جِلدُ أفعى

الحلقة العشرون

"جِلْدُ أفعى"
للكاتبة مجهولة ...
الانستا  i_dont_know_0290

فضلا ⭐ لا تنسوها و متكلفكم بس تفرق عندي"

🔞 لو قلوبكم ضعيفة لا تقرأوها بالليل 🔞
تعوذوا بالله من الشيطان الرجيم
ــــــــــــــــــــــــــــ

كل انسان اله قدرة تحمُل و الله يعطي مصائب مختلفة لكل شخص حسب قدرة تحمُلّه ، مرات من نسمع مشكلة صارت لشخص نستهزأ بيها لان مارّين بالاقوى منها و متحملين و هالشخص مشكلة مثل هاي خلته ينهار، بس هي هاي طاقته ،هاي قدرة تحمُلّه، انا ممكن طاقتي و قدرتي عالتحمل اقل او اكثر من ذاك الشخص و ممكن نسمع مشكلة ثانية من شخص ثاني نتفاجئ نقول ليش و شلون للآن ما انهار و انا لو بمكانه كان انتحرت او انهاريت او تخبلت ،لان عنده قدرة تحمُل ، بس هل هذا يعني اذا عنده قدرة تحمُل انُ ما يحس او احساسه اقل من يلي ما يتحمل؟

على العكس تماماً، هو اقوى لان قدرة تحمله قوية، هو يحس و يشعر و بيوم كان مثل يلي ما يتحمل اصغر المصائب و من بعد الف انكسار و خذلان صقل شخصيته و خلاها قادرة انُ تتكيف مع كل مشكلة و مصيبة ، مثل من تصير عندنا مناعة من الأمراض، مو لأن جسمنه قوي بس لأن مرينه بأمراض هواي قوت مناعة جسمنه و خلت اجهزة المناعة تتطور و تحارب كل مرض يدخل للجسم، بس انا تعبت ، قدرتي على التحمل انهارت، يلي سمعته فاق قدرة تحمّلي بهواي ،مو اعتقد الموت افضل لي؟ ..

بالليل و بعز بردي و عطشي و جوعي و خوفي و متأمله بابا يرف قلبه عليه و يگول بنتي تخاف بمكان اضلم و معزول و مسكون بس هذا بابا، بابا يلي تعودت منه الخذلان و كسرة الخاطر ، كنت منتجيه عالحايط بكل تعب و الم بس سمعت خطوات حفّزت حواسي و تجدد الامل المفقود ، دگيت الباب بقوة معدومة حرفياً و اهمس لبابا حتى قلبه الحجر يلين شوية، بس توقفت ايدي عن دگ الباب من سمعت بابا يحجي و مبينه الابتسامة بنبرته:
- حبيبتي أنتِ تروحلج فدوة هي وخلفتها كلهم

ضحك ورجع گال:
-اي يُبا وديتها لأهلها ما أريدها

سكت و رجع كمل:
-أي عن قريب اطلقها وتجين مكانها

حسّيت النار شبّت بقلبي فوگ ناره المجمرة ، اخخخ يا قلبي هالگد نحنَ نهون على بابا؟ هالگد نحنَ رخاص عنده؟ يا ربي اذا ما لنا اي اهمية بالدنيا ليش انخلقنا؟ الكل يكرهنا وين نروح؟ يا مكان يأوينا بدون ما يمن علينا ، اذا بابا ما يريدنا منو يريدنا؟

ضليت صافنه بالفراغ، اريد ابجي بس من شدة عطشي حتى دموع ما عندي ابجيهن، اريد ابجي حتى حرگة قلبي تروح، النار الي شابّة بروحي اريدها تطفى شلون؟ ...