جِلدُ أفعى

الحلقة الرابعة و الثلاثون

"جِلْدُ أفعى"
للكاتبة مجهولة ...
الانستا  no_one_0290

فضلا ⭐ لا تنسوها و متكلفكم بس تفرق عندي و علقوا بين الفقرااااات ❤️

ــــــــــــــــــــــــــــ

جواهر:

تجي لحظات للأنسان ييأس لدرجة يشوف الموت اهون عليه من هاللحظات، الحياة صح قصيرة و صح مهما نعاني بيها عندنا بعد هالحياة آخرة أبدية ، كنت دائما اصبر نفسي بهالشي و اگول مهما طولت الحياة و تعذبت راح يجي الفرج و اشوف العوض الكبير جزاء تعبي بس مع كل يوم يمر افقد هالمعتقد و هالظن و اشكك بتفكيري، معقولة حياتي راح تضل هيج دائما ليل و ما يحل عليها نهار و لا تطلع بيها شمس؟ معقولة ما راح يجي العوض الي يكون مكافئة لصبري؟

فزعت و وگع الموس من ايدي على دگة الباب كانت امي و هي تگول:
-منو اهنا؟

حطيت ايدي على حلگي و گعدت بالگاع ابجي و اكتم شهگتي، رجع دگ الباب بقوة، تحمحمت احاول اعدل صوتي حتى يصير طبيعي:
-ها يما انا جواهر

گالت:
-وش دا تسوين بالحمام
-اسبح

سكتت و عافتني، رجعت باوعت للموس شلته و رجعته لمكانه ،انا اضعف من انُ انتحر، انا راح اصبر و انتظر مهما طال انتظاري و امتد صبري راح اصبر الله يعوضني و اكتفي بقدري و اشوف شنو اخرتها و اسلم كل امري لرب العالمين ..

طلعت نشفت شعري ولبست ملابس مريحة و عفت شعري مفتوح و تمددت عالجرباية، غمضت عيوني بتعب بس اريد عقلي يهدأ، شوي وسمعت الباب انفتح فتحت عيوني وشفت شايان سكر الباب بهدوء و اجه كعد عالارض خاطبني:
-شلونج؟!
-بنص الخير متشوف!

تنهد و گال:
-اذا مو قابلة ارفضي

ابتسمت بأستهزاء:
-وراح يسمعون رايي؟!
-غصبأ ماعليهم

-هذا الحجي ما ياكل عندهم، عمي غياث و جدتي ما استمعلهم يستمعلي انا؟
-واجهيهم

باوعتله:
-وش اواجه؟ شايان ابوك معند وامك مسوية السالفة يمها ماتحس اكو شيء غلط بالموضوع؟!
-شلون يعني؟

گعدت و گلتله:
-فجأة بيوم وليلة ورة وفاة جدي بأشهر قليلة يجون يخطبوني وثاني ليلة يجيبون المحبس حتى ما حجوا بخصوص اي شيء كانما متفقين سابقاً على كل شي

اومئ:
-صح كلامج، بس انا صار فترة طويلة من سمعت بسالفة خطوبتج، كل ظني انتِ عندج علم

رديت:
-ما ادري عن شي، استغبوني
-يجوز بي خير الج

نفيت:
-والله مابي اي الخير، ما ارتاحيتله اول ماشفته
-هسه لتفكرين بالموضوع بعده ما صار اي شي رسمي