قَيدارْ

صلِّ

واحسك حيل تعنيلي واحسك جزءء من روحي

...

الماضي..

"أَصْهب أَصْهب بس اسمعني"

لزمته من ايده و هي تصيح عليه ماجان منه غير يبعد عيونه عنها ويدفعها بعيد عنه.

"نبأ انتِ صرتي زوجة اخوي وصديقي زمن قبل اختلف"

حجه ببرود وهو يبعدها منه عكس گلبه الي جاي يجبره يوكف مكانه ومايتحرك جان يريد يشبع عيونه بشوفتها مشتاق لكل تفصيلة بوجهها

"أَصْهب غلطت ماجاي اكدر اعيش وياهم يوميه يجي سكران يضربنا اني و اطفالي اخاف عليهم جاي يأذيهم"

ردت عليه بصوت يرجف وهي تبجي وتتلفت تخاف احد يشوفها،

"المطلوب مني شنو؟"

كال وهو يباوعلها وعيونه كلها حب يعرف بغالب يشرب ويعرف بيه جاي يخونها ويأذيها بس ما بأيده شي خسرها باليوم الي تعاركوا على شي تافه وبلحظة غضب منها وافقت على غالب الي خطبها قبله.

"طلعني منا رجعني لأهلي والليلة نطلع"

...

الحاضر..

"ها مالك جبتلي الاوراق"

كال أَصْهب بسرعة وهو مندمج بين اوراقه.

"اي سيدي جبتهم واريد منك شي"

رد عليه مالك بتوتر وهو مستحي من طلبه، ترك أَصْهب الي بأيده ورفع عينه على الثاني منتظره يحجي لو شكد ماجان منشغل مايترك شغله الاهم اهله واصدقاءه

"سيدي الاسبوع اليجي عرس ابن اختي واريد اخذ اجازة"

حجه وهو مدنك راسه بأحترام وهدوء.

"بس اجازة؟ من باجر لاتجي اخذ هاي الاسبوعين كلها"

جاوبه بأبتسامه وهو يباوعله ليبادله الثاني الابتسامه ويطلع.

...

جان يباوعله بنظرات مامفهومة يراقب كل خطوة جاي يخطيها كل حركه حتى نفسه جاي يحفظه

"قيدار تعال"

صاح عليه بصوت عالي ليترك الاصغر الي بأيده ويتوجه للي كاعد يشرف على البضاعه الي يحملونها، وكف كدامه بهدوء وهو يتجنب يباوع لعيونه

"كلتلي اهلك بالرمادي مو؟"

حجه وهو لازم القلم بأيده ويفر بيه وابتسامه غريبة اعتلت شفايفة، انصدم قيدار حس لسانه انعقد ماكدر يجاوب اكتفى انه يهز راسه بس