يـمن فدوه لعيونك
ردلي لو لحظات
وأشمك شمة موادع
ياابويــــة العود
مااتنشف دمعتي لو بعد قرنين
ضلت حرگه نار عليك يالچادود ..
بقت الكلمات بدماغي وين مااباع اشوفة ضحگتي كلها راحت صرت خاملة ومنطوية وميهمني احد بالدنيا
اسبوع مر واني مو مصدگة كل مااغفه اسمع صوتة واگوم ادور عليه بالبيت
تمرضت من قلة الاكل
احضن دشداشتة او ايشي من اغراضة يلا اگدر انام
جان البيت مخبوص بالعالم والفاتحة وضجة والدنيا كلها مگلوبة علينا
بعد الاربعين اجتمعو العائلتين وقسمو الورث
ماكعدت وياهم بس براق وجدة
اجوي عليه
گالو مسجل البستان الي وباقي الاراضي همة يتقاسموها
الحفيدة الوحيدة من بين الولد والبنات لي جدو ياسين مسجل شي باسمها
فصارت انو اوقع لازم على اوراق البستان
ويصير باسمي
مقبلت بالبداية بس براق گال هاي وصية ولازم تتنفذ
جابو الاوراق للغرفة ووقعت وكملو باقي الاشياء
البستان 10دونم وخليت اسم البستان "بستان الحاچ ياسيـن "
مااقبلت اروح اعيش ببيت اهلي فاهلي أجو عاشو يمنا
تعلقي زاد ببراق كمت مااكل الا هو موجود وكلامي بس ويا وبس هو الاسولف ويا
مرت سنة
ونفس حالتي متغير شي هدوئي طغى
بعد مرور اشهر
فتحت الباب لگيتها مخلية كتاب بيدها وصافنة
براق: شبيچ ام عيون السود
نجمة: ها
براق: ليش صافنة مو انتي سادس بابا ليش متقرين
نجمة: ميهمني لمنو اصير بعد منو يشوفني بالصدرية البيضاء
براق: نجمة اسمعيني زين
باوعت عليه وعيونها مخزنة بحر دموع
براق :اليموت الله يرحمة هو يشوفنا بس احنا مانشوفة روحة ويانا بس احنا نعيش بذكرياتة
هذا قانون الحياة لازم انگول انا لله وانا اليه راجعون
لازم ندعي للميت ونذكر مواقفة الحلوة ألبچي والحزن يخلي يتعذب بقبرة
الحزن ميرجع المات اليتوفى يريد منا دعاء وصدقة
حسيتها استجابت لكلامي وبقت تسمعني
چان شوي ويغوركن عيونها دارت وجهة عني
نجمة: أني مشتاقتلة
گلبي وجعني من كلمتها اعرف متعلقة شگد بي وغيابة مو هين علينا وعليها هي بالذات
البچي البچتة والحزن الصارت بي العالم اعتقدو انو هي بنتة لان بناته مصار بيهن الي صار بيها
من نجمة التدلع والتشاقة وأم السان الى نجمة الهادئة الماتطلع من الغرفة
جانت من صغيرة ولحد هاليوم ماتبجي كدام احد بس گدام الوالد
مرة جانو كاعدين بالحديقة وسمعتة يگوللها ابچي بس گدامي ابچي اهنا وگومي بوجوهم اضحكي
✨ أبچـي بس يم اليحفض دمعتچ✨
نجمة أكثر شخص بعايلتنا من بين الاحفاد وحتة اخواني وخواتي أكثر شخص نكسر وحزن بوفاة الوالد
والكل لاحظ هالشي
بهالسنة البستان هواية زادت محاصيلة وهي ماتعرف عن شي لان اني الي لازمة
عنها
فيوم من الايام أخذتها وياي علمود تغير من نفسيتها
