جِلدُ أفعى

الحلقة الثالثة

جِلْدُ أفعى
للكاتبة مجهولة ...
i_dont_know_0290
ــــــــــــــــــــــــــــ

الاطفال بعمر صغير ما يعرفون الصح من الغلط ابداً، يحتاجون رعايه و تنبيه و تعليم، اهم شي التعليم، من نكون فاقدين الشخص الي يوجّهنه و يعلمّنه و يخلينه
نميز بين الصح و الغلط نحنَ مراح نعرف شنو هو الصح و شنو هو الغلط، بعباره ادق نحنَ راح نتصرف بكيفنه بدون مراعاة للي دا نسوي سواء كان صح او غلط لان بالفترة الي العقل يكون بيها مهيئ للتعليم اني عقلي تحشى بالكره و الحقد و الخيانه و الكذب و الخذلان و ألايذاء النفسي قبل الجسدي و كلهن صارن بعقلي خارج أرادتي

شنو هو الصح؟ ما اعرف
شنو هو الغلط؟ ايضا ما اعرف

انا بعمر ما يسمحلي اميز بينهن او محد علمني كيف اميز بينهن، شلون اتصرف؟ شلون ممكن اكون لطيفه؟ او ما احقد او على ادنى مستوى اكفي الناس خيري و شرّي
،ما اعرف هل عمري يسمحلي اكون متلاعبة او كذابة او ممثله جيده ؟ بعمر الـ١١ سنه ممكن اجيد كل ذني؟ و ما عندي اي تفكير بريئ طفولي يناسب عمري؟ ممكن ابدل جلدي حسب الموقف؟! اخطط لكل تصرف اسوي؟ مو مجرد شقى طفلة عادي او خباثة من الاطفال لا ..

كل تصرف اسوي مسؤوله عنه بكامل وعيي مهما يشوفه المقابل هو لعب اطفال بس بالحقيقي هو مو هيج، هو تخطيط انا اخططه و اعرف شنو هي ردود الفعل على هالتخطيط و هي الردود الي بسببها اسوي التخطيط
حتى اوصللها

من ذبني سارفراز بالبيت امي سئلتني ليش تاخرت! اجتني البجيه والشهكه الي صار امر استحضارها جدا سهل:
-مامااا هذااا سارفراز ابن جيراانة داس طرف رجلي بالبايسكل مالته

و ابجي بألم ،ردت امي:
-شو بلا اشووف

انا من قبل گرصت رجلي حيل و صارت زركة وضربتها حتى بساع ينطي اثر ،شافتها وكالت:
-تستاهلين منو كلج خربي البايسكل مالتة

وعافتني بلا مبالاة ،يااا هاي امي هم قلبت عليه بس ما يأثر عندي بعد حل وخطّة ،عفتها وطلعت ابجي قريب اوصل لبيت جدي ونعفشت شعري وشققت نص بلوزتي، دكيت الباب وطلع عمي ،هو وايد يحبني اسمة( غياث) رحب بيه بس سرعان ما تفاجئ بشكلي:
-هلا ببنيتي جـ... هاي شبي شعرج وشكلج جواهر؟!

افتعلت البجي:
-عموو هذاا سارفراز ضربني وداس على رجلي بالبايسكل

عمي:
-چا عمي انتِ ما بيج تضربينة وتنعلين سلفة سلفااه لو بس بالسانج شاطرة؟

رديت:
-عمو كانوا ولد هواي و انا استحيت اضربة ،ضامة عضلاتي اله هنا

عمي:
-ابن الكلب يروحلج فدوة امشي بعد عمج

ظليت صافنة وين ياخذني؟!معقولة للمستشفي وانكشف بوقتها لان مكان اثر گرصة مو دوسة بايسكل بلعت ريكي بتوتر:
-ها عمو وين تريد