تاني يوم طلعت على الشغل وركبت المواصلات سرحت في الشارع وكلام خنساء لسه بتردد في اضاني، انا ما حصل جربت احساس الحب دا ولا عارفه اذا كلامها صح ولا غلط بس بتمنى ما يطلع صح.. انا وين وغسان وين، دا ما تقليل مني لكن بقولو شنو ؟ رحم الله امرئ عرف قدر نفسه.. غير كدا انا من زمان رافضة فكرة الحب والارتباط دي وشايفه انها استهلاك مشاعر في الفاضي.. مقتنعه تماماً بفكرة انو مفترض اعيش قصة الحب بعد الزواج.. ضحكت وقلت في نفسي "بتكلم كأنو هداك غسان واقف مستني ردي على الفكرة الطرحها لي -نرتبط-" اخخخ يا ميسم فوقي لي نفسك هو ولا تلميح ما لمح ليك بتتكلمي على اساس شنو.... لمن وصلت المكتب كان مقفول عاينت للتلفون لقيت الساعه ٨ الا ربع، خوفتي حقت امس خلتنني اطلع بدري الليله ما عرفت اعمل شنو قبلت يمين شمال شفت خالتو فوزية ياداب جات وبتخت حاجاتها مشيت سلمت عليها قالت لي مالك الليله جايه بدري قلت ليها امس ادوني محاضرة عشان اتأخرت.. ضحكت وقالت لي استاذ غسان ولا منو.. قلت ليها ياهو منو غيرو.. قالت لي والليله بالخوفة صحيتي مع الدغش مش ؟؟ قلت ليها كل يوم بصحى مع الدغش بس يوم امس النومه شالتني... قالت لي اي بتحصل عادي .. قلت ليها بتحصل اي لكن منو البفهم الحاجه دي، اديني شاي بي نعناع اظبط راسي قبل ما ديل يجو... قالت لي طوااالي ... ولعت الكانون وبقيت بتونس معاها لحدي ما عملتو لي، لمن عاينت جهة المكتب لقيت غسان بفتح فيهو واماني جمبو.. ديل جو سوا ولا شنو؟؟؟.. خالتو فوزيه قالت لي قلتي حاجه؟؟ قلت ليها لالا ما قلت شي انا شلت كبايتي ومشيت عشان ما يقولو اتأخرت.. قالت لي سمح الله يفتحها عليك يا بتي.. قلت ليها امين ويفتحها عليك يا خالتو فوزيه...... اديتها القروش ومشيت لقيت اماني قعدت وغسان دخل مكتبو اماني قالت لي هسي جينا داخلين انا وغسان قلت ليها اممممم شايفاكم.. قلت لي كنتي ورانا ولا شنو قلت ليها جيت قبيل وكنت قاعدة مع خالتو فوزية.. ضحكت وقالت لي يا مهروشة.. ما اشتغلت بيها فتحت كمبيوتري وبديت اشتغل لمن زمن الفطور جا غسان جا طالع وقال لينا نمشي؟.. اماني قالت ليهو دقايق بس انا ما رديت وعملت نفسي شغاله.. فجأة لقيتو قعد في الكرسي القدامي بتاع الزباين برضو ما اشتغلت بيهو قال لي والأستاذة النوامه ما ماشة معانا؟؟.. قلت ليهو أول شي انا ما نوامه ما تمسكها لي زلة وتندمني اني قلت ليك كدا وثم ثانياً يوم متين كنت قعد امشي معاكم؟؟.. قال لي عامله حسابي الليله ولا اكل من برا؟.. عاينت ليهو وياداب كنت رفعت راسي قلت ليهو جايبه كتير اي.. قام على حيلو وقال لي اماني بيرقر جامبو زي كل يوم؟؟.. قامت وشالت شنطتها قالت ليهو خلصت ارح.. قال ليها ماف داعي تمشي مشوار ساي حنفطر هنا.. عاينت ليهو باستغراب تاني عاينت لي قالت ليهو خلاص تمام... غسان قلب اللافته وطلع وهي رجعت قعدت مكانها في البدايه كانت ساكته بعد مسااافه قالت لي قلتي ليهو شنو؟؟.. قلت ليها ما فهمتك.. قالت لي ليه قال حنفطر هنا.. قلت ليها اسأليهو هو القال ما انا... لوت خشمها وقالت مخير الله، الله اعلم عامله للود دا شنو مخليك تمشينا برايك كدا...... كنت شغاله بي تلفوني وبتكلم معاها لمن قالت كدا ختيتو وقلت ليها قصدك شنو؟؟.. قالت لي ما قصدي شي .. قلت ليها لا انتي بتلمحي لي حاجه معينه وريني.. قالت لي انتي فاهماني بتسألي ليه.. قلت ليها والله لو مفروض زول يلمح للتاني بي حاجه ف هو انا، حركاتك وظرافتك البتعمليها ليهو ما فايته علي لكن خليني اوريك حاجه ماف ولد بعاين بي بت بتخافف ليهو ختي المعلومه دي في راسك.... بقت تعاين لي ووشها جاب الوان قامت وفكت ضحكة عاليه قالت لي بالله انا البتخافف ليهو؟؟.. طيب وانتي الحركات البتعمليها لمن يكون قاعد دي تفسيرها شنو غير الخفه؟؟ انا وانتي في نفس الكفة حبيبتي... قلت ليها انا قعد اعمل شنو؟😊😊.. قالت لي لمن يكون ماف وانا اشاكلك في حاجه بتقعدي زي الطيرة المبلولة حرف ما بتنطقيه لكن لمن يكون قاعد لسانك ببقى مترين وبتعرفي تدافعي عن نفسك حتى لو ما اتكلمتي هو بدافع ليك هسي البتخافف منو؟ المشكله انتي عامله نفسك محور الكون وبتحاولي بكل الطرق تلفتي انتباهو وجايه تقولي علي خفيفه هئه الجمل ما شايف عوجة رقبتو..... كانت واقفه قدامي ومديه الباب ظهرها انا لمن شفت غسان واقف وراها من بدت الكلام خفت واتوترت لمن لقتني مبحلقة وراها قبلت لقتو واقف قالت ههه غسان جيت متين انت؟؟.... الخوف كان ظاهر في كلامها غسان سكت وهو بجول نظرو علي وعليها بعد صمت دام مسافه قال ليها عيدي الكنتي بتقوليه قبل شويه.. قالت ليهو غسان انا ما كان قصدي نحن..نحن اصلا دائماً في حالة نقاش عارفنا انت ههه... قال ليها بحدة: اعتذري ليها... اماني سكتت وبقت تعاين لي قال ليها قلت ليك اعتذري.. عضت طرف شفتها العلوي وقالت لي اسفه... غسان قال تاني كلام زي دا ما اسمعو ولا منك ولا منها نحن هنا في شغل ما في قهوة نسوان انتو زملاء ومفترض تتعاملو على الاساس دا والحساسيه البيناتكم دي احسن تشوفوا ليها حل لأنو بالطريقة دي ما حتقدروا تواصلو معاي..... بعد قال كدا جدع الكيس في التربيزة ودخل مكتبو، انا واماني بقينا نعاين لي بعض صراحه زعلت لأنو اتختت في موقف زي دا ايوه هي غلطت في حقي واكتر من مره لكن مهما كان انا ما بحب يشاكلو زول قدامي.. قبل اتكلم قالت لي انبسطي اخدتي حقك المره دي وبذيادة.. قلت ليها اماني انا ما عجبني الحصل دا ولا..... قاطعتني وقالت لي صددددقت صدقت.... سكت لأنو حالتها ما كانت بتسمح بالنقاش الجو بقى مكهرب لحدي ما خلصنا شغل اليوم دا اتاخرنا لأنو كان في زول جاي لي غسان واتأخر عندو جوا لحدي الساعه ٢ ونص حتى طلعنا قال لينا ما كان تستنوني لكن مادام قعدتو اركبو اوصلكم.. قلت ليهو انا بم.... قال لي اركبي يا ميسم.... ركبت خوفه ساي قلت يقوم يشاكلني في الشارع اماني كانت زعلانه وما اتكلمت بحرف لحدي ما وصلت... قبل نصل الموقف غسان جاهو تلفون رد وبقى بتكلم " مفتاح شنو؟ ايوه معاي.. هو قال دايرو؟؟ والله ما عارف في البيت ولا في العربيه.. كدي دقيقه خليك معاي" بقى بهبش وبرفع في الاوراق الفي عربية بعد شويه قال لي ميسم كدي شوفي لو في مفتاح في الدرج دا.. فتحتو لقيت في ورقه مطبقة بعشوائية وجمبها مفتاح رفعتو وقلت ليهو دا؟.... بقى بعاين لي وبعاين للمفتاح شالو وقال " اي لقيتو.. لا دي ما ميسم اختي... يا مان دي ما وقت تحقيقاتك دي.. خلاص بمر عليك واسلمك ليهو ..تمام".... كنت عايزه اقفل الدرج لقيت الورقه القبيل ماف عاينت تحت لقيتها وقعت دنقرت ورفعتها قبل ادخلها لاحظت للكتابه الفيها لمن فتحتها كويس اتصدمت... دا شنو؟؟! عاينت ليهو لقيتو بعاين لي رفعتها وقلت ليهو الورقة دي من دفتري؟... قبل قدامو وما رد بركن العربيه وحكا انفو بسبابتو بعدين قبل تاني وقال لي ايوه.. قلت ليهو ما فاهمه بتعمل شنو عندك؟.... قال لي ميسم انا حاكون صريح معاك لأني اصلا ما بتاع لف ودوران وكنت داير افتح معاك الموضوع دا لكن ما لاقي طريقة او مناسبة.. المهم انا داير اتعرف عليك اكتر.... كشرت حواجبي باستغراب قلت ليهو ليه.. ليه يعني... قال لي لأنك عجبتيني..... قلبي بقى بضرب سريع وحسيت انفاسي بقت ما منتظمه ما عرفت ارد بشنو فضلت ساكته ومنزله راسي ما قدرت اعاين ليهو اكتر عدا وقت طويل وانا بديت اتوتر اكتر قطع سكاتي صوتو وهو بقول لي ما مضطرة تردي لي هسي متى ما تحسي نفسك لقيتي جواب لي سؤالي تعالي كلميني وانا ما حاضغط عليك.. هزيت راسي بس، بعد داك دور ووصلني بدون ما يقول حرف ذيادة...... الطريق كلو بفكر في كلامو دا وحتى بعد وصلت ما قدرت اعمل اي شي بتركيز قدر ما احاول اشتت بالي منو بلقى نفسي براي رجعت افكر في الموضوع.. اتفاجأت واتفاجأت شديد كمان ما اتوقعت ولا بنسبة ١٪ انو يكون معجب بي وببادلني نفس الشعور.. الليل كلو بفكر حارد ليهو بشنو؟ اوافق واسلمو قلبي ولا احافظ عليهو زي ما كنت محافظه عليه السنين الفاتت دي كلها.. المخليني اغير مبادئي القمت عليها اتردد كدا شنو؟؟؟ ليه هو بالزات لييه....
