعد دا
خنساء: اخلص الجزئية دي بس وانوم
صفية: طيب اشربي العصير قبل ما يسخن
طلعت صفية من الغرفه وانفجرت اسراء بالضحك
" المرة الجايه لمن يشوفوك ويشاكلوك اتبكي لينا وغني ظلموني الناس"
ما ردت عليها ورجعت شالت التلفون لدقيقتين بعدين قفلتو ودخلتو الدولاب
______________ ______________
بعد كلمنا ابوي ووافق بدينا نفتش على مراكز تحفيظ قريبة لقينا كم واحد لكن كانو مشوار من البيت وابوي لو عرف انو في موضوع مواصلات حيقول لينا ما ضروري.. خنساء جاتني يوم كان باقي ليها امتحان واحد وتخلص، من نزلت كنت كل يوم امتحان بمشي بسألها امتحنت كيف.. قالت لي اها طلال بدا ولا لسه، قلت ليها لسه والله ما لاقين مركز قريب.. قالت لي قبل فترة لاقاني في الفيس مركز بتاع تحفيظ لكن هم يلا بعملو زي المعكسر شهر كامل بكونوا هناك حتى بدوهم دروس فقه ومحاضرات وحاجات زي دي وفي كم نفر في التعليقات شكروهو .. قلت ليها بالجد ووين دا؟ قالت لي والله ما متأكدة من المكان لكن لو دايرة بفتش ليك تاني.. قلت ليها اي عليك الله شوفيهو لي،وبالقروش؟ .. قالت لي اي لكن ما حاجه كتيره تقريباً كم وعشرين.. شهقت وقلت ليها كم وعشرين عديل؟.. قالت لي بسيطة والله شوفي هم بدفعوا حق الايجار والأكل عليهم ما حاجه هينه.. قلت ليها صحي والله لكن ما عارفه حاقدر ادبرها ولا لا.. قالت لي كدي انا بفتش تاني وبجيب ليك رقمهم نتصل ليهم ونكلمهم بوضع طلال يمكن يعملو ليهو تخفيض.... لمن قالت كدا حسيت بنقزة في قلبي قلت ليها لا ما حنكلمهم ونخليهم يخفضو لينا شفقةً على اخوي.. قالت لي ما تفهميني غلط يا ميسم انا ما قصدي شي، وبعدين لازم يعرفو بي وضعو قبل ما يتسجل معاهم.. سكت ساي قالت لي ما تكوني زعلتي مني.. قلت ليها ما زعلت منك لكن، انتي عارفاني ما بحب استغل وضع طلال عشان الناس تشفق علينا.. قالت لي ابدا دا ما استغلال انتي هسي حتعملي كدا عشان نفسك؟ ما عشانو هو.. قلت ليها انا كان كلمتهم بقول ليهم وضعو عشان يكونوا عارفين ما عشان شي تاني.. قالت لي طيب ما مشكلة نكلمهم اول بالدسكاوند حتى بعد داك نقول ليهم وضعو، انا اصلا حامتحن اخر امتحان بعد بكرا بعد اخلص بفتح تلفوني وبشوف ليك.. قلت ليها طيب ما مشكله..
