ONE

Ep-11

Unicode

အန်ကယ်ပြန်သွားသည် အထိ ထိုနေရာ ထိုထိုင်ခုံ၌ပင် ဆက်ထိုင်နေမိသည် ။ အဖြစ်အပျက်များအား လက်မခံနိုင်သလို လက်ခံရန်လည်း ခက်သည်မဟုတ်ပါလား ။

သူသိပ်တွေ့ချင်နေသော သူ၏ ဖခင်သည် သူတို့သားအမိအား စွန့်ပစ်ခဲ့သည်ဟူသော အမှန်တရားသည် အလွန်တရာမှ ဝမ်းနည်းစေသည် ။ ထိုအချိန်တွင် သူ့အတွက် အိမ်နှင့်တူသောလူတစ်ယောက်၏ ရင်ခွင်သာ လိုအပ်နေခဲ့သည် ။

မတတ်နိုင်ပေ ။ သူ့ဘက်မှ ချန်ခဲ့မည်ဟု ဆုံးဖြတ်ထားသော နွယ်ပင်လေးကိုပင် သူ့ဘဝတွင် အထပ်ထပ်ရစ်ပတ်နေမိပြန်သည် ။ သူ၏ လူဆိုးလေး ၊ သူ၏ ကလေးငယ်လေးဆီကိုသာ သူ ဖုန်းခေါ်မိသည် ။

ပီပီခရစ်၍ ဘဝတွင် မိခင်ပြီးလျှင် အချစ်ရဆုံးသူနှင့် အရေးအပါဆုံးသူမှာ ထိုကလေးငယ်သာဖြစ်သည် ။ ထိုကလေးငယ်နှင့် သူသည် ထိုအတိုင်းလေး ထိုနေရာလေးမှာပင် ရပ်နေချင်သည် ။

မောင့်ဆီကိုလည်း တိုးဝင်မလာချင် ၊ မောင့်ကိုလည်း လက်သင့်မခံချင်ပေ ။ မောင်နှင့် အတိုင်းအတာတစ်ခုထိ ပတ်သက်ပြီးမှ လမ်းခွဲစရာ သို့မဟုတ် လမ်းကွဲစရာ အကြောင်းတစ်ခုခုမျှကြုံလာခဲ့ပါက ထိုအခြေအနေအတွက် သူ့မှာပြင်ဆင်ထားခြင်းမရှိပေ ။ ထို့ကြောင့် လမ်းခွဲစရာမလိုသော ထိုအခြေအနေလေးမှာတင် သူတို့နှစ်ယောက်၍ ဆက်ဆံရေးကို ရပ်တန့်ထားမည်ဖြစ်သည် ။

တစ်ချိန်တုံးက ဗြူကင်းဘက်မှ အတင်းတိုးဝင်လာပါက ဗြူကင်းဘဝထဲမှ တိတ်တဆိတ် သူထွက်သွားရန် ဆန္ဒရှိခဲ့သည် ။ ယခုအခြေအနေသည် ဗြူကင်းဘက်မှ တိုးဝင်လာသည်မဟုတ်ပါဘဲ သူ့ဘက်မှ လိုလိုချင်ချင် လက်ခံချင်နေခဲ့သည် ။

သို့ပေမယ့် ထိုကောင်လေးနှင့် ပတ်သက်၍ ကြားနေရသည့် သတင်းများသည် သူ့အတွက် နာကျင်ရသည် ။ " Double B " ဟုဆိုကာ ကောင်လေးနှင့် သူ့သူငယ်ချင်းမိန်းကလေးအား ship ကြသည့် လူတစ်စုသည် ယခုအခါ ပေါ်ပေါ်ထင်ထင်ဖြစ်လာခဲ့သည် ။

ပီပီ့စိတ်ထဲ၌သာ သူတို့သည် သူငယ်ချင်းအဆင့်ဟုသာ သတ်မှတ်ထားသော်လည်း အမှန်စင်စစ် သူတို့သည် ဘယ်လိုဘယ်ပုံပတ်သက်နေကြမှန်း ပီပီခရစ်မသိပါ ၊ မသိလည်းမသိချင်ပါ ။ တချို့အရာများသည် သိနေပါက ပိုခံစားရသောကြောင့် မသိသလိုနေခြင်းသည်သာလျှင် နှလုံးသားအား သက်သာရာရစေသည် ။