The Love Sleeping Under The Moonlight

Part 11

[Unicode]_____________

ယွန်းပြည်။
အရှေ့ဝေနန်းတော်(နန်းတော်သစ်)။

နန်းမြို့ဟူ၍ သီးသန့်တည်ရှိမနေပါဘဲ ယွန်း၏ပင်မနန်းတော်နှင့်အနည်းငယ်အလှမ်းဝေးသည့် ဝေမြို့ဟောင်းအနီး တည်ရှိသော ဝေနန်းတော်သစ်။

ယွန်း၌ကျင့်သုံးသည့်အုပ်ချုပ်ရေးစနစ်အရ နယ်နမိတ်များကို ဘုရင်နှင့်အိမ်ရှေ့စံက မင်းကြီးနှင့်မင်းငယ်ဟူ၍ခွဲခြားအုပ်ချုပ်လေ့ရှိရာ ယခု ဝေမြို့ဟောင်းအုပ်ချုပ်ရေးကိုချုပ်ကိုင်ထားသူမှာ မင်းငယ်ဟုအမည်ရသည့် အိမ်ရှေ့စံ ကင်မ်ဆော့ဂျင်း။

အရှေ့ဝေနန်းတော်မှ ဆောင်နန်းတို့က ပင်မနန်းတော်လောက်ခမ်းနားသည်မဟုတ်လှပေမယ့် နန်းတော်ဆိုသည့်လက္ခဏာဖြင့်တော့ လုံလောက်စွာပြည့်စုံနေခဲ့သည်။ ပင်မနန်းနဲ့မတူညီသည်က အရှေ့နန်း၊အနောက်နန်းဟူ၍ သတ်မှတ်ကာ မင်းနဲ့မိဖုရားအတွက်ခွဲခြားထားခြင်းမရှိသည်ပင်။ ဒါဟာလဲ မင်းငယ် တစ်နည်းအားဖြင့် အိမ်ရှေ့စံတစ်ယောက်စိုးစံသည့်နန်းတော်မို့ မဖြစ်မနေလိုအပ်သည်လဲမဟုတ်ပါ။

အရှေ့ဝေနန်းတော်သစ်မတည်ခင်ကတည်းက မင်းငယ်နဲ့ မင်းသမီးယူနာတို့လက်ဆက်ခဲ့ပြီး ပင်မနန်းတော်၌ပင်အတူရှိခဲ့ကြသည်။ထိုအချိန်ကာလအတွင်း သားသမီးတစ်ယောက်မှမထွန်းကားဘဲ နန်းတော်သစ်ဆီပြောင်းရွှေ့ပြီးကာမှ မင်းသမီးယူနာမှာ မင်းငယ်ရဲ့နန်းသွေးကိုရရှိသည်မို့ အားလုံးကမင်းသမီးယူနာအပေါ် သိပ်တော့မကျေနပ်ကြပါ။

ယခင်ကတည်းက ဝေရဲ့နန်းကျမင်းသမီးတစ်ပါးဖြစ်နေခဲ့သူတစ်ယောက်က ယွန်းရဲ့ပထမဆုံးအိမ်ရှေ့မိဖုရားဖြစ်လာလေတော့ မင်းသမီးကင်မ်ယူနာကို ကန့်ကွက်ချင်သူ ခပ်များများရယ်။

ဝေနန်းတော်သစ်ရောက်မှ အိမ်ရှေ့စံရဲ့ရင်သွေးကိုရယူခဲ့သူ မင်းသမီးယူနာဟာ ယွန်းအပေါ် တမင်သက်သက် အမုန်းအာဃာတတို့ထားပြီး သူ့သွေးသားကိုတောင် ယွန်းမြေ၌မတည်ချင်သူဟုလဲ အများကသမုတ်ကြသည်။

မွေးလာသည့်နန်းသွေးဟာ သားတော်ဖြစ်ဖြစ် သမီးတော်ဖြစ်ဖြစ် အိမ်ရှေ့မိဖုရားယူနာကတော့ ယွန်းရဲ့ နောက်တက်မယ့်ဧကရီနေရာကို အလိုအလျောက်ရရှိထားပြီမှန်း အားလုံးကလက်ခံကြရမည်။